قازاقستان ىشكى ىستەر مينيسترلىگى استانادا ماس كۇيىندە كولىك جۇرگىزگەن سۋديانىڭ ۇستالۋىنا قاتىستى تۇسىنىكتەمە بەردى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
2 قاراشادا الەۋمەتتىك جەلىلەردە استانا قالاسىنداعى ازاماتتىق ىستەر جونىندەگى اۋدانارالىق سوتتىڭ سۋدياسى اسەل دوساەۆانىڭ ماس كۇيىندە كولىك تىزگىندەگەنى تۋرالى اقپارات تاراعان.
ءىىم مالىمەتىنشە، وقيعا 1 قاراشا كۇنى تاڭعى ساعات 04:30 شاماسىندا «حان شاتىر» ساۋدا ورتالىعى ماڭىندا بولعان. پاترۋلدىك پوليتسيا قىزمەتكەرلەرى Mazda-6 اۆتوكولىگىن توقتاتىپ، جۇرگىزۋشىدەن الكوگولدىك ماساڭدىق بەلگىلەرىن انىقتاعان.
«تەكسەرۋ بارىسىندا جۇرگىزۋشىنىڭ ماس كۇيىندە بولعانى جانە كولىكتى جارامدىلىق مەرزىمى ءوتىپ كەتكەن جۇرگىزۋشى كۋالىگىمەن باسقارعانى انىقتالدى»، — دەلىنگەن ءىىم رەسمي حابارلاماسىندا.
اتالعان دەرەك بويىنشا ماتەريالدار باس پروكۋراتۋراعا جولداندى. بۇل ورگان ءوز كەزەگىندە جوعارى سوت كەڭەسىنە سۋديانى جاۋاپقا تارتۋ ماسەلەسىن قاراۋعا ۇسىنىس ەنگىزەدى.
بۇعان دەيىن پوليتسيا كولىكتىڭ كوممۋنالدىق تۇراققا قويىلعانىن جانە وقيعاعا بايلانىستى تەكسەرۋ جۇرگىزىلىپ جاتقانىن حابارلاعان.
