تۇركيانىڭ اۋىل جانە ورمان شارۋاشىلىعى مينيسترلىگىنە قاراستى ورمان شارۋاشىلىعى باس باسقارماسىنا تيەسىلى ورتكە قارسى ۇشاق حورۆاتيا اۋماعىندا اپاتقا ۇشىرادى. بۇل تۋرالى Report جەرگىلىكتى باق-قا سىلتەمە جاساپ جازدى، دەپ حابارلايدى “ادىرنا”.
مينيستر يبراگيم يۋماكلىنىڭ ايتۋىنشا، راداردان جوعالعان ۇشاقتىڭ سىنىقتارى سەن قالاسىنىڭ ماڭىنان تابىلعان. اپات سالدارىنان اۋە كەمەسىنىڭ ۇشقىشى قازا تاپقان.
بۇعان دەيىن مينيسترلىك ۇشاقپەن بايلانىس ۇزىلگەنىن حابارلاعان ەدى. رەسمي مالىمەتكە سايكەس، AT802 ماركالى ەكى ورتكە قارسى ۇشاق تەحنيكالىق قىزمەت كورسەتۋ ءۇشىن 12 قاراشا كۇنى تاڭەرتەڭ چاناككالەدەن حورۆاتيانىڭ زاگرەب قالاسىنا ۇشقان. الايدا قولايسىز اۋا رايىنا بايلانىستى ولار ريەكا اۋەجايىنا قونۋعا ءماجبۇر بولعان.
13 قاراشا كۇنى ساعات 17:38-دە (تۇركيا ۋاقىتىمەن) قوس ۇشاق تاعى دا زاگرەبكە قاراي اۋەگە كوتەرىلگەنىمەن، قايتا ناشارلاعان اۋا رايى سالدارىنان كەرى ورالۋعا شەشىم قابىلداعان. ۇشاقتاردىڭ ءبىرى ريەكاعا امان-ەسەن قونعان، ال ەكىنشىسىمەن 18:25-تە بايلانىس تولىق جوعالعان.
تۇركيانىڭ اۋىل جانە ورمان شارۋاشىلىعى مينيسترلىگى حورۆاتيا بيلىگىمەن بىرلەسىپ، ىزدەستىرۋ-قۇتقارۋ جۇمىستارىن باستاعانىن مالىمدەگەن ەدى. كەيىننەن ۇشاقتىڭ قۇلاعانى جانە پيلوتتىڭ قازا تاپقانى رەسمي تۇردە راستالدى.
بەكارىس جانداۋلەت
