مەملەكەت باسشىسى قاسىم-جومارت توقاەۆ شەتەلدىك ينۆەستورلار كەڭەسىنىڭ 38-ءشى پلەنارلىق وتىرىسىندا قازاقستاندا جاساندى ينتەللەكتىنى ءبىلىم بەرۋ جۇيەسىنە ەنگىزۋ جانە ادامي كاپيتالدى دامىتۋ باعىتىنداعى باستامالار تۋرالى ايتتى، دەپ حابارلايدى "ادىرنا" ۇلتتىق پورتالى.
پرەزيدەنتتىڭ سوزىنشە، قازاقستان ادامي كاپيتالدى دامىتۋعا جۇيەلى تۇردە ينۆەستيتسيا سالىپ كەلەدى. وسى باعىتتا Alem.ai حالىقارالىق ورتالىعىندا TUMO جانە Tomorrow School جاڭا بۋىن مەكتەپتەرى اشىلعان. سونداي-اق Telegram جانە Presight كومپانيالارىمەن بىرلەسىپ زاماناۋي زەرتحانالار ىسكە قوسىلعان.
پرەزيدەنت قاسىم-جومارت توقاەۆ جاقىندا قول قويعان جارلىققا سايكەس، جاساندى ينتەللەكت ورتا ءبىلىم بەرۋ جۇيەسىن جاڭعىرتۋدىڭ نەگىزگى ەلەمەنتىنە اينالاتىنىن حابارلادى.
«ارينە، بۇل جوبا پەداگوگتەردى الماستىرا المايدى، بىراق ۇستازداردىڭ مۇمكىندىگىن كەڭەيتەدى. جارلىقتا دەربەس وقىتۋ تەتىگىن قۇرۋ، تسيفرلىق ينفراقۇرىلىمدى نىعايتۋ، نورماتيۆتىك-قۇقىقتىق بازانى جەتىلدىرۋ جانە ءبىلىم بەرۋ ستاندارتتارىن جاڭعىرتۋ كوزدەلگەن. قازىرگى تاڭدا پيلوتتىق جوبا ىسكە قوسىلدى، كەيىن بۇل تاجىريبە رەسپۋبليكا كولەمىندە ەنگىزىلەدى»، – دەدى پرەزيدەنت.
مەملەكەت باسشىسىنىڭ ايتۋىنشا، اتالعان باستاما قالا مەن اۋىل مەكتەپتەرى اراسىنداعى ءبىلىم ساپاسى الشاقتىعىن ازايتىپ، جاساندى ينتەللەكت داۋىرىندە ءاربىر بالاعا ساپالى ءبىلىم الۋعا مۇمكىندىك بەرەدى.
