مەملەكەت باسشىسى قاسىم-جومارت توقاەۆ رەسەيدىڭ ومبى قالاسىنا جۇمىس ساپارى بارىسىندا مايدانگەر، جازۋشى كەمەل توقاەۆقا ارنالعان ەسكەرتكىش تاقتاعا گۇل شوعىن قويدى، دەپ حابارلايدى "ادىرنا" ءتىلشىسى.
اقوردانىڭ مالىمەتىنشە، پرەزيدەنت سوعىس ارداگەرلەرىنە ارنالعان ومبى گوسپيتالى عيماراتىنىڭ قاسبەتىنە ورناتىلعان ەسكەرتكىش تاقتاعا گۇل شوعىن قويىپ، ەكىنشى دۇنيەجۇزىلىك سوعىستا قازا تاپقان جاۋىنگەرلەردىڭ رۋحىنا تاعزىم ەتتى. اتالعان مەديتسينا مەكەمەسىندە 1941 جىلدىڭ شىلدە ايىنان باستاپ مايداندا جارالانعان 150 مىڭعا جۋىق سارباز ەم قابىلداعان. ولاردىڭ قاتارىندا مەملەكەت باسشىسىنىڭ اكەسى، سوعىس ارداگەرى كەمەل توقاەۆ تا بولعان. ول 1945 جىلدىڭ اقپان-شىلدە ايلارى ارالىعىندا وسى گوسپيتالدە ەمدەلگەن.
ساپار بارىسىندا پرەزيدەنت قاسىم-جومارت توقاەۆ ومبىداعى اسكەري گوسپيتالدىڭ قۇرىلۋ تاريحىمەن جانە ونىڭ قىزمەتىمەن تانىستى.
ەسكە سالايىق، مەملەكەت باسشىسى ومبى قالاسىنا قازاقستان–رەسەي وڭىرارالىق ىنتىماقتاستىق فورۋمىنا قاتىسۋ ماقساتىندا جۇمىس ساپارىمەن باردى.
