اقش-تىڭ گرەكياداعى ەلشىسى كيمبەرلي گيلفويل داۋ-دامايعا بايلانىستى وتستاۆكاعا كەتتى. وعان قىزمەتتىك وكىلەتتىگىن جەكە مۇددەسىنە پايدالاندى جانە بوپسالاۋمەن اينالىستى دەگەن ايىپ تاعىلىپ وتىر. بۇل تۋرالى Euronews جازدى، دەپ حابارلايدى «ادىرنا» ءتىلشىسى.
گيلفويل قىزمەتىنەن كەتكەنىن ح الەۋمەتتىك جەلىسىندەگى پاراقشاسىندا مالىمدەدى.
«امەريكا قۇراما شتاتتارىنىڭ گرەكياداعى ەلشىسى بولۋ – ومىرىمدەگى ەڭ ۇلكەن مارتەبە. ماعان الەم تاريحىنداعى ەڭ ۇلى ەلدىڭ اتىنان وكىلدىك ەتۋگە مۇمكىندىك بەرگەنى ءۇشىن پرەزيدەنت دونالد ترامپ پەن مەملەكەتتىك حاتشى ماركو رۋبيوعا ماڭگى ريزامىن»، – دەدى ول.
كىشى دونالد ترامپتىڭ بۇرىنعى قالىڭدىعى ەلشى قىزمەتىنە كىرىسكەن العاشقى كۇننەن باستاپ پرەزيدەنتتىڭ كۇن تارتىبىندەگى باسىمدىقتاردى ىلگەرىلەتۋ ءۇشىن جۇمىس ىستەگەنىن ايتتى. سونداي-اق ديپلومات وزىنە قاتىستى داۋ-دامايعا پىكىر ءبىلدىردى.
«جاقىندا ماعان تاعىلعان ايىپتارعا دا توقتالعىم كەلەدى. بۇل ايىپتاۋلار جالعان. مەن ءوز اتىمدى، ابىروي-بەدەلىمدى جانە ار-نامىسىمدى قورعاۋعا نيەتتىمىن. مەن كاسىبي ءومىرىمدى ادىلدىك ءۇشىن كۇرەسۋگە، دۇرىس دەپ ساناعان نارسەنى قورعاۋعا جانە امەريكانى بىرەگەي ەتەتىن قۇندىلىقتاردى جاقتاۋعا ارنادىم. جالعان ايىپتاۋلاردىڭ مەملەكەتتىك قىزمەتتەگى ونداعان جىلدىق ەڭبەگىمە كولەڭكە تۇسىرۋىنە جول بەرمەيمىن»، – دەپ جازدى ول.
اق ءۇيدىڭ ءباسپاسوز حاتشىسى كەتي زاحاريا گيلفويلدىڭ ترامپ كومانداسىندا ايتارلىقتاي جۇمىس اتقارعانىن اتاپ ءوتىپ، اكىمشىلىك وعان ساتتىلىك تىلەيتىنىن جەتكىزدى. اق ءۇي بۇل وتستاۆكانىڭ ترامپتىڭ ۇلكەن ۇلىنىڭ بۇرىنعى قالىڭدىعىنىڭ اينالاسىنداعى جانجالمەن بايلانىستى نە بايلانىستى ەمەس ەكەنىن رەسمي تۇردە ناقتىلاعان جوق.
