ىشكى ىستەر ءمينيسترىنىڭ ورىنباسارى يگور لەپەحا 28 قاڭتاردا استاناداعى سارايشىق كوپىرىندە بولعان جول-كولىك اپاتىنا قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
اپات سالدارىنان ەكى ادام قازا تاپقان. يگور لەپەحانىڭ ايتۋىنشا، ولار – وقيعاعا كىناسى جوق ادامدار. ال قارسى باعىتقا شىعىپ كەتكەن جۇرگىزۋشى ءتىرى قالعان.
«قىلمىستىق ءىس قوزعالدى. قازىر ءمان-جايدى انىقتاپ جاتىرمىز. قازا تاپقاندار — بۇل جاعدايعا كىنالى ادامدار ەمەس»، — دەدى ءمينيستردىڭ ورىنباسارى سەنات كۋلۋارىندا.
سونداي-اق ول جول اپاتىنا كىنالى ادامعا قانداي جازا قولدانىلۋى مۇمكىن ەكەنىن ايتتى.
«بۇل — ادام ولىمىنە اكەپ سوققان جول-كولىك وقيعاسى. مۇنداي جاعدايدا قىلمىستىق جاۋاپكەرشىلىك قاراستىرىلعان، باس بوستاندىعىنان ايىرۋ جازاسىنا دەيىن قولدانىلۋى مۇمكىن»،- دەپ قوستى ءمينيستردىڭ ورىنباسارى.
ايتا كەتەيىك، «Toyota» كولىگىنىڭ جۇرگىزۋشىسى سارايشىق كوشەسىمەن تۇركىستان كوشەسىنەن كەلە جاتىپ، كوپىر ۇستىندە رۋلگە يە بولا الماي قالعان. سونىڭ سالدارىنان ول قارسى بەتكە شىعىپ كەتىپ، ءوز جولىمەن كەلە جاتقان «Lada» جانە «Skoda» كولىكتەرىمەن سوقتىعىسقان.
