مەملەكەت باسشىسى قاسىم-جومارت توقاەۆ ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا ساحنالانعان «جوشى حان» سپەكتاكلىنىڭ پرەمەراسىنا باردى. بۇل تۋرالى اقوردا جاريالادى، دەپ حابارلايدى “ادىرنا” ۇلتتىق پورتالى.
سپەكتاكلدە شىڭعىس حان مەن ۇلى جوشى اراسىنداعى قارىم-قاتىناس، ولاردىڭ ەل باسقارۋ ىسىندەگى قابىلداعان شەشىمدەرى، ءومىرىنىڭ بەلگىلى كەزەڭدەرى كەڭىنەن سۋرەتتەلەدى.
قويىلىمدى تاماشالاپ بولعاننان كەيىن، مەملەكەت باسشىسى تەاتر ۇجىمىنا العىسىن ايتىپ، ىستىق لەبىزىن ءبىلدىردى.
قويىلىمدا مەملەكەت باسشىسىنان بولەك، اسحات ايماعامبەتوۆ، ەرلان قارين، ايدا بالاەۆا، اسحات ورالوۆ، ازامات ساتىبالدى، پرەزيدەنت اكىمشىلىگىنىڭ قىزمەتكەرلەرى جانە دەپۋتاتتار مەن بەلگىلى ونەر ادامدارى بولدى.
كوپتىڭ كوڭىلىنەن شىققان تاريحي درامانىڭ اۆتورى - بەلگىلى جازۋشى، دراماتۋرگ دۋمان رامازان، قويۋشى رەجيسسەرى – قازاقستاننىڭ ەڭبەك سىڭىرگەن قايراتكەرى بولات ۇزاقوۆ.
قويىلىمنان كەيىن تاريحي درامانىڭ اۆتورى دۋمان رامازان دا ءوز العىسىن ءبىلدىرىپ، جەلىدەگى پاراقشاسىنا جازدى.

قۇتتى بولسىن! وتە كەرەمەت قويىلىم بولدى. شىن مانىندە، پەسانىڭ تاقىرىبى وتە ماڭىزدى، وزەكتى. مۇنداي تۋىندىلار حالقىمىز ءۇشىن قاجەت دەپ ويلايمىن. پەسانىڭ ءتىلى، ءماتىنى وتە جاقسى جازىلعان. ارتىستەردىڭ ءبارى جاقسى وينادى. شەبەرلىگى مىقتى ەكەن. ءبىزدىڭ تاريحىمىزدى، تاريحي قۇندىلىقتارىمىزدى قازىرگى تاڭدا حالىق اراسىندا كەڭىرەك دارىپتەۋىمىز كەرەك. كەيبىرەۋلەر قازاقتاردىڭ ءوز تاريحى، مەملەكەتى، ەلى بولماعان دەگەن سوزدەر ايتىپ ءجۇر. ول – ءبىزدىڭ تاريحىمىزدى بۇرمالاۋ. ونەرلەرىڭىز قاشاندا تابىستى بولسىن. بارشاڭىزعا امانشىلىق تىلەيمىن، – دەدى توقاەۆ.سونداي-اق، پرەزيدەنت ونەر ورداسىنا ۇلتتىق مارتەبە بەردى. ءتيىستى جارلىق قازان ايىندا رەسپۋبليكا كۇنى قارساڭىندا جاريالاناتىنى حابارلاندى.




“جوشى حان” تاريحي درامامىزعا كەلىپ-كورىپ، وڭ باعاسىن بەرگەن قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆقا ايتار العىسىم شەكسىز! پرەزيدەنتىمىمىزدىڭ مادەنيەتىمىز بەن ونەرىمىزگە، ادەبيەتىمىزگە كوڭىل ءبولىپ، قولداۋ ءبىلدىرۋى ءبىز سەكىلدى ونەر ادامدارىنا ەرەكشە قانات بىتىرەدى. ريزاشىلىعىم دا شەكسىز! استانا تەاترىنا ۇلتتىق مارتەبە بەرىلدى. قۇتتى بولسىن ەڭبەكتەرىڭىز ەلەنىپ، جۇلدىزدارىڭىز جانا بەرسىن!،- دەدى جازۋشى.