ابزال قۇسپان: قاراپايىم فاشيزم

3301
Adyrna.kz Telegram
قاراپايىم فاشيزم
مەن شىنىمدى ايتسام، يسلام ابىشەۆتىڭ وسى كەزگە دەيىن ءتىرى جۇرگەنىنە تاڭ قالامىن. ىستەمەگەندەرى جوق قوي جاۋلارىنىڭ. ءيا، ول كىسىگە ولەردەي وشتەسىپ، جاۋىعىپ، تۇرمەدەن ءتىرى شىعارمايمىز دەپ بەكىنگەن توپ بار.
يسەكەڭ باسىنان تاپسىرىسپەن قامالىپ، تاپسىرىسپەن سوتتالعان ادام. بەرىلگەن تاپسىرىستىڭ نەگىزگى ءمانى - ول كىسىنىڭ مۇددەسىندە بەرىلگەن بارلىق وتىنىشتەرگە باس تارتىلۋ كەرەك ەكەن، سولاي بولدى دا.
ءسوزىم دالەلدى بولۋى ءۇشىن، باسىنان باستايىن، وندا دا ەڭ نەگىزگىلەرىنە توقتالىپ كەتەيىن:
مەن ادۆوكات بوپ ىسكە كىرىسكەندە، تەرگەۋشىنىڭ ءىستى قازاق تىلىندە جۇرگىزۋگە تيىم سالعانىن ەستىپ ءبىر شوك بولدىم. ول تەك باسى ەكەن. مەنىڭ جازعان ارىزىمدى باس پروكۋراتۋرا قاناعاتتاندىرۋسىز قالدىرادى. تەرگەۋ سوتىنا بەرىپ، سوتتاسىپ ءجۇرىپ اۋپىرىمدەپ قازاقشا سويلەۋگە رۇقسات الامىز.
ودان كەيىن بىرىنەن سوڭ ءبىرى باستالدى. ايدىڭ كۇنى اماندا تەرگەۋشىلەر يسلام ابىشەۆ پەن سەرىك تۇكيەۆتى ادۆوكاتسىز الدىرتىپ، ەكەۋىنە ء“وز ەرىكتەرىمەن” ارىز جازدىرتىپ، حالىقارالىق “قازاق كۇرەسى” فەدەراتسياسىنان كەتىرىپ، ورنىنا شپەكباەۆ ءوزى وتىرىپ الادى.
ارىز جازعان پارا بەرۋشى ازامات شايمەردەنوۆتىڭ سەكسوت ەكەنىن ايتامىن، ايتىپ قانا قويماي ونى قۇجات تۇرىندە دالەلدەپ بەرەمىز.
وسى ءىستى قولدان ۇيىمداستىرعان انتيكوردىڭ جەدەل قىزمەت دەپارتامەنتى باسشىسى، ياعني ءوز تىلدەرىندە ايتقاندا شايمەردەنوۆتىڭ “قوجايىنى” مەن پروۆوكاتور ەكەۋىنىڭ ءوزارا تىعىز بايلانىسىن دالەلدەپ بەرەمىز.
ءىستىڭ پروۆوكاتسياعا قۇرىلعانىن قۇجات تۇرىندە، بايلانىس قۇرالدارى جانە كۋالەردىڭ جاۋاپتارى ارقىلى دالەلدەپ بەرەمىز.
ءۇش اي بويى تەلەفونى تىڭدالىپ، پاراعا قاتىستى ەش اڭگىمە ايتىلماسا دا، “پارا العىسى كەلگەن سياقتى” - دەپ قورىتىندى جازىپ بەرگەن ساراپشىلاردىڭ ارەكەتى زاڭسىز ەكەنىن، وزدەرىنىڭ ەڭ ۇلكەن باسشىلىعى - رەسپۋبليكالىق ساراپتاما ورتالىعى قورىتىندىسىمەن دالەلدەپ بەردىك. جىبەرگەن ورەسكەل زاڭ بۇزۋشىلىعى ءۇشىن ساراپشىنى جاۋاپكەرشىلىككە دە تارتقىزدىق.
ءۇش اي بويى “رازرابوتكادا” جۇرسە دە، پارا الماي قويعان ابىشەۆكە، پارا الۋعا وقتالدى، ياعني پارا العىسى كەلدى دەپ ايىپ تاعۋدىڭ جالپى ابسۋرد ەكەنىن دالەلدەپ بەردىك.
قازاقشا ءبىر اۋىز ءسوز ايتا المايتىن سۋديانىڭ، ءبىزدىڭ ءىستى قاراپ جاتقان سۋدياعا قاتىستى قارسىلىقتى (وتۆود) قاراي المايتىنىن دالەلدەدىك. ول سۋديانى جۇمىستان كەتىردىك.
بىردە-ءبىر دالەلدى، نەگىزدى ءوتىنىشىمىز نە تەرگەۋدە، نە سوتتا وتپەي قويعاسىن، بەس ادۆوكات جوعارعى سوت الدىنا ميتينگىگە شىعۋعا دا ءماجبۇر بولدىق.
بىراق سوندا دا، يسەكەڭە بايلانىستى زاڭ ەش جۇمىس جاساماي قويدى.
ەندى بۇگىن ادۆوكاتى ماكيش ەسكاراەۆپەن حابارلاسىپ تاعى شوك بولىپ وتىرمىن. يسەكەڭدى بۇلار تۋرا ماعىناسىندا ولتىرگەلى وتىر دەيدى! سوڭعى 6 ايدا كولونيا باسشىلىعى نە وزدەرى ەم جاسامايدى، نە ارنايى ەمدەۋ مەكەمەسىنە جىبەرمەيدى، تىم قۇرىسا، كوۆيدكە قارسى ەكپە الايىن دەسە وعان دا رۇقسات ەتپەيدى! زەينەت جاسىنداعى، جۇرەكتەن ەسەپتە تۇرعان ادامعا نەگە ولاي ىستەيسىڭدەر دەسە، جوعارىدان تاپسىرما سولاي دەيتىن كورىنەدى! بىلتىر سوت تەرگەۋى كەزىندە، سوت زالىندا، ەلدىڭ كوزىنشە جۇرەكتەن پريستۋپ ۇستاپ ءتورت رەت قۇلاپ، جەدەل جاردەم شاقىرعانىمىز ەسىمدە. ال قازىر جەدەل جاردەم تۇرماق، كوۆيدكە قارسى ەكپە الۋعا دا رۇقسات بەرمەي، قاتايىپ وتىر كولونيا باسشىلىعى!
شىنىمدى ايتسام، الداعى سوتتان ءوز باسىم ەش ءۇمىت كۇتپەيمىن. تەرگەۋ ءىسىن زاڭداستىرىپ بەرەتىن نوتاريۋستاردان نە قايران؟ ءۇمىتىم تەك قانا «Human Rights Watch»، بۇۇ جانىنداعى ادام قۇقىعى كوميتەتى سياقتى حالىقارالىق ۇيىمداردا عانا. بۇگىن تۇسكە دەيىن اتالعان ۇيىمدارعا اعىلشىن تىلىندە حابارلاما جولدادىم!
"ادىرنا" ۇلتتىق پورتالى
پىكىرلەر