قازاقستان رەسپۋبليكاسىنىڭ كونستيتۋتسيالىق سوتى پرەزيدەنتتىڭ 2026 جىلعى 15 ناۋرىزداعى ءوتىنىشى بويىنشا جاڭا كونستيتۋتسيانىڭ بىرقاتار باپتارىنا رەسمي تۇسىندىرمە بەردى.
وتىنىشتە 1995 جىلعى كونستيتۋتسياعا سايكەس لاۋازىمىن اتقارىپ جۇرگەن ادامداردىڭ 2026 جىلعى كونستيتۋتسيانىڭ 43-بابىنىڭ 1-تارماعىندا، 72-بابىنىڭ 2 جانە 3-تارماقتارىندا، 83-بابىنىڭ 1-تارماعىندا جانە 84-بابىنىڭ 3-تارماعىندا كوزدەلگەن قىزمەتتەرگە قايتا سايلانۋى نەمەسە تاعايىندالۋى مۇمكىن بە دەگەن ماسەلە كوتەرىلگەن.
كونستيتۋتسيالىق سوتتىڭ تۇسىندىرۋىنشە، جاڭا كونستيتۋتسيادا بەلگىلەنگەن شەكتەۋلەر تەك 2026 جىلعى كونستيتۋتسيا مەن سوعان سايكەس قابىلدانعان نورماتيۆتىك قۇقىقتىق اكتىلەر اياسىندا جۇزەگە اسىرىلعان سايلاۋ نەمەسە تاعايىنداۋ فاكتىلەرىنە قاتىستى قولدانىلادى.
سوتتىڭ اتاپ وتۋىنشە، كونستيتۋتسيادا 1995 جىلعى نەگىزگى زاڭ قولدانىستا بولعان كەزەڭدەگى قىزمەتتە بولۋ مەرزىمدەرىن نەمەسە سول كەزەڭدەگى سايلانۋ مەن تاعايىندالۋ فاكتىلەرىن ەسەپكە الۋ تۋرالى ەرەجە قاراستىرىلماعان.
وسىعان بايلانىستى، ازاماتتىڭ 1995 جىلعى كونستيتۋتسيا كەزەڭىندە اتالعان لاۋازىمداردىڭ ءبىرىن اتقارعانى 2026 جىلعى كونستيتۋتسيا 2026 جىلعى 1 شىلدەدەن باستاپ كۇشىنە ەنگەننەن كەيىن ونى قايتادان ءتيىستى قىزمەتكە سايلاۋعا نەمەسە تاعايىنداۋعا كونستيتۋتسيالىق-قۇقىقتىق كەدەرگى بولىپ سانالمايدى. قورىتىندىسىندا كونستيتۋتسيالىق سوت جاڭا كونستيتۋتسيانىڭ 43-بابىنىڭ 1-تارماعى، 72-بابىنىڭ 2 جانە 3-تارماقتارى، 83-بابىنىڭ 1-تارماعى جانە 84-بابىنىڭ 3-تارماعى 1995 جىلعى كونستيتۋتسياعا سايكەس قىزمەت اتقارعان ادامداردىڭ 2026 جىلعى كونستيتۋتسيا كۇشىنە ەنگەننەن كەيىن ءتيىستى لاۋازىمدارعا سايلانۋىنا نەمەسە تاعايىندالۋىنا مۇمكىندىك بەرەدى دەپ رەسمي ءتۇسىندىردى.
سونداي-اق اتالعان نورمالارداعى شەكتەۋلەردى قولدانۋ تۇرعىسىنان مۇنداي سايلاۋ نەمەسە تاعايىنداۋ 2026 جىلعى كونستيتۋتسيا كۇشىنە ەنگەننەن كەيىنگى العاشقى سايلانۋ نەمەسە العاشقى تاعايىندالۋ بولىپ ەسەپتەلەتىنى اتاپ ءوتىلدى.
