قازاقستاندىق ۇن العاش رەت اقش نارىعىنا شىعىپ، نيۋ-يورك پەن چيكاگو قالالارىنداعى دۇكەن سورەلەرىندە ساتىلىمعا ءتۇستى، دەپ حابارلايدى «ادىرنا» ءتىلشىسى.
«قازاقستاننىڭ اگروونەركاسىپتىك كەشەنى ونىمدەرىنىڭ ەكسپورتتىق الەۋەتىن ارتتىرۋ ماقساتىندا Global New York Chamber ofCommerce پرەزيدەنتى سامات ومىرزاقوۆ پەن قوستاناي قالاسىنداعى «سالامات» جشس، سونداي-اق قازاقستان رەسپۋبليكاسىنىڭ نيۋ-يورك قالاسىنداعى باس كونسۋلدىعىنىڭ قولداۋىمەن قازاقستاندىق ءونىمدى امەريكالىق تۇتىنۋشىلارعا جەتكىزۋ جوباسى ىسكە اسىرىلۋدا. جوعارى ساپالى ورگانيكالىق ۇن ونىمدەرى اقش-تىڭ جەتەكشى بولشەك ساۋدا جەلىلەرىنە، ونىڭ ىشىندە Walmart, Whole Foods, Amazon Prime جانە باسقا دا ءىرى ساۋدا ورىندارىنا جەتكىزىلدى»،—دەپ جازدى قازاقستاننىڭ نيۋ-يورك قالاسىنداعى باس كونسۋلدىعى.
بۇل باستاما قازاقستان مەن اقش اراسىنداعى ساۋدا-ەكونوميكالىق ىنتىماقتاستىقتى كەڭەيتۋگە، سونداي-اق قازاقستاندىق اگروونەركاسىپتىك ءونىمنىڭ جاڭا ەكسپورتتىق مۇمكىندىكتەرىن اشۋعا جول اشپاق.
"قازاقستاندىق ونىمدەردىڭ اقش نارىعىنا شىعۋى ەلىمىزدىڭ اگروونەركاسىپتىك كەشەنىنىڭ جوعارى الەۋەتىن كورسەتەدى. ءبىز «Product of Kazakhstan» بەلگىسى بار ءونىمنىڭ ساپاسى مەن ەكولوگيالىق تازالىعىن باعالايتىن امەريكالىق تۇتىنۋشىلار تاراپىنان كەڭ سۇرانىسقا يە بولاتىنىنا سەنىمدىمىز،" — دەدى Global New York Chamber of Commerce پرەزيدەنتى سامات ومىرزاقوۆ.
