تانىمال بلوگەر ءارى ازىلكەش تۇرسىنبەك قاباتوۆتىڭ بۇرىنعى جارى ءمولدىر مۇقان زاڭسىز ونلاين-لوتەرەيا وتكىزگەن تۇلعالار تىزىمىنە ەندى، دەپ حابارلايدى "ادىرنا" ۇلتتىق پورتالى.
ۆەدومستۆونىڭ رەسمي مالىمەتىنشە، ءمولدىر مۇقانوۆا (Instagram-پاراقشاسى Moldir.mt, 2,3 ملن جازىلۋشى) قر اكىمشىلىك قۇقىقبۇزۋشىلىق تۋرالى كودەكسىنىڭ 445-1-بابىنىڭ 6-بولىگى بويىنشا اكىمشىلىك جاۋاپكەرشىلىككە تارتىلعان. ول 589 800 تەڭگە (150 اەك) كولەمىندە ايىپپۇل تولەگەن.
مادەنيەت جانە اقپارات مينيسترلىگى بۇعان قوسا بىرنەشە تانىمال تۇلعانىڭ دا ءدال وسىنداي زاڭبۇزۋشىلىق جاساعانىن حابارلادى. ماسەلەن، بلوگەر دارحان جولشىبەك (3,1 ملن جازىلۋشى) ءساۋىر ايىندا 393 200 تەڭگە (100 اەك) ايىپپۇل تولەۋگە مىندەتتەلگەن.
تىزىمگە ەنگەن وزگە تۇلعالار:
-
رامازان امانتاي – اكتەر – 393 200 تەڭگە (100 اەك);
-
مەرەكە قالباەۆا (merekusha.k, 1,3 ملن جازىلۋشى) – 589 800 تەڭگە (150 اەك);
-
نۇربەك نۇرتازا (justking31) – 1 179 600 تەڭگە (300 اەك);
-
ءاليا بايتۋعاەۆا (super.mamasita, 7 ملن جازىلۋشى) – 825 720 تەڭگە (210 اەك);
-
امينا نۇرتازا (aminaxo26, 7 ملن جازىلۋشى) – 825 720 تەڭگە (210 اەك);
-
قايسار قامزا (qais_arr, 2,4 ملن جازىلۋشى) – 1 179 600 تەڭگە (300 اەك);
-
الماسبەك باتىر (almasbek_batyr, 1,8 ملن جازىلۋشى) – 589 800 تەڭگە (150 اەك).
ۆەدومستۆو دەرەگىنشە، جىل باسىنان بەرى 90-عا جۋىق قۇقىقبۇزۋشىلىق تىركەلىپ، ولاردىڭ جالپى ايىپپۇل سوماسى 40 ميلليون تەڭگەدەن اسقان.
"جەكە تۇلعالار مەن بلوگەرلەرگە، سونداي-اق جەكە كاسىپكەرلەرگە تاۋار نەمەسە قىزمەت ساتۋدى ىنتالاندىرۋ ماقساتىندا لوتەرەيا تۇرىندەگى ۇتىستار ۇيىمداستىرۋعا تىيىم سالىنادى", — دەپ اتاپ ءوتتى ويىن بيزنەسى مەن لوتەرەيانى رەتتەۋ كوميتەتى.
زاڭ بويىنشا، قازاقستاندا لوتەرەيا ۇيىمداستىرۋ قۇقىعى تەك ليتسەنزياسى بار وپەراتورلارعا عانا بەرىلەدى. ال رۇقساتسىز مۇنداي ءىس-شارا وتكىزگەندەرگە 100-دەن 300 اەك-كە دەيىن ايىپپۇل سالىنادى.
