جاڭا كونستيتۋتسيانىڭ كۇشىنە ەنۋى قازاقستانداعى ساياسي رەفورمالاردىڭ جاڭا كەزەڭىن باستاپ، ەلدىڭ ۇزاق مەرزىمدى دامۋىنا باعىتتالعان ينستيتۋتسيونالدىق وزگەرىستەردىڭ قۇقىقتىق نەگىزىن قالىپتاستىردى. ءماجىلىس دەپۋتاتى ارداق بوراشتىڭ ايتۋىنشا، بۇل قۇجات تەك مەملەكەتتىڭ نەگىزگى زاڭى عانا ەمەس، سونىمەن قاتار «ادىلەتتى قازاقستاندى» قۇرۋعا، زاڭ ۇستەمدىگىن نىعايتۋعا جانە ازاماتتاردىڭ مەملەكەتتىك باسقارۋعا قاتىسۋىن كەڭەيتۋگە باعىتتالعان ماڭىزدى ستراتەگيالىق نەگىز.
سۇحبات بارىسىندا دەپۋتات جاڭا كونستيتۋتسيانىڭ ەلدەگى ساياسي جاڭعىرۋداعى رولىنە، زاڭ ۇستەمدىگىن نىعايتۋعا، ادامي كاپيتالدى دامىتۋعا، عىلىم مەن يننوۆاتسيالاردى قولداۋعا، ۇلتتىق قۇندىلىقتاردى دارىپتەۋگە جانە مەملەكەتتىك ينستيتۋتتاردىڭ تيىمدىلىگىن ارتتىرۋعا قاتىستى پىكىرىن ءبىلدىردى. سونىمەن قاتار ول رەفورمالاردىڭ ۇزاق مەرزىمدى ناتيجەلەرى مەن قازاقستاننىڭ الداعى ساياسي، ەكونوميكالىق جانە الەۋمەتتىك دامۋ پەرسپەكتيۆالارىنا توقتالدى.
- بۇگىن قازاقستاندا اۋقىمدى ساياسي رەفورمالاردىڭ قورىتىندىسى بولعان جاڭا كونستيتۋتسيا رەسمي تۇردە كۇشىنە ەندى. ءسىزدىڭ ويىڭىزشا، بۇل تاريحي كەزەڭ قازاقستان مەملەكەتتىلىگىنىڭ ودان ءارى دامۋى ءۇشىن قانداي ماڭىزعا يە؟
- راسىمەن دە، بۇگىن – جاڭا كونستيتۋتسيامىزدىڭ زاڭدى كۇشىنە ەنگەن كۇنى. بۇل ءبىزدىڭ مەملەكەتىمىزدىڭ دامۋىنداعى جاڭا كەزەڭ دەپ تولىق ايتۋعا بولادى. سەبەبى ءبىز «ادىلەتتى قازاقستان» قۇرامىز دەگەن ماقساتقا ۇمتىلىپ وتىرعان ۋاقىتتا وسى جاڭا كونستيتۋتسيا سونىڭ بەرىك نەگىزىنە اينالادى دەپ ەسەپتەيمىن.
بۇل كونستيتۋتسيانىڭ ماعان ەرەكشە ۇنايتىن تۇستارىنىڭ ءبىرى – ونىڭ تۇپنۇسقاسىنىڭ قازاق تىلىندە جازىلۋى. اسىرەسە، بۇل اۋىل تۇرعىندارى مەن قازاق ءتىلدى قوعام ءۇشىن وتە ماڭىزدى. ويتكەنى بۇعان دەيىنگى كونستيتۋتسيامىز تاۋەلسىزدىكتىڭ العاشقى جىلدارىنداعى كۇردەلى وتپەلى كەزەڭدە قابىلداندى. سول سەبەپتى ونىڭ تۇپنۇسقاسى ورىس تىلىندە ازىرلەنىپ، كەيىن قازاق تىلىنە اۋدارىلعان بولاتىن. سونىڭ سالدارىنان كەيبىر تۇستارىن ورىسشاسىمەن سالىستىرىپ قاراپ وتىرۋعا تۋرا كەلەتىن، بۇل قازاق ءتىلدى ازاماتتار مەن اۋىل تۇرعىندارى ءۇشىن بەلگىلى ءبىر قولايسىزدىقتار تۋعىزدى.
