باتىس قازاقستان وبلىسىندا رەسپۋبليكالىق ماڭىزى بار ينفراقۇرىلىمدىق نىسان – «اقتوبە-ورال-رف شەكاراسى» اۆتوجولىنىڭ 265-شاقىرىمىندا، پودستەپنوە اۋىلى تۇسىندا سالىنعان ەكى دەڭگەيلى جول ايرىعى پايدالانۋعا بەرىلدى.
اشىلۋ راسىمىنە وبلىس اكىمى ناريمان تورەعاليەۆ، «قازاۆتوجول» ۇك» اق باسقارما توراعاسى دارحان يماناشەۆ جانە كومپانيا قىزمەتكەرلەرى، مەردىگەر ۇيىم وكىلدەرى مەن جەرگىلىكتى تۇرعىندار قاتىستى.
“مەملەكەت باسشىسى ءوزىنىڭ حالىققا جولداۋلارىندا ەلىمىزدىڭ كولىك-لوگيستيكا سالاسىن جاڭعىرتۋدى ايرىقشا اتاپ ءوتىپ، بۇل باعىتتى ۇلتتىق ەكونوميكانى كۇشەيتۋدىڭ نەگىزگى تەتىكتەرىنىڭ ءبىرى رەتىندە كورسەتتى. بۇگىن ىسكە قوسىلىپ وتىرعان ەكى دەڭگەيلى جول ايرىعى – جول قوزعالىسىن قاۋىپسىز ءارى ۇزدىكسىز قامتاماسىز ەتۋگە ارنالعان زاماناۋي ينجەنەرلىك شەشىم. جاڭا جول تورابى كولىك اعىنىن رەتتەپ، قوزعالىستى ايتارلىقتاي جەڭىلدەتەدى. بۇل – وبلىستىڭ وزگە وڭىرلەرمەن جانە رەسەي فەدەراتسياسىمەن كولىك بايلانىسىن جاقسارتىپ، ەكونوميكالىق ىقپالداستىقتى تەرەڭدەتۋگە زور سەرپىن بەرەتىن ماڭىزدى قادام”، - دەدى ءوڭىر باسشىسى ناريمان تورەعاليەۆ.
«قازاۆتوجول» ۇلتتىق كومپانياسىنىڭ باسقارما توراعاسى دارحان يماناشەۆ اتقارىلعان جۇمىستاردىڭ سالالىق جاڭعىرتۋداعى جۇيەلى ماڭىزىن اتاپ ءوتتى:
«بۇگىن اشىلعان ۋچاسكەلەر ءوڭىردىڭ كولىك قولجەتىمدىلىگىن تۇبەگەيلى وزگەرتەدى. ءاربىر جاڭا شاقىرىم – ەكونوميكانىڭ، شاعىن جانە ورتا بيزنەستىڭ، ءتۋريزمنىڭ دامۋىنا، حالىقتىڭ ءومىر ساپاسىنىڭ ارتۋىنا اشىلعان جاڭا مۇمكىندىك. سونىمەن بىرگە ءبىز بيىل قايتا جاڭعىرتۋ جۇمىستارى باستالعان “سىرىم” وتكىزۋ پۋنكتىن تولىقتاي جاڭارتىپ، ونى حالىقارالىق دەڭگەيدەگى زاماناۋي لوگيستيكالىق ورتالىققا اينالدىرۋدى باستادى».
اتالعان جول تورابى – «پودستەپنوە-فەدوروۆكا-رەسەي فەدەراتسياسى شەكاراسى» باعىتى بويىنشا جۇرگىزىلىپ جاتقان ءىرى قايتا جاڭعىرتۋ جۇمىستارىنىڭ ماڭىزدى بولىگى. جوبانىڭ جالپى ۇزىندىعى – 144 شاقىرىم. بۇگىنگى تاڭدا 72 شاقىرىم جول تولىق جوندەلىپ، كولىك قوزعالىسى اشىلدى. بۇل جۇمىستاردى «قازاۆتوجول» اق جۇزەگە اسىردى.
قالعان 72 شاقىرىمدا قايتا جاڭعىرتۋ جۇمىستارى كپو b.v. كومپانياسىنىڭ قولداۋىمەن جۇرگىزىلىپ جاتىر. جوبا تولىقتاي 2026 جىلى اياقتالادى دەپ جوسپارلانۋدا.
2025 جىلى وڭىردە رەسپۋبليكالىق ماڭىزى بار اۆتوموبيل جولدارىنىڭ 260 شاقىرىم جولداردا نەگىزگى جۇمىستار تولىق اياقتالدى. ونىڭ ىشىندە «پودستەپنوە – فەدوروۆكا» اۆتوجولىنىڭ 72 شاقىرىمىن قايتا جاڭارتۋ، «ونەگە – بيسەن – سايقىن» باعىتىنىڭ 103 شاقىرىمىن كۇردەلى جوندەۋ، سونداي-اق حان ورداسى اۋىلىنا كىرەبەرىس جولىنىڭ 21 شاقىرىمى مەن اقتوبە – ورال اۆتوجولىنىڭ 64 شاقىرىمدىق جولعا ورتاشا جوندەۋ جۇرگىزىلدى.
