قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ حالىقتى استانا كۇنىمەن قۇتتىقتاپ، ەلوردانىڭ ەل دامۋىنداعى ءرولىن ەرەكشە اتاپ ءوتتى.
مەملەكەت باسشىسى بيىلعى استانا كۇنى قاسيەتتى دومبىرا كۇنىمەن تۇسپا-تۇس كەلۋىنىڭ سيمۆولدىق ءمانى زور ەكەنىن اتاپ ءوتتى. ونىڭ ايتۋىنشا، دومبىرا – ۇلى دالانىڭ مىڭجىلدىق مادەني مۇراسى بولسا، استانا – قازاقستاننىڭ تۇراقتى دامۋ مەن وركەندەۋ جولىنداعى نىشانى.
«استانا – ەلىمىزدىڭ قوعامدىق، ساياسي جانە ىسكەرلىك ورداسى. بۇل جەردە حالقىمىزدىڭ بولاشاعىنا قاتىستى ماڭىزدى شەشىمدەر قابىلدانادى، وزىق يدەيالار ىسكە اسىپ، بيىك ماقساتتار ورىندالادى»، – دەدى پرەزيدەنت.
سونداي-اق قاسىم-جومارت توقاەۆ استانانىڭ جاھاندىق دەڭگەيدە بەيبىتشىلىك پەن كەلىسىمنىڭ سيمۆولىنا اينالعانىن اتاپ ءوتىپ، ەلوردانىڭ ادىلەتتى، تازا جانە قۋاتتى قازاقستاندى قۇرۋ جولىنداعى رەفورمالار ورتالىعى رەتىندە قىزمەت ەتە بەرەتىنىن ايتتى.
«ەلوردامىز ءاردايىم تۇبەگەيلى وزگەرىستەر مەن اۋقىمدى رەفورمالاردىڭ باستاۋىندا تۇرادى»، – دەدى مەملەكەت باسشىسى.
پرەزيدەنت ەلىمىزدىڭ ءاربىر ازاماتىنا زور دەنساۋلىق پەن باق-بەرەكە تىلەپ، استانانىڭ وركەندەي بەرۋىنە تىلەكتەستىك ءبىلدىردى.
استانا كۇنى – قازاقستاننىڭ ەلورداسى استانانىڭ قۇرمەتىنە ارنالعان ۇلتتىق مەرەكە. ول جىل سايىن 6 شىلدەدە اتاپ وتىلەدى. بۇل كۇن قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ تۋعان كۇنىمەن تۇسپا-تۇس كەلگەندىكتەن 2008 جىلى رەسمي تۇردە مەرەكەلىك كۇن رەتىندە بەكىتىلدى.
ەلوردا 1997 جىلى الماتىدان اقمولاعا كوشىرىلىپ، 1998 جىلى رەسمي تۇردە استانا دەپ اتالدى. ال 2019–2022 جىلدارى قالا نۇر-سۇلتان اتاۋىن يەلەنىپ، 2022 جىلدىڭ قىركۇيەگىندە استانا اتاۋى قايتا قايتارىلدى.
بۇگىندە استانا — ورتالىق ازياداعى ەڭ زاماناۋي قالالاردىڭ ءبىرى، ساۋلەتى مەن ينفراقۇرىلىمى الەمدىك دەڭگەيدەگى جوبالارمەن سالىستىرىلادى. قالادا كوپتەگەن حالىقارالىق فورۋمدار، سەزدەر مەن كەلىسسوزدەر وتەدى.
