الماتى قالاسىندا ەر ادام اۋلادا ويناپ جۇرگەن كىشكەنتاي بالانى بار كۇشىمەن تەۋىپ قۇلاتتى. ەر ادام قاماۋعا الىندى، دەپ حابارلايدى "ادىرنا".
وقيعا الاتاۋ اۋدانىنداعى «كاسپي» تۇرعىن ءۇي كەشەنىنىڭ اۋلاسىندا بولعان. جەلىدە تاراعان ۆيدەوعا نازار اۋدارساق، ەر ادام بالالار اراسىنداعى جانجالعا ارالاسىپ، جۇگىرىپ كەلىپ، كىشكەنتاي بالانى بار كۇشىمەن تەۋىپ جىبەرگەن. زارداپ شەككەن ۇل بالا مي شايقالۋ دياگنوزىمەن اۋرۋحاناعا ءتۇستى.
اتا-اناسىنىڭ ايتۋىنشا، ۋچاسكەلىك پوليتسەي ەر ادام بالانىڭ ەمدەۋ شىعىندارىن وتەسە، ماسەلەنى «بەيبىت جولمەن» شەشۋدى ۇسىنعان. زارداپ شەككەن بالانىڭ وتباسى ءادىل تەرگەۋ جۇرگىزىلىپ، كىنالى ەر ادامنىڭ جازالانۋىن تالاپ ەتىپ وتىر.
بالا قۇقىقتارى جونىندەگى ۋاكىل دينارا زاكيەۆا وقيعاعا قاتىستى رەسمي پىكىر ءبىلدىردى.
«قىلمىستىق ءىس قوزعالدى. قاجەتتى كومەكتىڭ ءبارى كورسەتىلەدى. وقيعا الماتى قالاسىنىڭ بالا قۇقىقتارى جونىندەگى ۋاكىلىنىڭ باقىلاۋىندا»، – دەدى دينارا زاكيەۆا.
اتالعان دەرەك بويىنشا الاتاۋ اۋداندىق پوليتسيا باسقارماسى قىلمىستىق ءىس قوزعادى.
«كۇدىكتى جەدەل تۇردە انىقتالىپ، ۇستالدى جانە ۋاقىتشا ۇستاۋ يزولياتورىنا قاماۋعا الىندى.
پوليتسيانىڭ ۇستانىمى ايقىن: بالالارعا قاتىستى مۇنداي ارەكەتتەرگە جول بەرىلمەيدى جانە ولار زاڭ اياسىندا قاتاڭ تۇردە توقتاتىلادى. قازىرگى ۋاقىتتا وقيعانىڭ بارلىق ءمان-جايى انىقتالۋدا. تەرگەۋ بارىسى پوليتسيا دەپارتامەنتى باسشىلىعىنىڭ باقىلاۋىندا»، – دەلىنگەن قالالىق پد حابارلاماسىندا.
