Ortalyq Aziia elderı universitet diplomdaryn özara jaramdy dep tanu turaly kelısımge keldı. Qazaqstan ükımetı tiıstı qaulyǧa qol qoidy, dep habarlaidy «Adyrna» tılşısı.
«Ükımet Qyrǧyzstan ministrler kabinetı, Täjıkstan, Türıkmenstan jäne Özbekstan ükımetterı arasyndaǧy joǧary bılım turaly qūjattardy özara tanu jönındegı kelısımdı maqūldady.Taraptar öz memleketterınıŋ ūlttyq zaŋnamasyna säikes akkredittelgen joǧary oqu oryndary bergen joǧary bılım turaly qūjattardy (diplomdardy) moiyndaidy»,- delıngen habarlamada.
Sondai-aq qaulyda joǧary bılım turaly qūjattardy tanu Ortalyq Aziianyŋ basqa respublikasynda jūmysqa ornalasu, taǧylymdamadan ötu nemese oquyn jalǧastyru kezınde qoldanylatyny naqtylanǧan. Eger diplomǧa qoiylatyn talaptarda eleulı aiyrmaşylyqtar anyqtalǧan jaǧdaida basqa memlekettıŋ diplomyn jaramdy dep tanylmaidy.
Qūjatta basqa da erekşelıkter körsetılgen. Mäselen, Özbekstan, Qyrǧyzstan, Täjıkstan jäne Türıkmenstan elderı kez kelgen joǧary oqu ornynyŋ diplomdaryn moiyndasa, Qazaqstan özge tarap-memleketterdıŋ diplomdaryn tek älemdık QS, THE jäne ARWU reitingterınıŋ Top–1000 qataryna kıretın oqu oryndary bergen jaǧdaida ǧana tanidy.
Ortalyq Aziianyŋ basqa respublikalary būl kelısımdı Qazaqstan siiaqty resmi türde maqūldaǧany turaly aqparat joq. Mysaly Qyrǧyzstannyŋ Ǧylym, joǧary bılım jäne innovasiialar ministrlıgı qūjattyŋ älı de ışkı memlekettık kelısu räsımderınen ötpegenın jetkızdı.
