اقش اسكەرى بىرنەشە كۇندىك ۇزىلىستەن كەيىن يرانعا قارسى جاڭا سوققىلار سەرياسىن جاساعانىن مالىمدەدى، دەپ حابارلايدى «ادىرنا» ءتىلشىسى BBC-گە سىلتەمە جاساپ.
ۆاشينگتون بۇل ارەكەتتى تەگەراننىڭ وڭىردەگى امەريكالىق كۇشتەرگە شابۋىل جاساۋ ارەكەتىنە جاۋاپ دەپ اتادى. بۇعان دەيىن اقش پرەزيدەنتى دونالد ترامپ يراننىڭ يوردانياداعى امەريكالىق اسكەري بازاعا جاساعان شابۋىلىنان كەيىن «وتە كۇشتى» سوققى بەرىلەتىنىن ايتقان بولاتىن.
«29 شىلدەدە اقش-تىڭ شىعىس جاعالاۋى ۋاقىتى بويىنشا ساعات 20:00-دە امەريكا قۇراما شتاتتارىنىڭ قارۋلى كۇشتەرى يران اۋماعىنا سوققى جاساي باستادى. بۇل سوققىلار – تاياۋ شىعىستا ورنالاسقان امەريكالىق اسكەري كۇشتەرگە يران تاراپىنان جاسالعان شابۋىل ارەكەتىنە بەرىلگەن قۋاتتى جاۋاپ»، – دەپ جازدى اقش ورتالىق قولباسشىلىعى (CENTCOM) X الەۋمەتتىك جەلىسىندە.
ساعات 22:00-دە «قۋاتتى سوققىلار سەرياسى» اياقتالعانى حابارلاندى. CENTCOM مالىمەتىنشە، شابۋىلدار يسلام رەۆوليۋتسياسى ساقشىلارى كورپۋسىنىڭ ونداعان نىسانىنا، سونىڭ ىشىندە باسقارۋ ورتالىقتارىنا، زىمىراندار مەن ۇشقىشسىز ۇشۋ اپپاراتتارىن ۇشىرۋ الاڭدارىنا جانە جاعالاۋ كۇزەتى وبەكتىلەرىنە باعىتتالعان.
Reuters اگەنتتىگىنىڭ حابارلاۋىنشا، يراننىڭ وڭتۇستىگىندەگى بىرنەشە اۋداندا جارىلىستار ەستىلگەن. مەملەكەتتىك تەلەارنا احۆاز قالاسىندا جارىلىستار بولعانىن مالىمدەدى. Tasnim اگەنتتىگى كەشم ارالىنداعى تۇرعىن اۋداننىڭ زىمىران سوققىسىنا ۇشىراعانىن حابارلادى.
بۇل – ترامپ وتكەن جۇما كۇنى 13 ءتۇن قاتارىنان جالعاسقان ءوزارا شابۋىلداردان كەيىن كەلىسسوزدەردى قايتا جانداندىرۋعا مۇمكىندىك بەرۋ ءۇشىن بومبالاۋدى توقتاتقاننان بەرگى اقش-تىڭ يرانعا جاساعان العاشقى سوققىسى.
اقش-تىڭ جاڭا شابۋىلدارى سەيسەنبى كۇنى يراننىڭ يوردانياداعى امەريكالىق اسكەري بازاعا جاساعان شابۋىلىنا جاۋاپ رەتىندە جۇزەگە اسىرىلدى. امەريكالىق اسكەريلەردىڭ مالىمەتىنشە، سول كەزدە ۇشىرىلعان بارلىق يراندىق زىمىران اۋەدە جويىلعان.
سارسەنبى كۇنى اق ۇيدە جۋرناليستەر الدىندا سويلەگەن دونالد ترامپ: ء«بىز ولارعا وتە كۇشتى سوققى بەرەمىز، ويتكەنى ەندىگى كەزەك بىزدىكى. ولار مۇنىڭ بولاتىنىن بىلەدى. ءتىپتى بىزدەن مۇنى جاساماۋدى سۇرادى. قاشان دا ءبىر كەلىسىمگە كەلۋ مۇمكىندىگى بولار. بىراق ءبىز ءبارىبىر وتە كۇشتى سوققى جاسايمىز»، – دەدى.
