جاڭاوزەندە جانتۇرشىگەرلىك جول اپاتىنان ءبىر جولاۋشى قازا تاپتى

جاڭاوزەن قالاسىنا جاقىن ماڭداعى «وزەن» كەن ورنى اۋماعىندا ادام ولىمىمەن اياقتالعان جول-كولىك وقيعاسى تىركەلدى، دەپ حابارلايدى "ادىرنا".

وقيعا 26 قاڭتار كۇنى كەشكى ساعات 19:00 شاماسىندا ماڭعىستاۋ وبلىسى قاراقيا اۋدانىنا قاراستى وندىرىستىك ايماقتا بولعان. الدىن الا مالىمەتكە سايكەس، Mitsubishi L-200 ماركالى جول تالعامايتىن كولىكتىڭ جۇرگىزۋشىسى كولىك تىزگىنىنە يە بولا الماي، قارسى باعىتتا كەلە جاتقان SHACMAN جۇك كولىگىمەن سوقتىعىسقان.

سوقتىعىس سالدارىنان جول تالعامايتىن كولىكتە وتىرعان جولاۋشى وقيعا ورنىندا جان تاپسىردى. ال ءتۇرلى دارەجەدەگى دەنە جاراقاتىن العان جۇرگىزۋشى شۇعىل تۇردە مەديتسينالىق مەكەمەگە جەتكىزىلىپ، اۋرۋحاناعا جاتقىزىلدى.

اتالعان دەرەك بويىنشا قازاقستان رەسپۋبليكاسى قىلمىستىق كودەكسىنىڭ 345-بابىنىڭ 3-بولىگىنە سايكەس قىلمىستىق ءىس قوزعالدى. بۇل نورما جول قوزعالىسى نەمەسە كولىك قۇرالدارىن پايدالانۋ قاعيدالارىن بۇزۋ سالدارىنان ابايسىزدا ادام ولىمىنە اكەپ سوققان جاعدايلاردى قامتيدى.

جول اپاتىنا قاتىسقان كولىكتەر ارنايى ايىپتۇراققا قويىلدى. قازىرگى ۋاقىتتا وقيعانىڭ سەبەپ-سالدارىن جان-جاقتى انىقتاۋعا باعىتتالعان تەرگەۋ امالدارى جۇرگىزىلىپ جاتىر.