قىتايدىڭ تسزيانسۋ پروۆينتسياسىنداعى چجانتسزياگان قالاسىندا ورنالاسقان كونە يۋنتسين عيباداتحاناسىندا 12 قاراشا كۇنى كۇشتى ءورت شىقتى. وقيعا تۋرالى اقپاراتتى Free Press Journal جاريالادى، دەپ حابارلايدى “ادىرنا”.
1500 جىلدىق تاريحى بار بۋدديستىك ساۋلەت تۋىندىسى سانالاتىن عيباداتحانادا شىققان ءورت تۇرعىندار اراسىندا قاتتى الاڭداۋشىلىق تۋدىردى. كۋاگەرلەر تۇسىرگەن ۆيدەولاردا عيباداتحانانىڭ ءۇستىن قالىڭ قارا ءتۇتىن باسىپ، جالىننىڭ كوپقاباتتى پاۆيلوندى شارپىعانى انىق كورىنەدى. وت اسىرەسە ادەمى ورنەكتەلگەن اعاش شاتىرلاردى تۇگەلگە جۋىق جالماعان.
جەرگىلىكتى بيلىك وكىلدەرىنىڭ ايتۋىنشا، ءورت دەر كەزىندە باقىلاۋعا الىنىپ، زارداپ شەككەندەر تۋرالى اقپارات تۇسكەن جوق. الدىن الا دەرەكتەرگە سايكەس، ءتىلسىز جاۋ عيباداتحانا اۋماعىنداعى ەجەلگى ستيلدە سالىنعان كوشىرمە عيماراتتان باستالعان.
بۇعان دەيىن ءدال وسىنداي جاعداي بيىلعى جىلدىڭ شىلدە ايىندا بەلارۋس ەلىندە دە بولعان ەدى. برەست ماڭىنداعى ستەپانكي اگروقالاشىعىندا بىرنەشە عاسىرلىق تاريحى بار ارحانگەل ميحايل شىركەۋى تۇگەلدەي ورتكە ورانعان.
يۋنتسين عيباداتحاناسى – قىتايداعى ماڭىزدى ءدىني جانە تاريحي نىسانداردىڭ ءبىرى. ءورت سالدارىنان كەلگەن زالال مەن عيماراتتى قالپىنا كەلتىرۋ جۇمىستارىنىڭ ناقتى كولەمى الداعى ۋاقىتتا انىقتالماق.
