قازاقستاندا ازىرلەنگەن قاتەرلى ىسىككە قارسى وتاندىق پرەپاراتتى 2027 جىلى تىركەۋ جوسپارلانىپ وتىر، دەپ حابارلايدى "ادىرنا" ۇلتتىق پورتالى.
قازىر ءدارى پاتسيەنتتەردىڭ قاتىسۋىمەن كلينيكالىق سىناقتاردىڭ ەكىنشى كەزەڭىنەن ءوتىپ جاتىر. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ايتتى.
پرەپاراتتىڭ كلينيكالىق سىناقتارى استاناداعى ونكولوگيالىق ورتالىق بازاسىندا جۇرگىزىلۋدە. قازىرگى كەزەڭدە ماماندار ءدارىنىڭ قاجەتتى دوزاسىن انىقتاپ، ونىڭ ءارتۇرلى مولشەرىنىڭ پاتسيەنت اعزاسىنا اسەرىن زەرتتەپ جاتىر.
«قازىر پاتسيەنتتەرگە دوزانى تەستىلەۋ كەزەڭى ءجۇرىپ جاتىر. جىل سوڭىنا دەيىن بارلىق پروتسەدۋرانى اياقتاپ، پرەپاراتتى تىركەۋگە بەرۋگە تىرىسامىز»، – دەدى مينيستر ۇكىمەتتەگى بريفينگتە.
ەكىنشى كەزەڭدەگى كلينيكالىق زەرتتەۋلەر اياقتالعاننان كەيىن الىنعان ناتيجەلەر ساراپتاماعا جىبەرىلەدى. بۇدان سوڭ پرەپاراتتى ۇلتتىق دارىلىك زاتتار مەن مەديتسينالىق بۇيىمداردى ساراپتاۋ ورتالىعى ارقىلى مەملەكەتتىك تىركەۋدەن وتكىزۋ ءراسىمى باستالادى.
ساياسات نۇربەكتىڭ ايتۋىنشا، پرەپاراتتى تىركەۋ جۇمىستارى بيىل اياقتالسا، ءدارى كەلەسى جىلى قازاقستاندا قولدانىسقا شىعۋى مۇمكىن.
ء"سىرا، كەلەسى جىلى بولادى. ويتكەنى بيىلعى جىلدىڭ سوڭىنا دەيىن بارلىق پروتسەدۋرانى اياقتاپ، دەنساۋلىق ساقتاۋ مينيسترلىگىمەن قاجەتتى جۇمىستاردى جۇرگىزۋىمىز كەرەك", – دەدى ول.
العاشقى كەزەڭدە پرەپاراتتى قازاقستاندا جانە ەۋرازيالىق ەكونوميكالىق وداق ەلدەرىندە قولدانۋ ءۇشىن تىركەۋ جوسپارلانعان. ال باسقا مەملەكەتتەردىڭ نارىعىنا شىعارۋ ءۇشىن پرەپارات سول ەلدەردىڭ تالاپتارىنا سايكەس قوسىمشا تىركەۋ راسىمدەرىنەن ءوتۋى ءتيىس. قازاقستاندىق پرەپاراتتى عالىم دوس سارباسوۆ باستاعان ماماندار ازىرلەگەن. 2025 جىلدىڭ قاراشاسىندا پرەپاراتتىڭ كلينيكالىق سىناقتارىنىڭ شەشۋشى كەزەڭىنە وتكەنى حابارلانعان.
2026 جىلعى 31 ناۋرىزدا وتاندىق DVC پرەپاراتىنىڭ ادامدارعا جۇرگىزىلەتىن كلينيكالىق سىناقتارى باستالعانى بەلگىلى بولدى. زەرتتەۋ ۇلتتىق عىلىمي ونكولوگيا ورتالىعىنىڭ بازاسىندا جۇرگىزىلدى.
2026 جىلدىڭ مامىرىندا ساياسات نۇربەك پرەپاراتتىڭ ادامدارعا جۇرگىزىلگەن كلينيكالىق سىناقتارىنىڭ العاشقى كەزەڭى اياقتالعانىن حابارلاعان. ونىڭ ايتۋىنشا، زەرتتەۋگە قاتىسقان پاتسيەنتتەردىڭ بارلىعى امان قالعان، ال كەيبىرىندە ىسىك كولەمىنىڭ ازايعانى بايقالعان.
قازىر ماماندار پرەپاراتتىڭ دوزاسىن جانە پاتسيەنتتەردىڭ اعزاسىنا اسەرىن باعالاۋ بويىنشا زەرتتەۋلەردى جالعاستىرىپ جاتىر. پرەپاراتتىڭ ناقتى تيىمدىلىگى مەن قاۋىپسىزدىگى كلينيكالىق سىناقتاردىڭ بارلىق كەزەڭى اياقتالىپ، ءتيىستى ساراپتاما مەن مەملەكەتتىك تىركەۋ راسىمدەرى جۇرگىزىلگەننەن كەيىن انىقتالادى.
