اسكەردە قازا تاپقانداردىڭ تۋىستارى ۇكىمەت ۇيىنە بارىپ، ءوز تالاپتارىن بىلدىرگەندە دەپۋتات سوڭعى 5 جىلدا قازاقستان اسكەرىنەن جۇزدەگەن ساربازدىڭ ءومىرى ۇزىلگەنىن مالىمدەدى، دەپ حابارلايدى “ادىرنا” پورتالى.
«سوڭعى ءۇش جىلدا ەلىمىزدە 270 اسكەري قىزمەتكەر قازا تاپتى. ال سوڭعى ءتورت جىلدا اسكەردە 86 سۋيتسيد جاعدايى مەن 20 ءوز-وزىنە قول جۇمساۋ ارەكەتى تىركەلدى»، – دەگەن بولاتىن ءماجىلىس دەپۋتاتى نارتاي سارسەنعاليەۆ 2024 جىلدىڭ قىركۇيەگىندە رەسمي ستاتيستيكانى جاريالاي وتىرىپ.
سوڭعى ەكى جىلدا (2023–2025) قازاقستان ارمياسىندا بىرنەشە ءىرى جانە جەكە قايعىلى وقيعالار مەن جاراقات الۋ جاعدايلارى تىركەلدى، ولاردىڭ قاتارىندا:
- 2023 جىلدىڭ جەلتوقسانىندا ۇلتتىق ۇلان ساربازى ەربايان مۇحتار باس سۇيەك-مي جاراقاتىن الىپ، كوماعا ءتۇستى – ونىڭ جاعدايى ەڭ رەزونانستى وقيعالاردىڭ ءبىرى سانالادى;
- 2024 جىلعى 13 مامىردا اسكەري گوسپيتالدا سوققىدان كەيىن سارباز دوسىمجان ءسالىمجان قايتىس بولدى;
- 20 مامىردا اياگوزدە مەرزىمدى قىزمەتتەگى سارباز كوز جۇمدى. رەسمي سەبەپ رەتىندە «باكتەريالىق مەنينگيتتىڭ نايزاعاي ءتارىزدى ءتۇرى» اتالدى;
- 2024 جىلعى 7 قىركۇيەكتە ەلدىڭ ءار وڭىرىندەگى پوليگونداردا ەكى ساربازدىڭ ءولىمى تىركەلدى: بىرەۋى «ويماشى» پوليگونىندا لەيتەنانتتىڭ وعىنان، ەكىنشىسى ماڭعىستاۋ وبلىسىندا قارۋدى قولدانۋ ەرەجەسىن بۇزۋدان قازا تاپقان;
- 17 قىركۇيەكتە ارىس گارنيزونىندا كەلىسىمشارت نەگىزىندەگى اسكەري قىزمەتكەر باسىنا وق ءتيىپ جارالاندى. سەبەبى ء«وز-وزىنە قول جۇمساۋ ارەكەتى» دەپ كورسەتىلدى;
- 14 قازاندا قاراعاندى وبلىسىندا سارباز باسىنان وق جاراقاتىن الىپ قايتىس بولدى – سەبەپ رەتىندە سۋيتسيد اتالدى;
- سول 17 قىركۇيەكتە گۆاردەيسكي گارنيزونىندا مەرزىمدى قىزمەتتەگى سارباز ءولى كۇيىندە تابىلدى. سەبە رەتىندە تاعى دا سۋيتسيد دەلىنگەن;
- 2025 جىلعى 23 قىركۇيەكتە جەتىسۋ وبلىسىندا وقۋ-جاتتىعۋ كەزىندە سارباز قازا تاپتى. سەبەبى «قارۋدى قولدانۋ كەزىندە قاۋىپسىزدىك شارالارىن ساقتاماۋ» دەلىندى;
- 5 قازاندا الماتى وبلىسىندا ۇقك شەكارا قىزمەتىنىڭ قاتارداعى اسكەرى قايتىس بولدى – رەسمي سەبەپ: مەنينگوكوكتسەميا;
- 7 قازاندا ماڭعىستاۋ وبلىسىنداعى ۇقك شەكارا قىزمەتىندە مەرزىمدى سارباز قازا تاپتى – سەبەبى رەتىندە تەحنيكالىق جۇمىستار كەزىندە قاۋىپسىزدىك ەرەجەلەرىن بۇزۋ كورسەتىلگەن.
بۇل تەك ەڭ بەلگىلى وقيعالار عانا. دەپۋتات سارسەنعاليەۆ كەلتىرگەن جۇزدەگەن ءولىم جاعدايىنا سۇيەنسەك، اسكەردەگى كوپتەگەن قايعىلى وقيعالار قوعام نازارىنان تىس قالىپ وتىرعانى انىق.
بۇگىنگى دۇيسەنبى، 10 قاراشادا اسكەردە تۋىستارى، بالالالارى قازا تاپقان ءبىر توپ ادام استاناداعى ۇكىمەت ۇيىنە بارىپ ءوز تالاپتارىن بىلدىرگەن. ولار قازاقستاننىڭ قارۋلى كۇشتەرىندە رەفورما جۇرگىزۋدى، جاپا شەككەندەرگە ءادىل وتەماقى تولەۋدى تالاپ ەتتى. ولار اسكەري ىستەردى قايتادان قوزعاۋ، ءادىل تەرگەۋ جۇرگىزۋ ارنايى قوعامدىق كوميسسيا قۇرۋ، اسكەري بولىمدەردەگى بەينەباقىلاۋ جۇيەسىن جاڭارتۋ، ازاماتتاردى اسكەرگە 25 جاسقا تولعاننان كەيىن شاقىرۋ ءتارىزدى تالاپتارىن بىلدىرگەن.
ال دۇيسەنبى كۇنى تۇستەن كەيىن قورعانىس مينيسترلىگى ازاماتتاردىڭ شاعىمىن جەكە-جەكە قابىلداعانىن ايتىپ، اسكەردەگى قاۋىپسىزدىك كۇشەيتىلىپ جاتقانى تۋرالى مالىمدەمە تاراتتى.
ء"ومىرىڭدى ساقتا", "زاڭ جانە ءتارتىپ" جانە باسقا دا باعدارلامالار ىسكە اسىرىلىپ جاتىر. "وتباسىمەن بەينەقوڭىراۋ" سەرۆيسى ارقىلى ساربازداردىڭ اتا-اناسىمەن تۇراقتى تەلەفون بايلانىسى ۇيىمداستىرىلعان. كۇندەلىكتى جەكە قۇرامنىڭ دەنە ءبىتىمى تەكسەرىلەدى. كازارمالار مەن قىزمەتتەن بەرىلگەن ءۇي-جايلاردا بەينەكامەرالار ورناتىلعان. ءسۋيتسيدتىڭ الدىن الۋ جانە قارۋعا قول جەتكىزۋدى باقىلاۋ ماقساتىندا جاساندى ينتەللەكت ەلەمەنتتەرى بار بەينەباقىلاۋ جۇيەسى ەنگىزىلىپ جاتىر", - دەپ جازىلعان قازاقستاننىڭ قورعانىس مينيسترلىگى تاراتقان مالىمدەمەدە.
