Almaty SuperSki جوباسىن ىسكە اسىرۋ كەزىندە تاريحي-مادەني مۇرا نىساندارىن ساقتاۋ ماسەلەسى دە نازاردان تىس قالمايدى. قۇرىلىس جۇمىستارى باستالماس بۇرىن جوبا اۋماعىندا ارحەولوگيالىق زەرتتەۋ جۇرگىزىلىپ، تاريحي نىساندار انىقتالعان. بۇل تۋرالى ەرلان ءامىروۆ مالىمدەدى.
ونىڭ ايتۋىنشا، قۇرىلىسقا ارنالعان اۋماقتا الدىن الا ارحەولوگيالىق زەرتتەۋ جۇرگىزۋ – قالىپتاسقان حالىقارالىق تاجىريبەنىڭ ءبىر بولىگى. مۇنداي جۇمىستاردىڭ نەگىزگى ماقساتى – جەر قازۋ جۇمىستارى باستالعانعا دەيىن تاريحي-مادەني مۇرا نىساندارىن انىقتاۋ جانە ولاردى قورعاۋ شارالارىن بەلگىلەۋ.
– جوبانى ىسكە اسىرۋ اياسىندا ستاندارتتى تاجىريبەگە سايكەس الدىن الا ارحەولوگيالىق جۇمىستار جۇرگىزىلدى. ونىڭ بارىسىندا تاريحي-مادەني مۇرا نىساندارىن انىقتاۋ جۇمىستارى اتقارىلدى. ارحەولوگيا ينستيتۋتى وسى زەرتتەۋلەردى جۇرگىزىپ، قۇرىلىس اۋماعىندا ورنالاسقان نىسانداردى انىقتادى. ولارعا قاتىستى ءتيىستى تەحنيكالىق قۇجاتتاما ازىرلەنىپ، تاپسىرىس بەرۋشىگە تاپسىرىلدى. بۇل ماتەريالدار جوبادا ەسكەرىلدى، – دەدى ەرلان ءامىروۆ.
سپيكەردىڭ سوزىنشە، قازىرگى ۋاقىتتا قۇرىلىس جۇمىستارى انىقتالعان تاريحي نىسانداردىڭ قورعاۋ ايماقتارىن ەسكەرە وتىرىپ جۇرگىزىلىپ جاتىر.
سونىمەن قاتار، كامپۋس جوباسى اياسىندا قۇرىلىس اۋماعىمەن قاباتتاساتىن ارحەولوگيالىق نىساندار تولىق زەرتتەلگەن. زەرتتەۋ قورىتىندىسى بويىنشا ءتيىستى قۇجاتتار ازىرلەنىپ، قازىر قورىتىندى ەسەپ قالىپتاستىرىلىپ جاتىر.
زاڭناما تالاپتارىنا سايكەس ساقتالۋى ءتيىس نىساندار ءۇشىن ارنايى قورعاۋ ايماقتارى بەكىتىلگەن. ولاردىڭ اۋماعىنا ارنايى بەلگىلەر قويىلىپ، بۇل جەرلەردە تاريحي مۇراعا زيان كەلتىرۋدىڭ الدىن الۋ شارالارى قاراستىرىلعان.
– قۇرىلىس اۋماعىمەن قاباتتاساتىن نىساندار تولىق زەرتتەلدى. زاڭناماعا سايكەس ساقتالۋى ءتيىس نىساندار بويىنشا ءتيىستى شارالار قابىلداندى. قورعاۋ ايماقتارى ازىرلەنىپ، ارنايى بەلگىلەرمەن بەلگىلەندى. بۇل ىقتيمال بۇزۋشىلىقتاردىڭ الدىن الۋعا مۇمكىندىك بەرەدى، – دەدى سپيكەر.
ونىڭ سوزىنشە، بۇل جۇمىستا ارحەولوگيا ينستيتۋتىنىڭ مىندەتى – جوبانىڭ تاريحي-مادەني مۇرانى قورعاۋ جانە پايدالانۋ سالاسىنداعى قولدانىستاعى زاڭناما تالاپتارىنا سايكەستىگىن قامتاماسىز ەتۋ.
ەرلان ءامىروۆ ارحەولوگيالىق زەرتتەۋلەردىڭ تاعى ءبىر ماڭىزدى ءمانى – قۇرىلىس جۇرگىزىلەتىن اۋماقتاردا تاريحي مۇرانى ساقتاۋعا مۇمكىندىك بەرۋ ەكەنىن اتاپ ءوتتى. ونىڭ پىكىرىنشە، بۇل ءتاسىل حالىقارالىق ارحەولوگيالىق تاجىريبەدە دە كەڭىنەن قولدانىلادى.
ياعني، SuperSki جوباسى اياسىندا اۋماقتى يگەرۋ مەن تاريحي-مادەني مۇرانى ساقتاۋ ماسەلەلەرى قاتار قاراستىرىلىپ وتىر. قۇرىلىس باستالعانعا دەيىن انىقتالعان نىسانداردىڭ قورعاۋ ايماقتارى بەلگىلەنىپ، ولاردىڭ ساقتالۋىنا باعىتتالعان شارالار قابىلدانعان.
