ەلىمىزدىڭ ەكى وڭىرىندە شەتەلدىكتەر مىنگەن كولىكتەر قار قۇرساۋىندا تۇرىپ قالعان، دەپ حابارلايدى "ادىرنا" ۇلتتىق پورتالى.
اقتوبە وبلىسىندا قاتتى بوران مەن قالىڭ قار جاۋىپ، رەسپۋبليكالىق ماڭىزى بار جولداردا بىرنەشە كولىك تۇرىپ قالدى. سونىڭ ىشىندە 57 شەتەلدىك مىنگەن جولاۋشىلار اۆتوبۋسى دا بار.
وبلىس اكىمدىگىنىڭ مالىمەتىنشە، اۆتوبۋس اقتوبە وبلىسىنىڭ ايتەكە بي اۋدانى اۋماعىنداعى تاس جولدا قوزعالىپ كەلە جاتىپ، تەحنيكالىق اقاۋعا بايلانىستى توقتاپ قالعان. كولىكتە بارلىعى 57 ادام، ونىڭ ىشىندە 3 بالا بولعان. اۆتوبۋس ماسكەۋ قالاسىنان تاجىكستان رەسپۋبليكاسىنا باعىت العان. بارلىق جولاۋشىلار – تاجىكستان رەسپۋبليكاسىنىڭ ازاماتتارى.
قۇتقارۋشىلار وقيعا ورنىنا جەدەل جەتىپ، اۆتوبۋستاعى بارلىق ادامداردى قاۋىپسىز جەرگە ەۆاكۋاتسيالادى. جولاۋشىلار قارابۇتاق اۋىلىنداعى مەشىت جانىنداعى جىلىتۋ پۋنكتىنە ورنالاستىرعان.
سونىمەن قاتار، قارعالى اۋدانىندا «جوسالى – اشىلىساي» اۆتوجولىندا تاعى ەكى كولىك قارعا باتىپ قالعان. بۇل كولىكتەردە تاشكەنتتەن ماسكەۋگە بارا جاتقان وزبەكستان رەسپۋبليكاسىنىڭ 11 ازاماتى بولعان. قۇتقارۋشىلار كولىكتەردى جولدان شىعارىپ، جولاۋشىلاردى جوسالى اۋىلىنداعى جىلىتۋ پۋنكتىنە جەتكىزدى. بۇل ازاماتتارعا دا مەديتسينالىق كومەك كورسەتۋدىڭ قاجەتى بولمادى.
توتەنشە جاعدايلار مينيسترلىگى اۋا رايىنىڭ قولايسىز كەزەڭىندە الىس جولعا شىقپاۋعا جانە قوزعالىسقا قويىلعان شەكتەۋلەر تۋرالى رەسمي اقپاراتتى قاداعالاپ وتىرۋعا شاقىرادى.
