ورتالىق ازيا ەلدەرى ۋنيۆەرسيتەت ديپلومدارىن ءوزارا جارامدى دەپ تانۋ تۋرالى كەلىسىمگە كەلدى. قازاقستان ۇكىمەتى ءتيىستى قاۋلىعا قول قويدى، دەپ حابارلايدى «ادىرنا» ءتىلشىسى.
«ۇكىمەت قىرعىزستان مينيسترلەر كابينەتى، تاجىكستان، تۇرىكمەنستان جانە وزبەكستان ۇكىمەتتەرى اراسىنداعى جوعارى ءبىلىم تۋرالى قۇجاتتاردى ءوزارا تانۋ جونىندەگى كەلىسىمدى ماقۇلدادى.تاراپتار ءوز مەملەكەتتەرىنىڭ ۇلتتىق زاڭناماسىنا سايكەس اككرەديتتەلگەن جوعارى وقۋ ورىندارى بەرگەن جوعارى ءبىلىم تۋرالى قۇجاتتاردى (ديپلومداردى) مويىندايدى»,- دەلىنگەن حابارلامادا.
سونداي-اق قاۋلىدا جوعارى ءبىلىم تۋرالى قۇجاتتاردى تانۋ ورتالىق ازيانىڭ باسقا رەسپۋبليكاسىندا جۇمىسقا ورنالاسۋ، تاعىلىمدامادان ءوتۋ نەمەسە وقۋىن جالعاستىرۋ كەزىندە قولدانىلاتىنى ناقتىلانعان. ەگەر ديپلومعا قويىلاتىن تالاپتاردا ەلەۋلى ايىرماشىلىقتار انىقتالعان جاعدايدا باسقا مەملەكەتتىڭ ديپلومىن جارامدى دەپ تانىلمايدى.
قۇجاتتا باسقا دا ەرەكشەلىكتەر كورسەتىلگەن. ماسەلەن، وزبەكستان، قىرعىزستان، تاجىكستان جانە تۇرىكمەنستان ەلدەرى كەز كەلگەن جوعارى وقۋ ورنىنىڭ ديپلومدارىن مويىنداسا، قازاقستان وزگە تاراپ-مەملەكەتتەردىڭ ديپلومدارىن تەك الەمدىك QS, THE جانە ARWU رەيتينگتەرىنىڭ Top–1000 قاتارىنا كىرەتىن وقۋ ورىندارى بەرگەن جاعدايدا عانا تانيدى.
ورتالىق ازيانىڭ باسقا رەسپۋبليكالارى بۇل كەلىسىمدى قازاقستان سياقتى رەسمي تۇردە ماقۇلداعانى تۋرالى اقپارات جوق. مىسالى قىرعىزستاننىڭ عىلىم، جوعارى ءبىلىم جانە يننوۆاتسيالار مينيسترلىگى قۇجاتتىڭ ءالى دە ىشكى مەملەكەتتىك كەلىسۋ راسىمدەرىنەن وتپەگەنىن جەتكىزدى.
