يران بيلىگى جاپپاي نارازىلىقتار كەزىندە قازا تاپقانداردىڭ الدىن الا ءتىزىمىن جاريالادى. 1 اقپان كۇنى پرەزيدەنت ماسۋد پەزەشكياننىڭ اكىمشىلىگى جاريالاعان قۇجاتتا 2 985 ادامنىڭ دەرەگى كورسەتىلگەن، دەپ حابارلايدى «ادىرنا» ءتىلشىسى.
مالىمدەمەدە رەسمي قازا تاپقاندار سانى 3 117 ادام دەپ كورسەتىلگەنى، ال جاريالانعان تىزىمدەگى مارقۇمدار سانى ودان 131-گە كەم ەكەنى ايتىلعان. بيلىك بۇل ايىرماشىلىقتى 131 ادامنىڭ جەكە باسى ءالى انىقتالماعانىمەن ءتۇسىندىردى، ولاردىڭ اتى-جوندەرى قوسىمشا تىزىمدە بەرىلمەك.
ايتا كەتەيىك، يرانداعى تولقۋلار 29 جەلتوقساندا ريال باعامىنىڭ كۇرت تومەندەۋىنە بايلانىستى وتكەن كوشەدەگى نارازىلىق اكتسيالارىنان كەيىن باستالىپ، ەلدىڭ كوپتەگەن ءىرى قالالارىن قامتىعان ەدى. يران سىرتقى ىستەر ءمينيسترى ابباس اراگچيدىڭ ايتۋىنشا، 8 قاڭتاردان باستاپ شەرۋشىلەر اراسىندا قارۋلى تەرروريستەر پايدا بولعان. تەگەراندا تارتىپسىزدىكتەردى ۇيىمداستىرۋ جاۋاپكەرشىلىگى يزرايل مەن اقش-قا جۇكتەلدى.
23 قاڭتاردا اراگچي قازا تاپقانداردىڭ جالپى سانى 3 117 ادام ەكەنىن حابارلاپ، ولاردىڭ اراسىندا بەيبىت تۇرعىندار دا، قاۋىپسىزدىك كۇشتەرىنىڭ قىزمەتكەرلەرى دە بار ەكەنىن مالىمدەگەن.