ال جاڭا كونستيتۋتسياعا قاراساق، ول قازاق تىلىندە جاتىق، تۇسىنىكتى ءارى ەكىۇشتى تۇسىندىرۋگە جول بەرمەيتىن ساپالى قۇجات بولىپ شىقتى دەپ ويلايمىن. سوندىقتان بۇل كونستيتۋتسيا ەلىمىزدىڭ ودان ءارى دامۋىنا، «ادىلەتتى قازاقستاندى» قۇرۋعا جانە قوعامداعى قۇقىقتىق مادەنيەتتى نىعايتۋعا ۇلكەن ۇلەس قوسادى دەپ سانايمىن.
- پرەزيدەنت قاسىم-جومارت توقاەۆ جاڭا كونستيتۋتسيانىڭ ادىلەتتى قازاقستاندى قۇرۋدىڭ نەگىزىنە اينالۋى ءتيىس ەكەنىن بىرنەشە رەت اتاپ ءوتتى. كونستيتۋتسيالىق رەفورمانىڭ تەك قۇقىقتىق قۇجات قانا ەمەس، مەملەكەتتىڭ ۇزاق مەرزىمدى دامۋ ستراتەگياسىنا اينالۋى قانشالىقتى ماڭىزدى؟
- بۇل راسىندا دا «ادىلەتتى قازاقستاندى» قۇرۋعا نەگىز بولاتىن اسا ماڭىزدى قۇجات دەپ ەسەپتەيمىن. سەبەبى كونستيتۋتسيا – بارلىق ازاماتقا بىردەي قاتىستى، مەملەكەت ءومىرىنىڭ نەگىزگى قاعيداتتارىن ايقىندايتىن باستى قۇقىقتىق قۇجات. زاڭ ۇستەمدىگى تولىق ورناعان جەردە عانا شىنايى ادىلەتتى قوعام قالىپتاسادى دەپ تولىق ايتۋعا بولادى. سوندىقتان جاڭا كونستيتۋتسيا وسى باعىتتاعى ماڭىزدى قادامداردىڭ ءبىرى بولدى دەپ سانايمىن.
بۇل قۇجات ەلىمىزدىڭ ودان ءارى دامۋىنا، ازاماتتاردىڭ مەملەكەتكە جانە قۇقىقتىق جۇيەگە دەگەن سەنىمىن نىعايتۋعا تىكەلەي ىقپال ەتەدى. كونستيتۋتسيانىڭ ساپاسى تەك قۇقىقتىق جۇيەنىڭ عانا ەمەس، جالپى مەملەكەتتىك باسقارۋدىڭ تيىمدىلىگىنە دە اسەر ەتەدى. سول سەبەپتى نەگىزگى زاڭىمىز نەعۇرلىم ساپالى، تۇسىنىكتى ءارى زامان تالابىنا ساي بولسا، ەلىمىزدىڭ دە دامۋى سوعۇرلىم تۇراقتى ءارى ناتيجەلى بولادى دەپ ويلايمىن.
زاڭ ۇستەمدىگىن قامتاماسىز ەتۋ ءۇشىن وسىنداي ساپالى قۇقىقتىق قۇجاتتىڭ بولۋى وتە ماڭىزدى. ويتكەنى كەز كەلگەن رەفورما مەن مەملەكەتتىك باستاما ەڭ الدىمەن كونستيتۋتسياعا سۇيەنەدى. سوندىقتان بۇل قۇجاتتىڭ قوعام تالابىنا ساي بولۋى جانە ازاماتتاردىڭ قۇقىقتارىن قورعاۋعا باعىتتالۋى ەلىمىزدىڭ بولاشاقتاعى دامۋى ءۇشىن ەرەكشە ماڭىزعا يە.
