قازاقستاننىڭ ءبىر قالاسى الەمدىك تۋريستىك باعىتتار تىزىمىندە ۇزدىكتەر قاتارىنا ەندى

الماتى قالاسى CNN حالىقارالىق تەلەارناسى ۇسىنعان ۇزدىك تۋريستىك باعىتتار تىزىمىنە ەندى، دەپ حابارلايدى "ادىرنا" ۇلتتىق پورتالى.

سونداي-اق مەگاپوليس Booking.com پلاتفورماسىنىڭ 2025 جىلعى ترەندتى باعىتتار رەيتينگىنە كىرگەن.

قالانىڭ تۋريزم دەپارتامەنتىنىڭ مالىمەتىنشە، بيىلعى جىلدىڭ العاشقى جارتىسىندا الماتىعا كەلگەن تۋريستەر سانى ايتارلىقتاي ارتقان.

“ەكىنشى توقساندا قالاعا 1,1 ميلليوننان استام ادام كەلگەن. ونىڭ ىشىندە 323,5 مىڭى – شەتەلدىك تۋريستەر، ال 816,5 مىڭى – قازاقستاندىق ساياحاتشىلار. شەتەلدىك نارىقتار اراسىندا كوشباسشىلار – ءۇندىستان (56,2 مىڭ) جانە قىتاي (54,1 مىڭ، وتكەن جىلمەن سالىستىرعاندا +33,4%). سونىمەن قاتار تۇركيا، وڭتۇستىك كورەيا، اقش، ءباا جانە گەرمانيا ەلدەرىنەن دە تۋريستەر كوپتەپ كەلگەن”، – دەلىنگەن حابارلامادا.

تۋريزم باسقارماسىنىڭ حابارلاۋىنشا، حالىقارالىق تۋريستەر لەگىنىڭ ارتۋىنا اۋە قاتىناستارىنىڭ كەڭەيۋى مەن جاڭا باعىتتاردىڭ اشىلۋى وڭ اسەر ەتكەن.