قاي عاسىر، قاي كەزەڭدە دە ەسىمى ءوزىنىڭ حالقىمەن ءبىرتۇتاسىپ كەتكەن زاڭعار تۇلعالار بولادى. ۇلت رۋحانياتىنا قىزمەت ەتۋدىڭ جارقىن ۇلگىسىن كورسەتكەن ءاسانالى ءاشىموۆ ومىردەن ءوتتى دەگەنگە سەنەر الار ەمەسپىز. جاراتۋشى يەمىزدىڭ جارلىعىنا امال قايسى...
"الاشتىڭ ءاسانالىسى" دەپ الاقانىنا سالعان حالقىمىزعا، باعدات جەڭگەمىزگە، كىشكەنتاي ءاسانالى باۋىرىمىزعا، بارشا اشىموۆتەر اۋلەتىنە قايعىرىپ كوڭىل ايتامىز!
قازاق ونەرىنىڭ كوشىن باستاعان، قازاقستاننىڭ ەڭبەك ەرى، كسرو جانە قازاقستاننىڭ حالىق ءارتىسى، مەملەكەتتىك سىيلىقتىڭ لاۋرەاتى، كورنەكتى تەاتر جانە كينو اكتەرى، پروفەسسور ءاسانالى اشىموۆپەن تۇتاس ءبىر ءداۋىر كوشتى.
ءاسانالى اعا - قازاقتىڭ كاسىبي ونەرىنىڭ نەگىزىن قالاعان ۇلى ابىزدار مەن بۇگىنگى ۇرپاقتىڭ ورتاسىنداعى التىن كوپىر بولا ءبىلدى.
سوناۋ الپىسىنشى جىلداردىڭ باسىندا قازاق تەاتر جانە كينو ونەرىنە «جانارتاۋ» بولىپ كەلگەن ءاسانالى ءاشىموۆ – قازاق ساحناسىنداعى شىن ماعىناسىنداعى «قۇبىلىسقا» اينالدى.
م.اۋەزوۆتىڭ "اباي" تراگەدياسىنداعى ايدار بەينەسىمەن تۇساۋى كەسىلگەن جاس-ءاسانالىنىڭ وسى قويىلىمداعى ساحنالىق پارتنيورلەرى - قازاق ونەرىنىڭ ابىزدارى - قاللەكي، ەل-اعاڭ، سەرى-اعاڭ، قاپان اعا باستاعان ۇلىلار شوعىرى بولدى.
اساعاڭنىڭ كاسىبي ونەر جولى - ابىزدار باتاسىمەن، قولداۋىمەن باستالىپ، ءسابيرا، حاديشا سىندى ۇلى اكتريسالارمەن، نۇرمۇحان، ىدىرىس، ءانۋار، فاريدا، رايىمبەك، ءسابيت سىندى ساحنا ساناتكەرلەرىمەن جاراسىم تاپتى.
اكتەرلىك ونەردىڭ كوركەمدىك دەڭگەيىنىڭ بيىكتەۋىنە ايرىقشا ەڭبەك سىڭىرگەن اس-اعاڭ - قازاقكلاسسيكاسىنىڭ زاڭعار شىڭدارى م.اۋەزوۆ، ع.مۇسىرەپوۆ، س.مۇقانوۆ، ءا.نۇرپەيىسوۆتەردىڭ دراماتۋرگياسىنداعى كەيىپكەرلەر بويىنداعى ۇلت مۇراتى مەن مۇددەسiن ءوزىنىڭ ومىرشەڭ بولمىس-بىتىمىمەن ورنەكتەدى.
سوندىقتان تەاتر كەڭىستىگىندە ءاسانالى اعا سومداعان كەبەك، قودار، جاراسباي، ايشۋاق، سىرىم باتىر، امانگەلدى، ەلامان سىندى وبرازدار گالەرياسى - ۇلت قۇندىلىعى.
ال كينو ونەرىندەگى ءاسانالى ءاشىموۆ جاساعان «بەكەجان» وبرازى – قازاق رۋحىنىڭ حرەستوماتياسى. بەكەجانداي باتىردىڭ بولمىسىن حالىق جۇرەگىنە شىنايى جەتكىزە ءبىلدى.
قازاق كينوسىنداعى - "اتاماننىڭ اقىرى", ء"ترانسسىبىر ەكسپرەسسى", "بۇلعار دالاسىنان ەسكەن جىلى جەل", ء"سىز كىمسىز، كا مىرزا؟", "ارۋاق" فيلمىندەگى ا.ءاشىموۆ سومداعان بەينەلەر - ءوز الدىنا بولەك ءبىر الەم. ءاسانالى ءاشىموۆتىڭ سۋرەتكەرلىك بولمىسىنىڭ ەكىنشى ءبىر بيىك قىرى - رەجيسسۋرا.
ەلىمىزدەگى تەاتر پەداگوگيكاسىندا، ءاسانالى اعامىزدىڭ ۇستاز رەتىندە قايتالانباس ءوز ءۇنى، ماشىعى مەن مانەرى، ايشىعى مەن ورنەگى بار.
ەل ماقتانىشىنا اينالعان، قازاق ونەرىنىڭ ابىزى ارقاشان حالقىمەن بىرگە بولدى.
وسىدان ءبىر اپتا بۇرىن عانا، استاناعا ءوزى جەتەكشىلىك ەتەتىن تەاترىمەن، شاكىرتتەرىمەن كەلىپ ەلوردامىزداعى ۇلتتىق تەاتر ساحناسىندا ونەر كورسەتكەن بولاتىن.
قويىلىم سوڭىندا ساحناعا شىعىپ، الاشىنا اق باتاسىن ارنادى.
اللا تاعالانىڭ راحىمى مەن مەيىرىمىنە بولەنگەي! حوش بولىڭىز ونەردەگى ارداقتى اعا، رۋحاني اكە، ۇلى ۇستاز - ءاسانالى اعا!
جاراتۋشى يەمىز باعدات جەڭگەمىزگە، بۇكىل اشىموۆتەر اۋلەتىنە سابىر بەرسىن!
اسحات ماەميروۆ
