الماتى قالاسىنىڭ المالى اۋداندىق سوتىندا "اقوردانى باسىپ الۋعا ارەكەت جاسادى" دەگەن كۇدىكپەن ايىپتالعان بەس بەلسەندىنىڭ ءىسى قارالىپ جاتىر، دەپ حابارلايدى "ادىرنا" ۇلتتىق پورتالى ۆلاست-قا سىلتەپ.
سوت پروتسەسى جابىق رەجيمدە وتەدى. بۇل تۋرالى ادۆوكات جانارا بالعاباەۆا حابارلاعان.
ءىس بويىنشا بەلسەندىلەر اسقار نۇرماعان، ابدۋالي تاعاي جانە دۇيسەنبەك جاقاشەۆكە بيلىكتى كۇشپەن باسىپ الۋعا نەمەسە ۇستاپ تۇرۋعا ۇگىتتەۋ، سونداي-اق زورلىق-زومبىلىق، قيراتۋ ارەكەتتەرىمەن جانە بيلىككە قارسىلىقپەن ۇشتاسقان جاپپاي تارتىپسىزدىكتەردى ۇيىمداستىرۋ جانە دايىنداۋ ايىپتارى تاعىلعان. ال قايسار وزبەك پەن تالعات اشيروۆقا وسى ايىپتاردان بولەك، جارىلعىش زاتتاردى زاڭسىز ساتىپ الۋ، ساقتاۋ جانە تاسىمالداۋ بويىنشا قوسىمشا ايىپ تاعىلعان.
پروكۋرور سوتتى جابىق رەجيمدە وتكىزۋ تۋرالى ءوتىنىش بىلدىرگەن. وعان سەبەپ رەتىندە كۋاگەرلەردىڭ ءبىرىنىڭ قاۋىپسىزدىگىنە الاڭداۋشىلىق بىلدىرىلگەن. سۋديا مەملەكەتتىك ايىپتاۋشىنىڭ ءوتىنىشىن قاناعاتتاندىرعان.
ايىپتاۋ اكتىسىنە سايكەس، كۇدىكتىلەر ارەكەتتەرىن جوسپارلاۋ ءۇشىن جاسىرىن كەزدەسۋلەر وتكىزىپ، WhatsApp مەسسەندجەرىندە «قايرات كوماندا» اتتى ورتاق چات قۇرعان. تەرگەۋ نۇسقاسى بويىنشا، ولار استانا قالاسىندا جاپپاي تارتىپسىزدىك ۇيىمداستىرىپ، بيلىكتى باسىپ الۋ، سونداي-اق قازاقستان پرەزيدەنتىنىڭ رەزيدەنتسياسى – اقوردانى باسىپ الۋ جوسپارىن تالقىلاعان.
قۇجاتتاردا ايىپتالۋشىلاردىڭ 2025 جىلدىڭ قاڭتارىنان ماۋسىمىنا دەيىنگى كەزدەسۋلەرى مەن بايلانىستارى كورسەتىلگەن.
