پرەزيدەنت قاسىم-جومارت توقاەۆ قازاقستاندىقتاردى جاڭا 2026 جىلمەن قۇتتىقتادى، دەپ حابارلايدى "ادىرنا" ۇلتتىق پورتالى.
مەملەكەت باسشىسىنىڭ جاڭاجىلدىق قۇتتىقتاۋى وتاندىق تەلەارنالار ارقىلى تىكەلەي ەفيردە كورسەتىلدى.
قۇتتىقتاۋ سوزىندە پرەزيدەنت 2025 جىلدىڭ ەل ءۇشىن تابىستى بولعانىن اتاپ ءوتتى. ونىڭ ايتۋىنشا، كۇردەلى جاھاندىق جاعدايعا قاراماستان، قازاقستاننىڭ ەكونوميكاسى ءوسىپ، ىشكى جالپى ءونىم 6 پايىزدان استى. التىن-ۆاليۋتا قورى 62 ميلليارد دوللاردان اسىپ، ەلگە ءىرى ينۆەستيتسيالار تارتىلدى.
مەملەكەت باسشىسى ينفراقۇرىلىمدىق جوبالارعا دا توقتالدى. اتاپ ايتقاندا، «دوستىق – مويىنتى» تەمىرجولىنىڭ ەكىنشى جەلىسى ىسكە قوسىلىپ، بۇل تاۋەلسىزدىك جىلدارىنداعى ەڭ ءىرى تەمىرجول قۇرىلىسى رەتىندە باعالاندى. سونىمەن قاتار، 13 مىڭ شاقىرىم اۆتوكولىك جولى سالىندى جانە جوندەلىپ جاتىر.
پرەزيدەنت اۋىل شارۋاشىلىعىن دامىتۋعا ەرەكشە ءمان بەرىلگەنىن ايتتى. سوڭعى ەكى جىل قاتارىنان ديقاندار مول ءونىم الىپ، بۇل سالاعا بۇرىن-سوڭدى بولماعان كولەمدە — 1 تريلليون تەڭگە قارجى ءبولىندى. بيىل ەل بويىنشا 19 ميلليون شارشى مەتردەن استام تۇرعىن ءۇي پايدالانۋعا بەرىلىپ، مىڭداعان وتباسى باسپانالى بولدى.
الەۋمەتتىك سالادا دا بىرقاتار ماڭىزدى جوبالار جۇزەگە اسقان. جۇزدەن استام مەكتەپ پەن ەكى جۇزگە جۋىق دەنساۋلىق ساقتاۋ نىسانى سالىندى. شەتەلدىك جەتەكشى ۋنيۆەرسيتەتتەردىڭ فيليالدارى اشىلىپ، ادام قۇقىقتارىن قورعاۋ باعىتىنداعى جۇمىستار كۇشەيتىلدى. قوعامدا «زاڭ مەن ءتارتىپ» قاعيداتى نىعايا ءتۇستى.
قاسىم-جومارت توقاەۆ 2026 جىلدى تسيفرلاندىرۋ جانە جاساندى ينتەللەكت جىلى دەپ جاريالادى. ونىڭ ايتۋىنشا، وزىق تەحنولوگيالار ەلىمىزدىڭ بارلىق سالاسىنداعى الەۋەتىن ارتتىرۋعا مۇمكىندىك بەرەدى. مەملەكەت تسيفرلىق مەملەكەت قۇرۋ، شاعىن جانە ورتا بيزنەستى قولداۋ، ينفراقۇرىلىمدى دامىتۋ جۇمىستارىن جالعاستىرادى.
سونداي-اق پرەزيدەنت وسكەلەڭ ۇرپاققا قامقورلىق كورسەتۋ باستى مىندەت ەكەنىن اتاپ ءوتتى. «ۇلتتىق قور – بالالارعا» جوباسى اياسىندا ءۇشىنشى جىل قاتارىنان ءار بالانىڭ ەسەپشوتىنا قاراجات اۋدارىلادى.
قۇتتىقتاۋ سوڭىندا مەملەكەت باسشىسى قازاقستاندىقتارعا اماندىق، بىرلىك جانە تابىس تىلەپ، الداعى جىلدان مول جاقسىلىق كۇتەتىنىن جەتكىزدى.
