Vietnam Airlines كومپانياسى نويباي حالىقارالىق اۋەجايىندا ەكى ۇشاقتىڭ سوقتىعىسۋىنا بايلانىستى ءتورت ۇشقىشتى ۋاقىتشا رەيستەردەن شەتتەتتى، دەپ حابارلايدى "ادىرنا" ۇلتتىق پورتالى Báo Dân trí باسىلىمىنا سىلتەمە جاساپ.
وقيعا 27 ماۋسىم كۇنى ساعات 14:23-تە نويباي اۋەجايىنىڭ S جانە S3 رۋلەج جولدارىنىڭ قيىلىسىندا بولعان. Airbus A321 ۇشاعى VN1804 رەيسىمەن حانويدان دەنبەنگە باعىت الۋعا دايىندالىپ، ۇشۋ جولاعىندا كۇتىپ تۇرعان. سول ساتتە Boeing 787 ۇشاعى VN7205 رەيسىمەن حانويدان حوشيمينگە بەت العان. رۋلەج كەزىندە Boeing 787 ۇشاعىنىڭ وڭ قاناتى Airbus A321 ۇشاعىنىڭ تىك قۇيرىعىنا سوعىلعان.
وقيعا سالدارىنان ەكى ۇشاق تا زاقىمدانىپ، ۇشاق بولشەكتەرىنىڭ قالدىقتارى جەرگە شاشىلعان. 386 جولاۋشى قاۋىپسىز جەرگە جەتكىزىلدى.
اۋەجاي اكىمشىلىگى ۇشاقتاردى قاۋىپسىز ايماققا سۇيرەپ اپارىپ، جولاقتى تازالاۋ جۇمىستارىن جۇرگىزدى.
Vietnam Airlines اتالعان وقيعاعا بايلانىستى Boeing 787 جانە Airbus A321 ۇشاقتارىن باسقارعان ءتورت ۇشقىشتى ۋاقىتشا رەيستەردەن شەتتەتتى. ۇشقىشتار تەرگەۋ اياقتالعانشا ۇشۋعا جىبەرىلمەيدى.
كومپانيا وقيعانىڭ سەبەپتەرىن انىقتاۋ ءۇشىن تاۋەلسىز تەرگەۋ توبىن قۇردى. ول ۆەتنامنىڭ ازاماتتىق اۆياتسيا باسقارماسىمەن بىرلەسىپ جۇمىس ىستەۋدە. اۋە كومپانياسى مەن اۆياتسيالىق ورگاندار ماسەلەنىڭ ءمان-جايىن انىقتاپ جاتىر.
نويباي حالىقارالىق اۋەجايىنىڭ حابارلاۋىنشا، وقيعا بولعان ساتتە اۋا رايى قولايلى بولعان.
