مەملەكەت باسشىسى قازىرگى كونستيتۋتسيانىڭ تاريحي ماڭىزىن اتاپ ءوتىپ، سوڭعى 30 جىلدا قازاقستاننىڭ جەتكەن بارلىق جەتىستىكتەرىنىڭ نەگىزىندە اتا زاڭ تۇرعانىن ايتتى، دەپ حابارلايدى "ادىرنا" ۇلتتىق پورتالى.
ۇكىمەتتىڭ كەڭەيتىلگەن وتىرىسىندا پرەزيدەنت بۇل قۇجاتتىڭ قابىلدانۋى تۇڭعىش پرەزيدەنت نۇرسۇلتان نازارباەۆتىڭ تاباندى ەڭبەگىنىڭ ناتيجەسى ەكەنىن جەتكىزدى.
"ارينە، قازىرگى كونستيتۋتسيامىزدىڭ ءمان-ماڭىزىن ەشكىم جوققا شىعارمايدى. سوڭعى 30 جىلدا جەتكەن بارلىق جەتىستىگىمىزدىڭ باستاۋىندا اتا زاڭىمىز تۇرعانى ءسوزسىز. بۇل – تۇڭعىش پرەزيدەنت نۇرسۇلتان ءابىشۇلى نازارباەۆتىڭ تاباندى ەڭبەگىنىڭ ارقاسى.
دەگەنمەن بۇل قۇجات ەلىمىز ەندى عانا ەڭسەسىن تىكتەي باستاعان كەزدە قابىلدانعانىن ەسكەرگەن ءجون. وندا تاۋەلسىزدىكتىڭ العاشقى كەزەڭىندەگى قيىن كۇندەردىڭ ءىزى بار. سولاي بولۋى دا زاڭدى.
سول كەزدەن بەرى ەلىمىز ادام تانىماستاي وزگەردى. بولاشاعىمىزعا كوبى كۇمانمەن قاراسا دا، قازاقستان حالىقارالىق بەدەلى جوعارى، مىقتى مەملەكەتكە اينالدى.
قازىر الەمدەگى گەوساياسي، گەوەكونوميكالىق، تەحنولوگيالىق احۋال تۇبەگەيلى وزگەرىپ جاتىر. سوڭعى جىلدارى قازاقستان دا كوپتەگەن وزگەرىستى باستان وتكەردى. بۇل وزگەرىستەر ۇلت ساناسىنا ىقپال ەتتى، ءتىپتى، زور سىلكىنىس اكەلدى دەسەك، قاتە بولماس", - دەدى پرەزيدەنت توقاەۆ.
وسىعان بايلانىستى پرەزيدەنت ەلىمىزدىڭ ماقسات-مىندەتتەرىن، قۇندىلىقتارى مەن قاعيداتتارىن قازىرگى زامان تالاپتارىنا ساي، كونستيتۋتسيالىق دەڭگەيدە جاڭعىرتۋدىڭ ايرىقشا ماڭىزعا يە ەكەنىن مالىمدەدى
