2024 جىلدىڭ ءساۋىر ايىنىڭ باسىندا Jusan bank, Bank RBK, Halyk bank, «بانك تسەنتركرەديت»، «ەۋرازيالىق بانك» جانە «نۇربانككە» مەملەكەتتىك قولداۋ ساقتالىپ وتىر. مەملەكەتتىڭ قولداۋدىڭ جالپى سوماسى 1,7 ترلن تەڭگەنى قۇرايدى. بۇل تۋرالى قارجى نارىعىن رەتتەۋ جانە دامىتۋ اگەنتتىگى جاريالادى، دەپ حابارلايدى “ادىرنا” ۇلتتىق پورتالى.
اگەنتتىك مەملەكەتتىك بيۋدجەت، ۇلتتىق قور، ۇلتتىق بانك جانە (نەمەسە) ونىڭ ەنشىلەس ۇيىمدارىنىڭ، ونىڭ ىشىندە بانكتىڭ قارجىلىق تۇراقتىلىعىن جانە (نەمەسە) ساۋىقتىرىلۋىن قامتاماسىز ەتۋ ءۇشىن كۆازيمەملەكەتتىك سەكتور سۋبەكتىلەرى ارقىلى تارتىلعان قاراجاتتاردى پايدالانا وتىرىپ ورنالاستىرىلعان، ساتىپ الىنعان نەمەسە بانككە بەرىلگەن سالىمدار، وبليگاتسيالار، قارىزدار بويىنشا بانكتىڭ مىندەتتەمەلەرى مەملەكەتتىك قولداۋ دەپ تانىلاتىنىن اتاپ ءوتتى.
«مەملەكەتتىك قولداۋ اياسىندا بولىنگەن قاراجاتتى بانكتەر جاسالعان كەلىسىمشارت شارتتارىنا سايكەس قايتارادى»، - دەپ اتاپ وتەدى ۆەدومستۆودان اگەنتتىكتىڭ رەسمي ساۋالىنا بەرگەن جاۋابىندا.
بۇل رەتتە، 2023 جىلدىڭ 1 قاڭتارىنان باستاپ مەملەكەتتىك قولداۋ العان بانكتەر مەملەكەتتىك قولداۋ ەسەبىنەن تۇسكەن كىرىس ەسەبىنەن اكتسيونەرلەرگە ديۆيدەنت تولەي المايدى. سونىمەن قاتار تەرىس كاپيتال بولعان جاعدايدا ديۆيدەند تولەۋگە تىيىم سالىنعان. سونىڭ ارقاسىندا وتكەن جىلى Halyk bank پەن Bank RBK 81,3 ملرد تەڭگە 68,4 جانە 12,9 ملرد تەڭگە) كولەمىندە مەملەكەتتىك كومەكتى جارتىلاي قايتاردى.
بۇعان قوسا، ءۇش قارجى ۇيىمى بانك سەكتورىنىڭ قارجىلىق تۇراقتىلىعىن ارتتىرۋ باعدارلاماسىنىڭ قاتىسۋشىسى سانالادى. ولار: «ەۋرازيالىق بانك»، «بانك تسەنتركرەديت» جانە «نۇربانك». بۇل بانكتەرگە اتالعان باعدارلامادان شىققانعا دەيىن ديۆيدەند تولەۋگە تولىقتاي تىيىم سالىنعان.
باعدارلاما قاتىسۋشىلارى 5 جىل بويى ورىندالۋى ءتيىس مىندەتتەمەنى الادى. ولار مىنالارى:
- اكتسيونەرلەردىڭ جارعىلىق كاپيتالعا اقشا قۇيۋى نەمەسە بولىنبەگەن تازا پايدانى جيناقتاۋ جولىمەن بانكتى كاپيتالداندىرۋ;
- اكتسيونەرلەر قۇرىلىمىنىڭ ترانسپارەنتتىلىگىن ارتتىرۋ (تۇپكىلىكتى بەنەفيتسيارلاردى انىقتاۋ);
- بانكتىڭ قارىز قاراجاتى ەسەبىنەن بانكتى كاپيتالداندىرۋدى جۇزەگە اسىرماۋ;
- بانكتىڭ باسشى قىزمەتكەرلەرىنە بەلگىلەنبەگەن سىياقىلار (بونۋستار) تولەۋدى شەكتەۋ;
- بانك اكتسيونەرلەرىنە جاي اكتسيالار بويىنشا ديۆيدەندتەر تولەۋدى شەكتەۋ;
- اگەنتتىك ايقىنداعان ولشەمشارتتارعا سايكەس تاۋەكەل دەڭگەيى جوعارى قارىزدار بەرۋدى شەكتەۋ.
ەگەر بانك وزىنە العان مىندەتتەمەلەردى ورىنداماسا، وندا قارجى نارىعىن رەتتەۋ جانە دامىتۋ اگەنتتىگى قاداعالاۋ دەن قويۋ شارالارىن قابىلداۋعا نەمەسە بانكتىڭ ءىرى اكتسيونەرىن مەملەكەتكە اۋىستىرۋدى كوزدەيتىن وبليگاتسيالاردى جاي اكتسيالارعا ايىرباستاۋعا قۇقىلى.
قاداعالاۋ سيپاتىنداعى شارالارعا قانداي دا ءبىر بۇزۋشىلىقتى جويۋ تۋرالى ۇيعارىم، ايىپپۇل (جويىلماعان جاعدايدا) جانە ليتسەنزيادان ايىرۋ كىرەدى.
