قوستاناي وبلىسىنىڭ اكىمى قۇمار اقساقالوۆتىڭ توراعالىعىمەن ەلىمىزدىڭ جاڭا كونستيتۋتسياسى جوباسىن تالقىلاۋ جونىندەگى ايماق اكتيۆىنىڭ وتىرىسى ءوتتى. جيىنعا وبلىستىق ءماسليحات توراعاسى، وبلىستىق باسقارمالاردىڭ، اۋماقتىق دەپارتامەنتتەردىڭ باسشىلارى، قۇقىق قورعاۋ جانە ارناۋلى مەملەكەتتىك ورگانداردىڭ وكىلدەرى، سونداي-اق باق وكىلدەرى قاتىستى.
ۇلتتىق قۇرىلتايدىڭ V وتىرىسىندا مەملەكەت باسشىسى كونستيتۋتسيالىق رەفورمانىڭ نەگىزگى باعىتتارى تۋرالى ءوز كوزقاراسىن ۇسىنعان بولاتىن. ءوڭىر باسشىسى بۇل كونستيتۋتسيالىق رەفورما – قازاقستاننىڭ بولاشاق دامۋ مودەلىن ايقىندايتىن، قوعامنىڭ قۇندىلىقتىق باعدارىن ناقتىلايتىن ستراتەگيالىق يدەولوگيالىق قادام ەكەنىن اتاپ ءوتتى.
«اتا زاڭ جوباسى جارتى جىلعا جۋىق ازىرلەنىپ، قازىرگى زامانعى قوعامدىق سۇرانىستار مەن ەلدە بولىپ جاتقان ناقتى وزگەرىستەردى ەسكەرە وتىرىپ دايىندالعان. كونستيتۋتسيانىڭ تۇجىرىمدامالىق وزگەرىستەرى، ەڭ الدىمەن، مەملەكەتتىڭ ادامعا باعدارلانۋىن كۇشەيتۋگە، قازاقستان حالقىنىڭ وزەكتى قۇندىلىقتارى مەن قاعيداتتارىن كورسەتۋگە، سونداي-اق رەسپۋبليكانىڭ ساياسي ينستيتۋتتارى قۇرىلىمىنىڭ تيىمدىلىگىن ارتتىرۋعا باعىتتالعان.
جاڭا پرەامبۋلادا العاش رەت مەملەكەتتىڭ نەگىزگى باسىمدىعى رەتىندە ادام قۇقىقتارى مەن بوستاندىقتارى جاريالاندى جانە ادامعا دەگەن قۇرمەت، جاۋاپكەرشىلىك پەن ادىلەتتىلىك قاعيداتتارى قويىلىپ وتىر.
«ادام – مەملەكەت ءۇشىن ەمەس، مەملەكەت – ادام ءۇشىن» دەگەن ۇستانىم مەملەكەتتىڭ بارلىق ساياساتىنىڭ وزەگىنە اينالۋدا. بۇل – الەۋمەتتىك ادىلدىككە، تەڭ مۇمكىندىكتەرگە، زاڭ الدىنداعى تەڭدىككە نەگىزدەلگەن جاڭا قوعامدىق كەلىسىم»، – دەدى قۇمار اقساقالوۆ.
پرەزيدەنت باستاماشى بولعان «زاڭ جانە ءتارتىپ» يدەولوگياسىنىڭ كونستيتۋتسيادا ناقتى نورمالارمەن بەكىتىلۋى – قوعامداعى ءتارتىپ پەن تۇراقتىلىقتى قامتاماسىز ەتۋدىڭ بەرىك ىرگەتاسى. زاڭدى قۇرمەتتەۋ، جاۋاپكەرشىلىكتى سەزىنۋ، قوعامدىق تارتىپكە نولدىك توزىمدىلىك قاعيداتى – دامىعان جانە قاۋىپسىز مەملەكەتتىڭ باستى شارتى.
جاڭا كونستيتۋتسيادا ۇلتتىق بىرەگەيلىكتى ساقتاۋ مەن زاماناۋي قۇندىلىقتاردى ۇيلەستىرۋ يدەياسى ايقىندالدى. بىرلىك، كەلىسىم، تولەرانتتىلىق – كوپەتنوستى قازاقستان قوعامىنىڭ باستى ارتىقشىلىعى رەتىندە تانىلىپ، مەملەكەتتىلىكتىڭ مىزعىماس نەگىزى رەتىندە بەكىتىلدى.
قوستاناي وبلىسىنىڭ اكىمى جاڭا كونستيتۋتسيا جوباسىندا كوزدەلگەن وزگەرىستەردىڭ ءمانى مەن ماڭىزىن ايماعىمىزدىڭ ءاربىر تۇرعىنىنا جەتكىزىپ، ءتۇسىندىرۋ جۇمىستارىن جۇرگىزۋ – ورتاق مىندەت ەكەنىن جەتكىزدى. ال بۇل رەفورما ەلدىڭ جارقىن بولاشاعىن قامتاماسىز ەتۋگە، قوعامدىق تۇراقتىلىقتى نىعايتۋعا جانە ادىلەتتىلىك قاعيداتتارىن ورنىقتىرۋعا باعىتتالعان ماڭىزدى ءارى اۋقىمدى باستاما ەكەندىگىنە كامىل سەنەتىنىن ايتتى.
قوستاناي وبلىستىق ءماسليحاتىنىڭ توراعاسى سايلاۋبەك ەششانوۆ بۇل رەفورما شىن مانىندە قوعامنىڭ قازىرگى سۇرانىسى مەن تالاپتارىنا جاۋاپ بەرەتىن مەملەكەتتىك جانە قوعامدىق قۇرىلىمنىڭ جاڭا مودەلىن قالىپتاستىرىپ وتىرعانىن جەتكىزدى.
«كونستيتۋتسيا جوباسى قولدانىستاعى ءماتىندى جاڭارتىپ قانا قويماي، مەملەكەتتىڭ جاڭا قۇقىقتىق، ينستيتۋتسيونالدىق جانە الەۋمەتتىك ارحيتەكتۋراسىن قالىپتاستىرادى. ول قازىرگى زامانعى سىن-قاتەرلەرگە باعىتتالعان، ادامنىڭ قۇقىعى مەن بوستاندىعىن نىعايتادى، ازاماتتىق قوعامنىڭ ءرولىن كەڭەيتەدى جانە ساياسي جۇيەنىڭ تۇراقتىلىعىن ارتتىرادى»، – دەدى سايلاۋبەك ەشانوۆ.
