جاڭا كونستيتۋتسيانىڭ جوباسى كاسىبي زاڭگەرلەردىڭ، ءارتۇرلى سالا ساراپشىلارىنىڭ جانە ازاماتتىق قوعام وكىلدەرىنىڭ ۇزاق ءارى جۇيەلى جۇمىسى ناتيجەسىندە ازىرلەندى. بۇل تۋرالى كونستيتۋتسيالىق رەفورما جونىندەگى كوميسسيانىڭ سەگىزىنشى وتىرىسىندا ءماجىلىس دەپۋتاتى، «Respublika» پارتياسىنىڭ جەتەكشىسى ايداربەك قوجانازاروۆ مالىمدەدى.
ايداربەك قوجانازاروۆ، رەفورمانى تالقىلاۋ التى ايدان استام ۋاقىت بويى جۇرگىزىلگەنىنە توقتالدى. وسى كەزەڭ ىشىندە جۇزدەگەن، مىڭداعان ازامات ءوز ۇسىنىستارىن جولدادى. كوميسسيا مۇشەلەرى عانا ەمەس، جۇرتشىلىق تا بۇل قۇجاتتى قازىرگى زامان تالاپتارىنا تولىق جاۋاپ بەرەتىن، تەرەڭ ويلاستىرىلعان جانە ەلدىڭ ۇزاق مەرزىمدى دامۋ باعدارىن ايقىندايتىن ماڭىزدى قۇجات رەتىندە باعالاپ وتىر. سوعان وراي ول جاڭا كونستيتۋتسيانىڭ جوباسىن رەفەرەندۋمعا شىعارۋدى ۇسىندى.
«كونستيتۋتسيالىق كوميسسيانىڭ مۇشەسى رەتىندە جەكەلەگەن باپتاردىڭ رەداكتسياسى پىسىقتالعاننان كەيىن جاڭا كونستيتۋتسيا جوباسىن جالپىحالىقتىق داۋىس بەرۋگە – رەفەرەندۋمعا شىعارۋدى ۇسىنامىن»، – دەدى دەپۋتات.
ايتا كەتسەك، بۇعان دەيىن ايداربەك قوجانازاروۆ ۇلتتىق ۆاليۋتانىڭ مارتەبەسىن كونستيتۋتسيادا بەكىتۋدى ۇسىنعان ەدى. ونىڭ ايتۋىنشا، تەڭگەنى اتا زاڭدا ناقتى كورسەتۋ ەكونوميكالىق تاۋەلسىزدىكتى نىعايتىپ، قارجى ساياساتىنىڭ تۇراقتىلىعىن قامتاماسىز ەتەدى. قازىرگى تاڭدا تەڭگەنىڭ مارتەبەسى زاڭمەن رەتتەلگەنىمەن، الەمدىك قارجى جۇيەسى وزگەرىپ جاتقان جاعدايدا بۇل نورمانى كونستيتۋتسيا دەڭگەيىندە بەكىتۋ ماڭىزدى.
دەپۋتات بۇل تاجىريبە باسقا ەلدەردە دە بار ەكەنىن اتاپ ءوتتى. مىسالى، ءازىربايجاندا – مانات، ارمەنيادا – دراما، قىرعىزستاندا – سوم ۇلتتىق ۆاليۋتا رەتىندە كونستيتۋتسيادا كورسەتىلگەن. وسىعان بايلانىستى ول «قازاقستاننىڭ ۇلتتىق ۆاليۋتاسى – تەڭگە» نورماسىن كونستيتۋتسيا جوباسىنا ەنگىزۋدى ۇسىندى.
ال ءماجىلىس دەپۋتاتى نۇرتاي سابيليانوۆ تەڭگەنىڭ تەك اقشا اينالىمىنىڭ نەگىزى عانا ەمەس، سونىمەن بىرگە ونىڭ تۇراقتىلىعىن قامتاماسىز ەتەتىن ەميسسيالىق ورگان – قازاقستان رەسپۋبليكاسى ۇلتتىق بانكىنىڭ ءرولىن كونستيتۋتسيادا ناقتى كورسەتۋ قاجەتتىگىن اتاپ ءوتتى.
