گونكونگ قالاسىندا حالىقارالىق ات سپورتى فەدەراتسياسىنىڭ (FEI) باس اسسامبلەياسى اياقتالدى. بۇل — الەمدىك ات سپورتى سالاسىنىڭ دامۋ باعىتىن ايقىندايتىن شەشىمدەر قابىلداناتىن جىل سايىنعى جاھاندىق فورۋم. بيىل اسسامبلەيا جۇمىسىنا FEI-ءدىڭ 132 مۇشە ەلىنىڭ ىشىنەن 87 ۇلتتىق فەدەراتسيانىڭ دەلەگاتسيالارى قاتىستى. قازاقستان 1993 جىلدان بەرى FEI مۇشەسى بولىپ تابىلادى جانە وسى ۋاقىت بويى اسسامبلەيا جۇمىسىنا تۇراقتى تۇردە قاتىسىپ كەلەدى.
حالىقارالىق ات سپورتى فەدەراتسياسى (FEI) 1921 جىلى قۇرىلعان جانە ءجۇز جىلدان استام ۋاقىت بويى ات سپورتىنا ارنالعان حالىقارالىق ەرەجەلەر مەن جارىستار جۇيەسىن قالىپتاستىرىپ كەلەدى. اسسامبلەيانىڭ العاشقى كۇندەرىندە قازاقستان دەلەگاتسياسى كونكۋر مەن اتپەن مانەرلەپ ءجۇرۋ ەرەجەلەرىنە وزگەرىستەر ەنگىزۋ، وليمپيادا ويىندارىنا جانە 2026 جىلى ااحەن قالاسىندا وتەتىن FEI الەم چەمپيوناتىنا ىرىكتەۋ فورماتى سياقتى ماسەلەلەردى تالقىلاۋعا قاتىستى. سونداي-اق سپورتشىلاردىڭ قاۋىپسىزدىگى مەن جىلقىلاردىڭ ءال-اۋقاتى، تسيفرلىق ۆەتەريناريالىق پاسپورتتى ەنگىزۋ جانە اشىقتىق پەن كاسىبيلىككە باعىتتالعان FEI-ءدىڭ جاڭا باسقارۋ ۇلگىسى قارالدى. 12 جىل بويى ۇيىمدى باسقارعان FEI پرەزيدەنتى ينگمار دە ۆوس وكىلەتتىگىن اياقتاپ، حالىقارالىق وليمپيادالىق كوميتەتتەگى جاڭا قىزمەتكە اۋىسادى.
6–7 قاراشادا پلەنارلىق وتىرىستار مەن داۋىس بەرۋلەر ءوتتى. قازاقستان 2026 جىلى FEI اياسىندا ءۇش حالىقارالىق جارىس وتكىزۋ قۇقىعىن الدى: دۇنيەجۇزىلىك كۋبوك كەزەڭى، FEI World Cup Challenge فينالى جانە ەۋرازيالىق ليگا فينالى. بۇل قازاقستاندىق سپورتشىلارعا العاش رەت حالىقارالىق رەيتينگتىك ۇپايلاردى ءوز ەلىندە جيناۋعا مۇمكىندىك بەرەدى، شەتەلدىك جارىستارعا قاتىسۋ شىعىندارىن ازايتادى جانە تۇراقتى حالىقارالىق جارىس تاجىريبەسىن قامتاماسىز ەتەدى.
قازاقستان ات سپورتى فەدەراتسياسى پرەزيدەنتىنىڭ كەڭەسشىسى سەرگەي بۋيكەۆيچ ءوز سوزىندە:
«دۇنيەجۇزىلىك كۋبوك كەزەڭىن، FEI World Cup Challenge فينالىن جانە 2026 جىلى ااحەندەگى FEI الەم چەمپيوناتىنا ىرىكتەۋ ءتۋرنيرىن وتكىزۋ قۇقىعى — قازاقستاندا ات سپورتىنىڭ جۇيەلى دامۋىنا جاسالعان ماڭىزدى قادام. ەندى ءبىزدىڭ سپورتشىلار ەلدەن شىقپاي-اق حالىقارالىق رەيتينگتىك ۇپاي جيناي الادى. جاس شاباندوزدار ءۇشىن FEI World Cup Challenge الەمدىك فينالىنا قاتىسۋ مۇمكىندىگى اشىلادى. باستى ماقساتىمىز — جارىستاردى جوعارى دەڭگەيدە ۇيىمداستىرىپ، وسى مۇمكىندىكتى سپورتشىلاردى دايىنداۋ ءۇشىن بارىنشا ءتيىمدى پايدالانۋ.»
اسسامبلەيا بارىسىندا FEI پرەزيدەنتى ينگمار دە ۆوس قازاقستاندا جارىستار وتكىزۋ فەدەراتسيانىڭ حالىقارالىق تۋرنيرلەر گەوگرافياسىن كەڭەيتۋ جانە جاڭا ەلدەردى جاھاندىق سپورتتىق كۇنتىزبەگە تارتۋ ماقساتتارىنا سايكەس كەلەتىنىن اتاپ ءوتتى، وسىلايشا بۇل باستامانى قولدايتىنىن ءبىلدىردى.
قازاقستان اسسامبلەيا بارىسىندا جاتتىقتىرۋشىلاردى دايارلاۋ جانە سپورتشىلاردى وقىتۋ جۇيەسىن جەتىلدىرۋ بويىنشا جوبالاردى تانىستىردى. FEI جانە Olympic Solidarity Coaching System باعدارلاماسىن ەنگىزۋ جانە سپورتشىلاردى حالىقارالىق دەڭگەيدە سەرتيفيكاتتاۋ جونىندەگى پيلوتتىق جوبانى قولدادى.
اسسامبلەيا جۇمىسى Longines FEI Awards حالىقارالىق ماراپاتتاۋ راسىمىمەن اياقتالدى. شارا بارىسىندا جىل قورىتىندىسى شىعارىلىپ، سپورتشىلاردىڭ، جاتتىقتىرۋشىلاردىڭ، ات كۇتۋشىلەردىڭ (groom) جانە جارىس ۇيىمداستىرۋشىلارىنىڭ جەتىستىكتەرى اتاپ ءوتىلدى.
