گەرمانيانىڭ ۆەيمار قالاسىندا ورنالاسقان بۋحەنۆالد كونتسلاگەرىندە قازاقستاندىق تۇتقىندارعا ارنالعان ەسكەرتكىش تاقتا ورناتىلدى، دەپ حابارلايدى "ادىرنا" ۇلتتىق پورتالى.
باستامانى جەكە قاراجاتى ەسەبىنەن تاريحشى، تاريح عىلىمدارىنىڭ كانديداتى، قر جوعارعى سوتى كوممۋنيكاتسيالار ءبولىمىنىڭ مەڭگەرۋشىسى پەريزات سادۋاقاس جۇزەگە اسىردى.
جوبا ۇلى وتان سوعىسى جىلدارى ناتسيستىك رەجيمنىڭ تۇتقىنىنا تۇسكەن قازاقستاندىقتاردى ەسكە الۋ ماقساتىندا قولعا الىنعان. ەسكەرتكىش تاقتا بۋحەنۆالدتىڭ بۇرىنعى كرەماتوري عيماراتىنا – لاگەردەگى ەڭ قاسىرەتتى ورىنداردىڭ بىرىنە ورناتىلدى.
اتالعان تاقتادا العاش رەت QR-كود قولدانىلىپ، كەلۋشىلەرگە قازاقستاندىق تۇتقىنداردىڭ ءتىزىمىن قازاق، ورىس جانە نەمىس تىلدەرىندە كورۋگە مۇمكىندىك بەرىلدى. تىزىمگە الماتى، اقتوبە، تاراز، شىمكەنت، پاۆلودار، پەتروپاۆل، سەمەي قالالارى مەن اقمولا جانە تۇركىستان وبلىستارىنان شىققان ءتۇرلى ۇلت وكىلدەرى – بارلىعى 35 قازاقستاندىق ەنگىزىلگەن. ەڭ جاس تۇتقىن 1926 جىلى، ال ەڭ ۇلكەنى 1900 جىلى دۇنيەگە كەلگەن. ءتىزىمدى تولىقتىرۋ جۇمىستارى بۋحەنۆالد مەموريالدى كەشەنىنىڭ قولداۋىمەن جالعاسا بەرمەك.
بۋحەنۆالد باسشىلىعى قازاقستاندىق تۇتقىنداردىڭ ءتىزىمىن انىقتاۋ باستاماسى پەريزات سادۋاقاسقا تيەسىلى ەكەنىن راستايتىن رەسمي سەرتيفيكات تابىستادى. بۇل قۇجات اۆتورلىق قۇقىقتىڭ بالاماسى رەتىندە قاراستىرىلادى.
ەسكەرتكىش تاقتانىڭ اشىلۋ راسىمىنە قازاقستان رەسپۋبليكاسىنىڭ گەرمانياداعى ەلشىلىگى مەن فرانكفۋرتتاعى باس كونسۋلدىقتىڭ وكىلدەرى، بۋحەنۆالد مەموريالدى كەشەنىنىڭ باسشىلىعى، قازاقستان ستۋدەنتتەرى جانە جوبا باستاماشىسىنىڭ اپكەسى بەكزات ەرمەكباەۆا قاتىستى.
پەريزات سادۋاقاس ەسكەرتكىش تاقتا جەكە باستامانىڭ ناتيجەسى بولعانىمەن، ونىڭ بۋحەنۆالد تۇتقىندارىنىڭ ۇرپاقتارى مەن قازاقستان حالقىنىڭ اتىنان ورناتىلعانىن اتاپ ءوتتى. جوبا گۋمانيستىك ءارى بەيبىت سيپاتقا يە بولىپ، تاريحي جادتى ساقتاۋ، توتاليتارلىق رەجيم قۇرباندارىنا قاتىستى ادىلەتتىلىكتى قالپىنا كەلتىرۋ جانە حالىقارالىق ديالوگتى نىعايتۋعا باعىتتالعان.
باستاماشى قازاقستان رەسپۋبليكاسىنىڭ سىرتقى ىستەر مينيسترلىگىنە، گەرمانياداعى قازاقستان رەسپۋبليكاسىنىڭ ەلشىلىگىنە، فرانكفۋرتتاعى باس كونسۋلدىققا، بۋحەنۆالد مەموريالدى كەشەنىنىڭ باسشىلىعىنا جانە «الجير» مەموريالدى مۋزەي كەشەنىنىڭ نەگىزىن قالاۋشى رايسا رامازانقىزىنا كورسەتكەن قولداۋى ءۇشىن العىس ءبىلدىردى.
تاريحتىڭ قاسىرەتتى بەتتەرىندەگى قۇرباندارعا تاعزىم جاساۋ جاس ۇرپاقتى تاريحي شىندىقتى ساقتاۋعا جانە بەيبىتشىلىكتى نىعايتۋعا ۇندەيدى.
