تاۋەلسىزدىك كۇنى قارساڭىندا الماتىدا بۇقارالىق سپورتتى دامىتۋعا، اۋلا باستامالارىن قولداۋعا، ءار جاستاعى تۇرعىنداردى بەلسەندى ءومىر سالتىنا تارتۋعا، سونداي-اق قالانىڭ ءار اۋدانىندا بىرىڭعاي دوستىق سپورت ورتاسىن قالىپتاستىرۋعا باعىتتالعان «سپورت – دوستىق الاڭى» قالالىق سپورتتىق جوباسى جۇزەگە اسىرىلىپ جاتىر.
جوبا ءتۇرلى الاڭداردى قامتىپ، فلەشموبتار، تۋرنيرلەر، وتباسى جارىستارى مەن الەۋمەتتىك-سپورتتىق اكتسيالاردى بىرىكتىرەدى.
وتكەن دەمالىس كۇندەرى الماتىنىڭ بىرنەشە اۋدانىندا اۋقىمدى ءىس-شارالار ءوتتى.
مەدەۋ اۋدانىندا جوبا اياسىندا جانە «تازا قازاقستان» رەسپۋبليكالىق اكتسياسىمەن بىرلەسە ءىرى سپورتتىق ەكو-فلەشموب ۇيىمداستىرىلدى. 700-دەن استام تۇرعىن — جاستار، وقۋشىلار، ستۋدەنتتەر، اۋدان ارداگەرلەرى مەن ۆولونتەرلەر — سپورتتىق ويىندار، بي فلەشموبتارى جانە ءتۇرلى بەلسەندى باعدارلامالارعا قاتىستى.
المالى اۋدانىنداعى گاندي اتىنداعى ساياباقتا سپورتتىق وتباسىلىق ەستافەتا ءوتتى. تۋرنيرگە اتا-انالار مەن ولاردىڭ بالالارى قاتىسىپ، ۇيىمشىلدىقتى، ەنەرگيانى جانە ناعىز كوماندا رۋحىن كورسەتتى. ەستافەتالار جارقىن، شيەلەنىستى جانە كوڭىلدى ءوتتى. ءبىرىنشى ورىندى اسكاروۆتار وتباسى يەلەندى. بارلىق قاتىسۋشىلارعا العىس حاتتار مەن ەستەلىك سىيلىقتار تابىستالدى.
اۋەزوۆ اۋدانىندا اۋقىمدى سپارتاكيادا ۇيىمداستىرىلدى. قاتىسۋشىلار اسىق اتۋ، دارتس، شاحمات، ارقان تارتۋ جانە تارتىستى ۆولەيبول ماتچتارى سياقتى بىرنەشە سپورت تۇرلەرىنەن كۇش سىناستى.
الاتاۋ اۋدانىنىڭ نۇركەنت ىقشاماۋدانىندا «سپورت – دوستىق الاڭى» جوباسى اياسىندا اشىق فۋتبول جاتتىعۋى ءوتتى. ءىس-شارادا كاسىبي جاتتىقتىرۋشىلار بالالار ءۇشىن بەلسەندى، سەرپىندى جانە شابىتتاندىراتىن اتموسفەرا قالىپتاستىردى. جاس قاتىسۋشىلار قىزۋ قاتىسىپ، جارقىن قىزدىرۋ-فلەشموب ورىنداپ، ويىننىڭ نەگىزگى ەلەمەنتتەرىن پىسىقتاپ، كوماندالىق تاپسىرمالارعا قاتىستى.
بوستاندىق اۋدانىندا ءبىرىنشى پرەزيدەنت ساياباعىندا جوبا اياسىندا ۇلتتىق سپورت تۇرلەرىنەن جارىستار ءوتتى. جاستار ارقان تارتۋ، لاڭگى، اسىق اتۋ، ارمرەستلينگ جانە قوي كوتەرۋ بويىنشا قىزىعۋشىلىقپەن باق سىنادى.
تۇركسىب اۋدانىندا بالالار مەن جاستار جەكپە-جەك تۇرلەرى بويىنشا جارىسىپ، تۋرنيككە تارتىلىپ، قولدى جەرگە تىرەپ جاتتىعۋ جاسادى.
جوبا تۇرعىندار تاراپىنان وڭ پىكىرلەرگە يە بولىپ، الداعى دەمالىس كۇندەرى دە جالعاسىن تابادى.
6 جەلتوقساندا گاندي اتىنداعى ساياباق پەن ناۋرىزباي اۋدانى امفيتەاترىندا ءتۇرلى ەستافەتالار، جونگلەرلىك جانە دوپ لاقتىرۋ سايىستارى وتەدى. ال اينابۇلاق-2 ىقشاماۋدانىنداعى ارباتتا باسكەتبول لاقتىرۋ جانە ارمرەستلينگ بويىنشا جارىستار ۇيىمداستىرىلادى.
7 جەلتوقساندا ايتەكە بي كوشەسىندەگى سكۆەردە پارك بويىنشا جۇگىرۋ، قىزدىرۋ جاتتىعۋلارى جانە «ماۋسىمارالىق كەزەڭدە قالاي جاتتىققان دۇرىس؟» تاقىرىبىندا ءدارىس وتكىزىلەدى. جاس قانات ىقشاماۋدانىندا دزيۋدو بويىنشا كورسەتىلىمدەر، جاتتىعۋلار، ارمرەستلينگ، ارقان تارتۋ، شاحمات ءتۋرنيرى، ۇزىندىققا سەكىرۋ، شىعارماشىلىق نومىرلەر ۇيىمداستىرىلادى.
«سپورت – دوستىق الاڭى» جوباسى اۋدانداردى بىرىكتىرىپ، سپورت مادەنيەتىن نىعايتۋعا ىقپال ەتەتىنىن اتاپ وتكەن ءجون. جوبانىڭ ورتاق يدەياسى ارقىلى قالانىڭ ءار اۋدانىنداعى تۇرعىندار سپورت توڭىرەگىندە بىرىگىپ، بەلسەندى ۋاقىت وتكىزۋگە، تاجىريبە الماسۋعا جانە دەنە دايىندىعىن جەتىلدىرۋگە مۇمكىندىك الادى.
جوبا جاستار اراسىندا سەنىمدىلىك، شىدامدىلىق، داستۇرگە قۇرمەت جانە سالاۋاتتى ءومىر سالتىنا بەرىلگەندىك قاسيەتتەرىن قالىپتاستىرۋعا دا ىقپال ەتەدى.
الماتى «سپورت – دوستىق الاڭى» جوباسىن ودان ءارى جالعاستىرىپ، بۇقارالىق سپورتتى دامىتۋ جانە قالا تۇرعىندارى ءۇشىن بەلسەندى ءارى سالاۋاتتى ءومىر سالتىنا جاعداي جاساۋدى جالعاستىرادى. الدا — جاڭا تۋرنيرلەر، فلەشموبتار، جارىستار جانە قالانىڭ بىرىڭعاي سپورت مادەنيەتىنىڭ ءبىر بولىگىنە اينالاتىن الەۋمەتتىك باستامالار.
