قاراعاندى وبلىسىندا جاڭا كونستيتۋتسيا جوباسىن قوعامدىق تالقىلاۋ باستالدى. اكتيۆ وتىرىسىندا كونستيتۋتسيالىق كوميسسيا مۇشەلەرى ءسوز سويلەپ، نەگىزگى باپتار مەن وزگەرىستەرگە توقتالدى. سونىمەن قاتار، وبلىستىق ءماسليحات دەپۋتاتتارى، قازاقستان حالقى اسسامبلەياسىنىڭ جانە قوعامدىق ۇيىمداردىڭ وكىلدەرى ءوز پىكىرلەرىن ورتاعا سالدى. اشىق تالقىلاۋ كەلەسى كەزدەسۋلەر مەن ديالوگ الاڭدارى ارقىلى جالعاسادى. وبلىس اكىمى ەرماعانبەت بولەكپاەۆتىڭ تاپسىرماسىمەن بارلىق قالا مەن اۋدانداردى قامتيتىن اقپاراتتىق-اعارتۋشىلىق توبى قۇرىلعان.
– ءبىز ەلىمىزدە جۇزەگە اسىرىلىپ جاتقان اۋقىمدى ساياسي رەفورمالاردىڭ كۋاسى بولىپ وتىرمىز. قوعامدىق-ساياسي دامۋ سالاسىندا جاڭا داۋىرگە قادام باسىپ وتىرمىز. جاڭا كونستيتۋتسيا مەملەكەتتىك باسقارۋدىڭ جاڭا تاسىلدەرىن ەنگىزەدى، ايماقتار مەن ازاماتتىق قوعام ينستيتۋتتارىنىڭ، دەپۋتات كورپۋسىنىڭ جانە ءاربىر ازاماتتىڭ ءرولىن ارتتىرادى. وسى جاعدايدا ءبىز بارلىعىمىز حالىق اراسىندا نەگىزگى زاڭنىڭ باپتارىن ءتۇسىندىرۋ جۇمىسىنا بەلسەندى قاتىسۋىمىز كەرەك، اشىق ديالوگ پەن اقپاراتقا قولجەتىمدىلىكتى قامتاماسىز ەتە وتىرىپ، قوعامنىڭ ناقتى قاتىسۋىن ارتتىرۋىمىز قاجەت، – دەدى ەرماعانبەت بولەكپاەۆ.
قازاقستان رەسپۋبليكاسىنىڭ جاڭا كونستيتۋتسيا جوباسى كىرىسپەدەن، 11 بولىمنەن جانە 95 باپتان تۇرادى. قۇجات eGov جانە e-ءوتىنىش پورتالدارىندا جاريالانعان جانە قوعامدىق تالقىلاۋعا شىعارىلعان.
كونستيتۋتسيالىق كوميسسيا جۇمىسىنا قاراعاندى وبلىسىنان ءۇش وكىل قاتىستى: وبلىستىق ءماسليحات توراعاسى نۇركەن قوبجانوۆ،
«امانات» پارتياسى وبلىستىق فيليالىنىڭ توراعاسى بەكزات التىنبەكوۆ جانە ە. ا. بوكەتوۆ اتىنداعى قاراعاندى ۇلتتىق زەرتتەۋ ۋنيۆەرسيتەتىنىڭ رەكتورى نۇرلان دۋلاتبەكوۆ.
ولار نەگىزگى زاڭ جوباسىنىڭ باستى جاڭالىقتارىن تانىستىردى. قۇجاتتا مەملەكەتتىك بيلىكتىڭ بىردەن-ءبىر كوزى جانە ەگەمەندىكتىڭ يەسى – قازاقستان حالقى ەكەندىگى ناقتى كورسەتىلگەن. سونىمەن قاتار، كونستيتۋتسيادا ادىلدىك، زاڭ مەن ءتارتىپ، تابيعاتتى ساقتاۋدىڭ پرينتسيپتەرى العاش رەت بەكىتىلدى.
– كونستيتۋتسيادا عىلىم، ءبىلىم، مادەنيەت سياقتى باسىمدىقتاردىڭ انىق كورسەتىلگەنى قۋانتادى. ارىپتەستەرىم وسى جاڭالىقتاردى اسىعا كۇتتى. مەنىڭ ويىمشا، جاڭا كونستيتۋتسيانىڭ قابىلدانۋى وتە جاقسى ناتيجە بەرەدى. بىرپالاتالىق پارلامەنت، مەملەكەتتىك فۋنكتسيالار، ادام كاپيتالىنىڭ دامۋى سياقتى ماڭىزدى ماسەلەلەر قامتىلعان، – دەدى نۇرلان دۋلاتبەكوۆ.
قحا عىلىمي-ساراپتامالىق توبىنىڭ جەتەكشىسى ۆيلەن مولوتوۆ-لۋچانسكي قازاقستان حالىقتىق كەڭەسىنىڭ ءرولىن ەرەكشە ماڭىزدى دەپ سانايدى. ول ورگان بيلىك پەن حالىق اراسىنداعى قوسىمشا بايلانىس ارناسىنا اينالادى دەگەن پىكىردە.
وبلىستىق ءماسليحات دەپۋتاتى قاديشا وسپانوۆا الەۋمەتتىك اسپەكتىلەرگە نازار اۋداردى.
– الەۋمەتتىك مەملەكەتتىڭ نەگىزى ەڭ الدىمەن ادام مەن ونىڭ قۇقىقتارىنا باعىتتالعان. ءماسليحاتتار الەۋمەتتىك ساياساتتى جۇزەگە اسىرۋدا، ازاماتتاردىڭ مۇددەسىن قورعاۋدا كۇرىلتاي مەن حالىقتىق كەڭەسپەن تىكەلەي بايلانىس ارقىلى ماڭىزدى ءرول اتقارادى. باعىت – ءومىر ساپاسىن ارتتىرۋ جانە قولايلى جاعدايلار جاساۋ، – دەدى وبلىستىق ءماسليحاتتىڭ الەۋمەتتىك-مادەني دامۋ جانە الەۋمەتتىك قورعاۋ بويىنشا تۇراقتى كوميسسياسىنىڭ ءتورايىمى.
الداعى ۋاقىتتا جاڭا كونستيتۋتسيا جوباسىن تالقىلاۋ شەڭبەرىندە كەزدەسۋلەر، دوڭگەلەك ۇستەلدەر، ديالوگ الاڭدارى مەن قۇقىقتىق كونسۋلتاتسيالار ۇيىمداستىرىلاتىن بولادى.
