يران ءيزرايلدىڭ ليۆانعا جاساعان شابۋىلدارىنان كەيىن ورمۇز بۇعازىن قايتادان جاۋىپ تاستادى. بۇل تۋرالى Fars اگەنتتىگى جازدى، دەپ حابارلايدى «ادىرنا» ءتىلشىسى.
ء«يزرايلدىڭ ليۆانعا جاساعان شابۋىلدارىمەن قاتار ورمۇز بۇعازى ارقىلى تانكەرلەردىڭ ءوتۋى توقتاتىلدى»، — دەلىنگەن حابارلامادا.
بۇعازدىڭ جابىلۋى تەگەران مەن ۆاشينگتون اراسىنداعى ەكى اپتالىق اتىستى توقتاتۋ كەلىسىمى كۇشىنە ەنگەن كۇنمەن تۇسپا-تۇس كەلىپ وتىر. بۇعان دەيىن اقش جانە يزرايلمەن قاقتىعىستا قول جەتكىزىلگەن بىتىمنەن كەيىن ەكى تانكەرگە يراننان پارسى جانە ومان شىعاناعىن قوساتىن باعىت ارقىلى قاۋىپسىز وتۋگە رۇقسات بەرىلگەن ەدى. قازىر قوزعالىس توقتاتىلدى.
ەسكە سالايىق، اقش پرەزيدەنتى دونالد ترامپ 8 ءساۋىر تۇنىندە يرانمەن ەكى اپتاعا اتىستى توقتاتۋ تۋرالى كەلىسىمگە قول جەتكىزىلگەنىن مالىمدەگەن ەدى. كەيىن يران سىرتقى ىستەر ءمينيسترى ابباس اراكچي ورمۇز بۇعازىن اشاتىنىن ايتىپ، بۇل بۇعاز الەمدىك مۇناي، مۇناي ونىمدەرى جانە سۇيىتىلعان تابيعي گاز جەتكىزىلىمىنىڭ شامامەن 20%-ىن قامتيتىنىن ەسكەرتكەن. ال 9 ساۋىرگە قاراعان ءتۇنى يزرايل ليۆانعا جويقىن سوققى جاساعان بولاتىن.
