يسلامابادتا قازاقستان مەن پاكىستان اراسىنداعى عىلىم، ءبىلىم جانە مادەنيەت سالالارىنداعى ىنتىماقتاستىقتى نىعايتاتىن بىرقاتار ماڭىزدى جوبا جۇزەگە استى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك مالىمدەدى، دەپ حابارلايدى "ادىرنا".
ۇلتتىق عىلىم جانە تەحنولوگيالار ۋنيۆەرسيتەتىندە Satbayev University سەرىكتەستىگىمەن قۇرىلعان قانىش ساتباەۆ اتىنداعى عىلىمي-ءبىلىم بەرۋ ورتالىعى اشىلدى. جاڭا الاڭ بىرلەسكەن زەرتتەۋلەر جۇرگىزۋگە، اكادەميالىق الماسۋدى دامىتۋعا جانە ينجەنەرلىك كادر دايارلاۋعا باعىتتالعان.
«قانىش ساتباەۆ ەسىمى تەك تاريحتىڭ ەنشىسىندە قالماۋى كەرەك. ول ەرتەڭگى زەرتتەۋلەرمەن، جاس عالىمداردىڭ ىزدەنىسىمەن جانە تەحنولوگيالىق سەرپىنمەن قاتار اتالۋى ماڭىزدى»، – دەدى ساياسات نۇربەك.
سونداي-اق كايد-ي-ازام ۋنيۆەرسيتەتىندە ءال-فارابي اتىنداعى ورتالىق ىسكە قوسىلدى. بۇل ورتالىق گۋمانيتارلىق ىنتىماقتاستىقتى كەڭەيتۋگە، قازاق مادەنيەتىن ناسيحاتتاۋعا جانە ءبىلىم بەرۋ باستامالارىن دامىتۋعا مۇمكىندىك بەرەدى. اتاپ ايتقاندا، قازاق ءتىلىن وقىتۋعا قاتىستى جوبالار قولعا الىنباق.
ال يسلامابادتاعى حالىقارالىق يسلام ۋنيۆەرسيتەتى بازاسىندا قوجا احمەت ياساۋي اتىنداعى ورتالىق ازيانىڭ يسلام ويى، مادەنيەتى جانە وركەنيەتى بويىنشا عىلىمي-زەرتتەۋ ورتالىعى اشىلدى. جاڭا قۇرىلىم ورتاق زياتكەرلىك مۇراعا نەگىزدەلگەن عىلىمي ىزدەنىستەر مەن اكادەميالىق ديالوگتى دامىتۋعا باعىتتالعان.
رەسمي باعدارلامادان تىس وتكەن كاسىبي كەزدەسۋلەردىڭ دە ماڭىزى ەرەكشە بولدى.
«كوبىنە ءدال وسىنداي بەيرەسمي ديالوگتار ەڭ تۇراقتى ءارى ومىرشەڭ ارىپتەستىكتىڭ ىرگەسىن قالايدى»، – دەپ اتاپ ءوتتى مينيستر.
ونىڭ پىكىرىنشە، بۇل باستامالار ەكى ەل اراسىنداعى ىنتىماقتاستىقتىڭ جاڭا دەڭگەيگە كوتەرىلگەنىن كورسەتەدى.
«قازاقستان مەن پاكىستان اراسىنداعى عىلىم جانە ءبىلىم سالاسىنداعى ىقپالداستىق تەرەڭدەي ءتۇسىپ كەلەدى. بۇل ۇدەرىستە ادامدار، ۋنيۆەرسيتەتتەر جانە ناقتى بىرلەسكەن جوبالار باستى قوزعاۋشى كۇشكە اينالىپ وتىر»، – دەدى ساياسات نۇربەك.
