ۋكراينا پرەزيدەنتى ۆلاديمير زەلەنسكي اقش-تا وتكەن كەلىسسوزدەر بارىسىندا امەريكالىق تاراپقا ۇسىنىلعان 20 تارماقتان تۇراتىن جوسپاردى جاريالادى. قۇجاتتىڭ نەگىزگى ەرەجەلەرىن ربك-ۋكراينا اگەنتتىگى زەلەنسكيدىڭ جۋرناليستەرمەن كەزدەسۋىنەن كەيىن تاراتتى، دەپ حابارلايدى «ادىرنا» ءتىلشىسى.
جوسپاردىڭ ءبىر تارماعىنا سايكەس، ۋكراينا دونباسس اۋماعىنان اسكەرىن شىعارۋدان باس تارتادى.
جوسپاردا ۋكراينانىڭ ەگەمەندىگىن راستاۋ، رەسەي مەن ۋكراينا اراسىندا شابۋىل جاساماۋ تۋرالى كەلىسىم (بايلانىس شەبىندە مونيتورينگ جۇرگىزىلۋى مۇمكىن، ناقتى تەتىكتەر كورسەتىلمەگەن), سونداي-اق قاۋىپسىزدىك كەپىلدىكتەرى قاراستىرىلعان. بەيبىت كەزەڭدە ۋكراينا قارۋلى كۇشتەرىنىڭ سانى 800 مىڭ ادام دەڭگەيىندە بەكىتىلۋى ۇسىنىلادى. قاۋىپسىزدىك كەپىلدىكتەرىن ناتوجارعىسىنىڭ 5-بابىنا ۇقساس فورماتتا اقش، ناتو جانە ەۋروپا ەلدەرى بەرۋى ءتيىس دەلىنگەن.
التىنشى تارماق رەسەيدىڭ ۋكراينا مەن ەۋروپاعا قارسى شابۋىل جاساماۋ مىندەتتەمەلەرىن بەكىتۋدى كوزدەيدى. جەتىنشى تارماقتا ۋكراينانىڭ ەۋرووداققا ء«تيىستى ۋاقىتتا» كىرۋى كورسەتىلگەن (مەرزىم ءالى ناقتىلانباعان). سەگىزىنشى تارماق كيەۆكە «جاھاندىق كومەك پاكەتىن» بەرۋدى، توعىزىنشىسى قالپىنا كەلتىرۋ ماقساتتارىنا ارنالعان 800 ملرد دوللارلىق قور قۇرۋدى قاراستىرادى. ونىنشى تارماقتا ۋكراينا اقش-پەن ەركىن ساۋدا تۋرالى كەلىسىمدى جەدەلدەتۋگە مىندەتتەمە الادى.
11-تارماق ۋكراينانىڭ يادرولىق قارۋسىز مەملەكەت مارتەبەسىن بەكىتەدى. 12-تارماق زاپوروجە اەس-ىنە قاتىستى، الايدا بۇل ماسەلە بويىنشا تاراپتار ورتاق كەلىسىمگە كەلە الماعانى ايتىلعان. اقش ستانتسيانى اقش–رەسەي–ۋكراينا بىرلەسكەن باسقارۋىنا بەرۋدى، جەتەكشى ءرولدى ۆاشينگتونعا جۇكتەۋدى ۇسىنادى. 13-تارماق مەكتەپتەردە ءتۇرلى مادەنيەتتەرگە توزىمدىلىكتى ارتتىراتىن ءبىلىم بەرۋ باعدارلامالارىن ەنگىزۋدى قامتيدى. 14-تارماق اۋماقتىق ماسەلەلەرگە ارنالعان، مۇندا دا اقش پەن ۋكراينا اراسىندا ورتاق ۇستانىم جوق، كيەۆ دونباستان اسكەردى شىعارمايتىنىن تاعى دا مالىمدەگەن.
قورىتىندى بولىمدە تاراپتاردىڭ كەلىسىمدەردى كۇشپەن وزگەرتپەۋ مىندەتتەمەلەرى، دنەپر وزەنىمەن كەمە قاتىناسىنىڭ ەركىندىگى، تۇتقىنداردى فورمۋلا بويىنشا الماستىرۋ قاراستىرىلعان. ۋكراينا كەلىسىمگە قول قويىلعاننان كەيىن مۇمكىندىگىنشە تەزىرەك سايلاۋ وتكىزۋگە ۋادە بەرەدى.
قۇجات زاڭدى كۇشكە يە بولادى، ونىڭ ورىندالۋىن بەيبىتشىلىك كەڭەسى باقىلايدى، كەڭەسكە اقش پرەزيدەنتى دونالد ترامپ توراعالىق ەتەدى. بارلىق تاراپ كەلىسىمگە كەلىسىمەن اتىستى توقتاتۋ رەجيمى دەرەۋ كۇشىنە ەنەدى.
بۇعان دەيىن رەسەي پرەزيدەنتى اكىمشىلىگى مەن سىرتقى ىستەر مينيسترلىگىنىڭ وكىلدەرى كيەۆ جوسپارىنىڭ بىرقاتار تارماقتارى ماسكەۋدى قاناعاتتاندىرمايتىنىن بىرنەشە رەت ايتقان. اتاپ ايتقاندا، رەسەي ۋكراينانىڭ دونباسس اۋماعىنان اسكەرىن تولىق شىعارۋىن، كيەۆتىڭ ناتو-عا مۇشەلىكتەن باس تارتۋىن جانە ۋكراين ارمياسىنىڭ سانىن شەكتەۋدى تالاپ ەتىپ وتىر.
سەريك مالەەۆ. كيەۆ موجەت زاموروزيت موسكۆۋ حوت زاۆترا. چتو دليا روسسيسكوي ستوليتسى راۆنوزناچنو سمەرتي
