13 قازاندا ريم پاپاسى XIV لەۆ قاتەرلى ىسىك دياگنوزى قويىلعاننان كەيىن وكپەسىنە وتا جاساتتى. پونتيفيكتىڭ وڭ جاق وكپەسىنىڭ ءبىر بولىگى الىنىپ تاستالدى. بۇل تۋرالى Vatican News جازدى، دەپ حابارلايدى «ادىرنا» ءتىلشىسى.
قاسيەتتى تاقتىڭ ءباسپاسوز قىزمەتى دارىگەر لۋيدجي كاربونە مەن پروفەسسور ستەفانو مارگاريتورانىڭ وتاعا قاتىستى مالىمدەمەسىن جاريالادى.
حيرۋرگتەر پونتيفيكتىڭ وڭ جاق وكپەسىنىڭ تومەنگى بولىگىن الىپ تاستاعان.
«زاقىمدانعان تىندەردى تولىق الىپ تاستاۋ ءۇشىن وڭ جاق وكپەنىڭ تومەنگى بولىگى بەينەحيرۋرگيالىق ادىسپەن الىندى»، – دەلىنگەن مالىمدەمەدە.
سونداي-اق تىندەرگە جۇرگىزىلگەن زەرتتەۋ دارىگەرلەردىڭ الدىن الا تەكسەرۋلەر ناتيجەسىندە بولجاعان دياگنوزىن راستاعانى حابارلاندى.
«وتا كەزىندە جۇرگىزىلگەن گيستولوگيالىق زەرتتەۋ وپەراتسياعا دەيىنگى تەكسەرۋلەردىڭ ناتيجەسىندە بولجانعان وكپە ادەنوكارتسينوماسى دياگنوزىن راستادى»، – دەپ مالىمدەدى دارىگەرلەر.
وتا 90 مينۋتقا سوزىلعان. ال ريم پاپاسى وپەراتسيالىق بولمەدە شامامەن ءۇش ساعات بولعان.
دارىگەرلەردىڭ ايتۋىنشا، حيرۋرگيالىق ارالاسۋ ءساتتى ءوتىپ، ەشقانداي اسقىنۋ بولماعان. كاتوليك شىركەۋىنىڭ باسشىسى ەسىن جيىپ، كەيىن پالاتاعا اۋىستىرىلعان.
