شىمكەنت قالاسىنىڭ اكىمدىگى اپتاسىنا 24 ساعاتتان ارتىق جۇكتەمەمەن جۇمىس ىستەيتىن پەداگوگتەردى انىقتادى، دەپ حاباردايدى «ادىرنا» ءتىلشىسى.
تەكسەرۋ بارىسىندا 40, 50, 60, ءتىپتى 75 ساعات جۇكتەمەمەن جۇمىس ىستەيتىن مۇعالىمدەر بار ەكەنى بەلگىلى بولعان. بۇل تۋرالى شىمكەنت قالاسى اكىمىنىڭ ورىنباسارى سارسەن قۇرانبەك بريفينگتە مالىمدەدى.
ء«بىز جۇكتەمەسى 24 ساعاتتان اساتىن پەداگوگتەردىڭ بار ەكەنىن انىقتادىق. ءتىپتى 30–32 ساعاتتى ايتپاعاندا، 40–50 ساعاتتان 70 ساعاتقا دەيىن جۇكتەمەمەن جۇمىس ىستەيتىن مۇعالىمدەر بار ەكەن. ەگەر وسى 60 ساعاتتى مۇعالىمنىڭ 16 ساعاتتىق جۇكتەمەسىنە بولسەك، 4 شتاتتىق بىرلىك شىعادى. ياعني ءبىر ادام ءتورت ادامنىڭ جۇمىسىن اتقارىپ وتىر. مۇنى ءبىز قىركۇيەك ايىندا انىقتادىق جانە قاتتى تاڭعالدىق»،- دەدى سارسەن قۇرانبەك.
قالا اكىمىنىڭ ورىنباسارى بۇل ماسەلەگە بايلانىستى بۇعان دەيىن وقۋ-اعارتۋ مينيسترلىگىنە، پروكۋراتۋراعا جانە ەڭبەك ينسپەكتسياسىنا جۇگىنگەنىن ايتتى.
«ولارمەن كەڭەسە كەلە، مۇعالىمنىڭ جۇكتەمەسى 24 ساعاتتان اسپاۋى ءتيىس ەكەنىن انىقتادىق. ناتيجەسىندە قالاداعى 83 مەكتەپ بويىنشا شامامەن 2 مىڭ جاسىرىن بوس جۇمىس ورنىانىقتالدى، بۇل 1686 پەداگوگكە ارنالعان جۇكتەمە دەگەن ءسوز. كەيبىر ءبىلىم بەرۋ ۇيىمدارىندا ءبىر پەداگوگ وقۋ ءىسى جونىندەگى ورىنباسار بولا وتىرىپ، تاربيە ءىسى جونىندەگى ورىنباساردىڭ دا شتاتتىق بىرلىگىن قاتار اتقارعان. جۇمىس ۋاقىتى ساعات 9:00-دەن 18:00-گە دەيىن ەكەنىن ەسكەرسەك، قىزمەتكەردىڭ ەكى لاۋازىمدى ءبىر ۋاقىتتا قالاي اتقاراتىنى زاڭدى سۇراق تۋعىزادى. قازىرگى تاڭدا بىزدە 2300 بوس جۇمىس ورنى بار، ونىڭ 1165-ءى — جالپى ءبىلىم بەرەتىن مەكتەپ مۇعالىمدەرىنە ارنالىپ وتىر. ال تەحنيكالىق جانە كاسىپتىك ءبىلىم بەرۋ ۇيىمدارىندا 170 بوس ورىن بار. ارنايى جانە قوسىمشا ءبىلىم بەرۋ مەكەمەلەرىندە 150 ورىن, ونىڭ ىشىندە 35 ورىن — ۆەدومستۆولىق ورتالىقتاردا, ال 543 ورىن — پەداگوگيكالىق ەمەس قىزمەتكەرلەرگە ارنالعان. ال اۋلا سىپىرۋشىلار مەن تەحنيكالىق قىزمەتكەرلەر بىزدە جەتكىلىكتى»،-دەپ ءتۇسىندىردى ول.
سارسەن قۇرانبەكتىڭ ايتۋىنشا، وسى بريفينگتەن كەيىن بارلىق مەكتەپ انىقتالعان بوس جۇمىس ورىندارى بويىنشا كونكۋرس جاريالاپ, بىرنەشە كۇننەن سوڭ بوس ورىندار جارمەڭكەسىن وتكىزەدى.
