قۇقىق قورعاۋ ورگاندارى شەتەلدىك گۋمانيتارلىق كومەكتىڭ ماقساتتى جانە اشىق جۇمسالۋىنا دا تەكسەرۋ جۇرگىزىپ جاتىر
سىبايلاس جەمقورلىققا قارسى ءىس-قيمىل اگەنتتىگى مەديتسينا سالاسىندا بيۋدجەت قارجىسىن جىمقىرۋ فاكتىسى بويىنشا ءۇش قىلمىستىق ءىستى تەرگەپ جاتىر.
"قازىرگى ۋاقىتتا سىبايلاس جەمقورلىققا قارسى ءىس-قيمىل اگەنتتىگى "مەديتسينالىق ساقتاندىرۋ قورى" كوممەرتسيالىق ەمەس اكتسيونەرلىك قوعامىنىڭ لاۋازىمدى تۇلعالارىنىڭ بيۋدجەت قارجىسىن جىمقىرۋ، جەكەلەگەن تۇلعالاردىڭ ءىرى كولەمدە مەديتسينالىق بەتپەردەلەردى ساتۋ، سونداي-اق، مەديتسينا مەكەمەلەرىنىڭ جەكەلەگەن باسشىلارىنىڭ اسا ءىرى كولەمدە بيۋدجەت قارجىسىن جىمقىرۋعا تىرىسۋ دەرەكتەرى بويىنشا ءۇش قىلمىستىق ءىستى تەكسەرىپ جاتىر", - دەپ حابارلادى اقوردا.
سونىمەن قاتار، قارجى مينيسترلىگىنىڭ ەكونوميكالىق تەكسەرۋ قىزمەتى كوروناۆيرۋسپەن كۇرەسكە بولىنگەن اسا ءىرى كولەمدەگى مەملەكەتتىك قارجىنى الاياقتىق جولمەن جىمقىرۋ دەرەگى بويىنشا قىلمىستىق ءىستى تەكسەرۋدە.
قاۋىپسىزدىك كەڭەسىنىڭ اپپاراتى مەن پرەزيدەنت اكىمشىلىگىنىڭ ۇسىنىسى بويىنشا قۇقىق قورعاۋ ورگاندارى كوروناۆيرۋس ىندەتىمەن كۇرەسكە باعىتتالعان شەتەلدىك گۋمانيتارلىق كومەكتىڭ ماقساتتى جانە اشىق جۇمسالۋىنا تەكسەرۋ جۇرگىزۋدى باستادى.
ءدارى-دارمەكتەردى جاسىرۋ جولىن كەسۋ، باعا كەلىسىمى، گۋمانيتارلىق كومەك رەتىندە كەلگەن نەمەسە ەمدەۋ مەكەمەلەرىنەن ۇرلانعان ءدارى-دارمەكتەردى قايتا ساتۋ سياقتى ارەكەتتەردىڭ الدىن الۋ شارالارى جالعاسۋدا.
