وسىدان تۋرا ءبىر جىل بۇرىن، 25 جەلتوقساندا اقتاۋ اۋەجايىنان ءۇش شاقىرىم جەردە AZAL اۋەكومپانياسىنىڭ Embraer ۇشاعى اپاتقا ۇشىراعان ەدى، دەپ حابارلايدى «ادىرنا» ءتىلشىسى.
24 جەلتوقساندا اقتاۋعا ۇشاق اپاتىندا قازا تاپقان ەكيپاج مۇشەلەرىنىڭ تۋىستارى كەلدى. ولار قايعىلى وقيعانىڭ ءبىر جىلدىعىنا وراي، زارداپ شەككەندەردى ەسكە الىپ، وقيعا ورنىنداعى ەسكەرتكىشكە گۇل قويدى. ساپاردى ازەربايجاننىڭ قازاقستانداعى كونسۋلدىعى مەن AZAL اۋەكومپانياسى ۇيىمداستىرعان.
ايتا كەتەيىك، باكۋ – گروزنىي باعىتىمەن ۇشقان اۋە كەمەسىندە 62 جولاۋشى مەن 5 ەكيپاج مۇشەسى بولعان. اپات سالدارىنان 38 ادام قازا تاپتى.
ءدال سول كۇنى سانكت-پەتەربۋرگ قالاسىندا ءوتۋى ءتيىس تمد-عا مۇشە مەملەكەتتەر باسشىلارىنىڭ بەيرەسمي كەزدەسۋىنە قاتىسۋ ءۇشىن ۇشىپ بارا جاتقان پرەزيدەنت يلحام اليەۆكە رەسەيدىڭ اۋە كەڭىستىگىندە بولعان اۋە اپاتى تۋرالى حابار جەتكىزىلدى. مەملەكەت باسشىسى دەرەۋ كەرى قايتۋ جونىندە تاپسىرما بەردى.
ۇشاق بورتىندا بولعان كەزىندە باسشى ءتيىستى مەملەكەتتىك ورگاندارعا اپاتتىڭ سەبەپتەرىن تەرگەۋ جانە شۇعىل شارالار قابىلداۋ جونىندە ناقتى تاپسىرمالار جۇكتەدى. يلحام اليەۆتىڭ تاپسىرماسىنا سايكەس، اۋە اپاتىنىڭ سەبەپتەرىن انىقتاۋ ءۇشىن پرەمەر-مينيستر ءالي اسادوۆتىڭ توراعالىعىمەن مەملەكەتتىك كوميسسيا قۇرىلدى. سونىمەن قاتار قازاقستانعا ازەربايجاننىڭ توتەنشە جاعدايلار ءمينيسترى، سونداي-اق تسيفرلىق دامۋ جانە كولىك ءمينيسترى باستاعان دەلەگاتسيا جىبەرىلدى.
پرەزيدەنت يلحام اليەۆتىڭ وكىمىنە سايكەس، 26 جەلتوقسان ازەربايجاندا ازا تۇتۋ كۇنى دەپ جاريالاندى.
26 جەلتوقساندا AZAL اۋە كومپانياسىنىڭ ۇشاعىمەن باكۋگە 4 قازا تاپقان ادامنىڭ ءمايىتى جانە 7 جارالانعان ادام جەتكىزىلدى، ال توتەنشە جاعدايلار مينيسترلىگىنىڭ ۇشاعىمەن تاعى 7 جارالى اكەلىندى. 21 جولاۋشى مەن 3 ەكيپاج مۇشەسىنىڭ ءمايىتى 27 جەلتوقساننان 28 جەلتوقسانعا قاراعان ءتۇنى جەتكىزىلدى.
اپاتتان زارداپ شەككەن ازاماتتار «ەني كلينيكادا» ەم قابىلدادى. سوڭعى ناۋقاس 2025 جىلعى 19 اقپاندا اۋرۋحانادان شىعارىلدى.
29 جەلتوقساندا گەيدار اليەۆ اتىنداعى حالىقارالىق اۋەجايدا باكۋ–گروزنىي رەيسىن ورىنداۋ كەزىندە قازا تاپقان Embraer 190 ۇشاعىنىڭ ەكيپاج مۇشەلەرىمەن قوشتاسۋ ءراسىمى ءوتتى. وعان پرەزيدەنت يلحام اليەۆ پەن ءبىرىنشى حانىم مەحريبان اليەۆا قاتىسىپ، مارقۇمداردىڭ وتباسى مەن جاقىندارىنا كوڭىل ايتتى.
قوشتاسۋ راسىمىنەن كەيىن ەكيپاجدىڭ ءۇش مۇشەسى — اۋە كەمەسىنىڭ كومانديرى يگور كشنياكين, ۇشقىش الەكساندر كاليانينوۆ جانە ستيۋاردەسسا وكيۋما اليەۆا — II قۇرمەتتى جەرلەۋ اللەياسىنا جەرلەندى. جەرلەۋ راسىمىنە مەملەكەت پەن ۇكىمەت وكىلدەرى، سونداي-اق قوعام قايراتكەرلەرى قاتىستى.
27 جەلتوقساندا تسيفرلىق دامۋ جانە كولىك ءمينيسترى راشاد نابيەۆ جۋرناليستەرگە بەرگەن سۇحباتىندا ۇشاق اپاتىنىڭ سەبەپتەرى جونىندە، ۇشاق قالدىقتارى مەن كۋاگەرلەردىڭ ايعاقتارىنا سۇيەنگەن ساراپشىلاردىڭ الدىن الا قورىتىندىسىن جاريالادى. ونىڭ ايتۋىنشا، ۇشاققا سىرتقى ارالاسۋ بولعان.
Embraer 190 ۇشاعىنىڭ سىرتقى فيزيكالىق جانە تەحنيكالىق ارالاسۋ سالدارىنان اپاتقا ۇشىراۋى جونىندەگى تەرگەۋدىڭ الدىن الا ناتيجەلەرى مەن اۋە رەيستەرىنىڭ قاۋىپسىزدىگىنە ءتونۋى مۇمكىن تاۋەكەلدەردى ەسكەرە وتىرىپ، AZAL كومپانياسى 28 جەلتوقساننان باستاپ رەسەيدىڭ بىرقاتار قالاسىنا رەيستەردى ۋاقىتشا توقتاتتى.
28 جەلتوقساندا رەسەي باسشىمى ۆلاديمير پۋتين ازەربايجان پرەزيدەنتى يلحام اليەۆكەتەلەفون سوقتى. تەلەفون ارقىلى سويلەسۋ بارىسىندا ۆلاديمير پۋتين جولاۋشىلار ۇشاعىنىڭ رەسەيدىڭ اۋە كەڭىستىگىندە فيزيكالىق ءارى تەحنيكالىق سىرتقى ارالاسۋعا ۇشىراۋىنىڭسالدارىنان قايعىلى وقيعا بولعانى ءۇشىن كەشىرىم سۇرادى. تەك بيىل قازان ايىندا پۋتين جولاۋشىلار ۇشاعى اپاتىنا ماسكەۋ جاۋاپتى ەكەنىن مويىندادى.
بيىل 4 اقپاندا قازاقستان اقتاۋداعى ۇشاق اپاتىن تەكسەرۋدىڭ الدىن الا قورىتىندىسىن جاريالادى. كولىك مينيسترلىگى مەن ۇشاق اپاتىن زەرتتەۋ جونىندەگى كوميسسيا «ۇشاق قاپتاماسىنداعى شۇرىق تەسىكتەر سىرتتان بوگدە زاتتار تيگەنىن كورسەتەدى»دەپ جازعان.
