قازاقستاندىق ارالاس جەكپە-جەك شەبەرى شاۆكات راحمونوۆ UFC الاڭىنا شىقپاۋىنا نە سەبەپ بولعانىن ءتۇسىندىردى. بۇل تۋرالى ول ح الەۋمەتتىك جەلىسىندەگى جازباسىندا ايتتى، دەپ حابارلايدى "ادىرنا".
جازباسىندا سپورتشى ەكىنشى رەت وتا جاساتقانىن جانە تورلى الاڭعا شىعۋ مەرزىمى تاعى دا كەيىنگە شەگەرىلگەنىن مالىمدەدى.
"جاۋىنگەردىڭ جولى ەشقاشان وڭاي بولعان ەمەس. ءومىر بىزگە جەڭە المايتىن قيىندىقتاردى بەرمەيدى. ءاربىر ارماننىڭ ءوز قۇنى بار، كەيدە ول دەنساۋلىققا بايلانىستى بولادى. بۇگىن شىندىعىن ايتسام، جاراقاتىما بايلانىستى تاعى ءبىر وپەراتسيا جاساۋعا تۋرا كەلدى. تولىق قالپىنا كەلۋ ءۇشىن ۋاقىت قاجەت. سوندىقتان وكتاگونعا ورالۋىم كەيىنگە قالدىرىلدى", – دەدى شاۆكات راحمونوۆ.
ول بۇل جاڭالىقتىڭ ءوزى ءۇشىن اۋىر بولعانىن دا جاسىرمادى.
"مۇنى قابىلداۋ قيىن. الايدا ءاربىر شەگىنىس ۇلكەن جوسپاردىڭ ءبىر بولىگى ەكەنىنە شىن جۇرەكتەن سەنەمىن. مەن بۇرىنعىدان دا كۇشتىرەك، اقىلدىراق ءارى اش كۇيدە ورالامىن. ماقساتىم وزگەرگەن جوق – UFC بەلبەۋىن قازاقستانعا اكەلۋ. قانداي جاعداي بولماسىن، مەنى قولداپ جۇرگەن جاندارعا العىس ايتامىن", – دەدى سپورتشى.
الدىن الا مالىمەتكە سايكەس، شاۆكات راحمونوۆتىڭ تولىق قالپىنا كەلۋى ءۇشىن كەم دەگەندە 9 اي قاجەت.
