پرەزيدەنت قاسىم-جومارت توقاەۆ ۇلتتىق قاۋىپسىزدىك كوميتەتىنە (ۇقك) جاڭا قىزمەتتەر جۇكتەدى، دەپ حابارلايدى "ادىرنا" ۇلتتىق پورتالى.
مەملەكەت باسشىسى 1996 جىلعى 1 ساۋىردەگى №2922 «قازاقستان رەسپۋبليكاسى ۇلتتىق قاۋىپسىزدىك كوميتەتى تۋرالى ەرەجەنى بەكىتۋ تۋرالى» پرەزيدەنت جارلىعىنا وزگەرىستەر مەن تولىقتىرۋلار ەنگىزۋ جونىندەگى قۇجاتقا قول قويدى. جاڭارتۋلار ۇقك-نىڭ قارجىلىق مونيتورينگ جانە مەملەكەتتىك ماتەريالدىق رەزەرۆتەردى باسقارۋ سالاسىنداعى وكىلەتتىكتەرىن كەڭەيتۋدى كوزدەيدى.
قۇجاتقا سايكەس، ۇقك زاڭسىز جولمەن الىنعان كىرىستەردى زاڭداستىرۋعا، تەرروريزمدى قارجىلاندىرۋعا جانە جاپپاي قىرىپ-جويۋ قارۋىن تاراتۋدى بولدىرماۋعا قارسى ءىس-قيمىل جونىندەگى ۋاكىلەتتى ورگاننىڭ سۇراۋى بويىنشا ءوز اقپاراتتىق جۇيەلەرىنەن ءتيىستى مالىمەتتەر ۇسىناتىن بولادى.
سونىمەن قاتار، وزگەرىستەر ۇقك-نىڭ مەملەكەتتىك ماتەريالدىق رەزەرۆتەر سالاسىنداعى فۋنكتسيالارىن ناقتىلايدى. اتاپ ايتقاندا، كوميتەت ماتەريالدىق قۇندىلىقتاردىڭ نومەنكلاتۋراسى مەن ساقتاۋ كولەمى بويىنشا ۇسىنىستار ەنگىزەدى، موبيليزاتسيالىق رەزەرۆتەن قۇندىلىقتاردى قارىزعا بەرۋ نەمەسە جاڭارتۋ تارتىبىمەن شىعارۋ ماسەلەلەرىن شەشەدى، ماتەريالدىق قۇندىلىقتاردى ساقتاۋ، جاڭارتۋ جانە مەملەكەتتىك ورگاندار اراسىندا تاسىمالداۋدى ۇيىمداستىرادى جانە رەزەرۆتەردى ساقتاۋ جانە قالىپتاستىرۋعا جۇمسالاتىن شىعىندار بويىنشا ۇكىمەتكە ۇسىنىستار دايىندايدى.
جارلىقتىڭ نەگىزگى ەرەجەلەرى 9 جەلتوقساننان باستاپ كۇشىنە ەندى. ال مەملەكەتتىك ماتەريالدىق رەزەرۆتەرگە قاتىستى جەكەلەگەن نورمالار 2027 جىلعى 1 قاڭتاردان باستاپ قولدانىلادى.
