يرلاندياعا رەسمي ساپارمەن بارعان ۋكراينا پرەزيدەنتى ۆلاديمير زەلەنسكيدىڭ ۇشاعىن بەلگىسىز ۇشقىشسىز اپپاراتتار (دروندار) باقىلاعان. بۇل اقپاراتتى 5 جەلتوقساندا ۋكراينا پرەزيدەنتى كەڭسەسىنىڭ كوممۋنيكاتسيالار جونىندەگى كەڭەسشىسى دميتري ليتۆين راستادى, دەپ حابارلايدى "ادىرنا".
ءليتۆيننىڭ ايتۋىنشا، درونداردىڭ پايدا بولۋى ساپاردىڭ وتۋىنە اسەر ەتپەگەن.
«قاۋىپسىزدىككە قابىلداۋشى تاراپ جاۋاپ بەرەدى. ولاردىڭ دەرەكتەرى بويىنشا مۇنداي دروندار بولعان، بىراق ولار كىرۋگە اسەر ەتپەدى جانە جوسپارعا وزگەرىس ەنگىزۋگە سەبەپ بولمادى»، – دەدى ول.
يرلانديالىق The Journal باسىلىمى 1 جەلتوقساندا دۋبلينگە قونۋ الدىندا زەلەنسكيدىڭ ۇشاعىنا ءتورت بەلگىسىز درون جاقىنداعانىن حابارلادى.
باسىلىم دەرەگىنشە، دروندار ءدۋبليننىڭ سولتۇستىك-شىعىسىنان كوتەرىلگەن، پرەزيدەنتتىك ۇشاققا جاقىن ۇشىپ وتكەن جانە كەيىن تەڭىزدە جاسىرىن شىعارىلعان اسكەري كەمە ۇستىندە ءبىراز ۋاقىت قالىقتاعان.
وقيعا كەزىندە پۆو قۇرالدارى پايدالانىلماعان، ال اسكەري كەمەنىڭ قارۋى درونداردى اتىپ تۇسىرۋگە جەتكىلىكسىز بولعان. اۋە پاترۋلدىك جويعىشتار دا ارالاسپاعان.
The Irish Times ءوز ماتەريالىندا بەس دروندى انىقتاعانىن حابارلادى. باسىلىم دەرەگى بويىنشا، ولار زەلەنسكيدىڭ اۋە مارشرۋتىنا جاقىن ماڭدا پايدا بولعان، الايدا ۇشاق جوسپارلانعان ۋاقىتتان ەرتە كەلگەن.
پوليتسيا درونداردىڭ جەردەن نەمەسە تەڭىزدەگى كەمەدەن ۇشىرىلىپ-ۇشىرىلماعانىن انىقتاۋعا تىرىسۋدا. تەرگەۋگە ەلدىڭ ادىلەت جانە قورعانىس مينيسترلىكتەرى ارالاسقان.
كۋاگەرلەر درونداردىڭ اسكەري تيپكە ۇقساس بولعانىن ايتقان.
زەلەنسكيدىڭ يرلانديالىق باسشىلىقپەن كەزدەسۋلەرى جاقسى وتكەن. دۋبلين اۋەجايى ماڭىندا ساپار كەزىندە ۇشۋ ايماعى ۋاقىتشا جابىلعان.
كۇزدەن بەرى ەۋروپانىڭ بىرنەشە ەلىندە: دانيا، شۆەتسيا، گەرمانيا، بەلگيا، پولشا، رۋمىنيا اۋەجايلارى مەن ناتو نىساندارى ماڭىندا بەلگىسىز دروندار بايقالعان.
ۋكراينا پرەزيدەنتى بۇرىن وسىنداي پروۆوكاتسيالار ءۇشىن رەسەيدى ايىپتاپ، درونداردى ىسكە قوسۋ ءۇشىن "كولەڭكەلى فلوت" تانكەرلەرى قولدانىلاتىنىن مالىمدەگەن.
ول باتىس ەلدەرىن، بالتىق جانە باسقا تەڭىزدەردى رەسەيلىك كەمەلەر ءۇشىن جابۋعا، قاتاڭ سانكتسيالار ەنگىزۋگە شاقىردى.