- پارلامەنت الدىندا سويلەگەن سوزىندە پرەزيدەنت جاڭا كونستيتۋتسيادا زاڭ ۇستەمدىگىنە، ادامي كاپيتالدى دامىتۋعا، عىلىمعا، بىلىمگە، يننوۆاتسيالارعا، تسيفرلاندىرۋعا جانە الەۋمەتتىك مەملەكەت قۇرۋعا ەرەكشە ءمان بەرىلگەنىن اتاپ ءوتتى. ءسىزدىڭ ويىڭىزشا، مۇنداي باسىمدىقتار قازىرگى الەمدىك مەملەكەتتىك دامۋ ۇردىستەرىنە قانشالىقتى سايكەس كەلەدى؟
- ءيا، بۇل باسىمدىقتار قازىرگى الەمدىك دامۋ ۇدەرىستەرىمەن تولىق ۇندەسەدى دەپ ايتۋعا بولادى. جالپى، ادىلەتتى ءارى پروگرەسسيۆتى مەملەكەت قۇرۋ ءۇشىن ەڭ الدىمەن ادامي كاپيتالدىڭ ساپاسىن ارتتىرۋ، عىلىم مەن يننوۆاتسيانى دامىتۋ، تسيفرلىق تەحنولوگيالاردى كەڭىنەن ەنگىزۋ اسا ماڭىزدى دەپ سانايمىن.
جاڭا كونستيتۋتسيامىزدا وسى باعىتتاردىڭ بارلىعى ءوز ورنىن تاپقان. مۇنى بىرنەشە نورمادان انىق كورۋگە بولادى. مىسالى، جاڭا كونستيتۋتسيادا ادام قۇقىقتارى مەن بوستاندىقتارى جاي عانا جاريالانىپ قويماي، ولاردى مەملەكەتتىڭ قورعاۋىنا جانە قامتاماسىز ەتۋىنە كەپىلدىك بەرىلەتىنى ناقتى كورسەتىلگەن. ياعني مەملەكەت ازاماتتاردىڭ قۇقىقتارى مەن زاڭدى مۇددەلەرىنىڭ قورعالۋىنا تىكەلەي جاۋاپكەرشىلىك الادى.
سونىمەن قاتار كونستيتۋتسيادا ءسوز جانە شىعارماشىلىق ەركىندىگىمەن بىرگە عىلىمي، عىلىمي-تەحنيكالىق جانە يننوۆاتسيالىق قىزمەت ەركىندىگىنە دە ەرەكشە ءمان بەرىلگەن. زياتكەرلىك مەنشىك قۇقىقتارىنىڭ قورعالۋى دا ناقتى ايقىندالعان. بۇدان بولەك، قازىرگى تسيفرلىق ءداۋىردىڭ تالاپتارىنا ساي ازاماتتاردىڭ جەكە دەرەكتەرى مەن تسيفرلىق اقپاراتتارىنىڭ قورعالۋى جونىندەگى قاعيداتتار دا كورىنىس تاپقان.
وسىنىڭ بارلىعى ەلىمىزدىڭ عىلىمي الەۋەتىن كۇشەيتۋگە، يننوۆاتسيالىق دامۋىنا جانە تسيفرلىق ترانسفورماتسيانى جەدەلدەتۋگە قۇقىقتىق نەگىز قالايدى دەپ ويلايمىن. جالپى، مۇنداي باعىتتار قازاقستاننىڭ ۇزاق مەرزىمدى باسەكەگە قابىلەتتىلىگىن ارتتىرىپ، پروگرەسسيۆتى ءارى زاماناۋي مەملەكەت رەتىندە ورنىعۋىنا تولىق نەگىز بولادى دەپ ايتا الامىن.
- پرەزيدەنت رەفورمالاردىڭ نەگىزگى ناتيجەلەرىنىڭ ءبىرى رەتىندە مەملەكەتتىك بيلىكتىڭ جاڭا ارحيتەكتۋراسىنىڭ قالىپتاسۋىن جانە ەلدەگى تەرەڭ ينستيتۋتسيونالدىق جاڭعىرۋدىڭ باستالۋىن اتادى. وسىنداي اۋقىمدى وزگەرىستەردى جۇزەگە اسىرۋدا جانە ولاردىڭ ۇزاق مەرزىمدى تيىمدىلىگىن قامتاماسىز ەتۋدە ساياسي كوشباسشىلىقتىڭ ءرولى قانشالىقتى ماڭىزدى؟
- مۇنداي اۋقىمدى رەفورمالاردا ساياسي كوشباسشىلىقتىڭ ءرولى شەشۋشى دەپ سانايمىن. سەبەبى ينستيتۋتسيونالدىق وزگەرىستەر تەك زاڭ قابىلداۋمەن عانا شەكتەلمەيدى. ەڭ باستىسى – ولاردىڭ ءتيىمدى ىسكە اسىرىلۋى. ول ءۇشىن مەملەكەتتىك ورگانداردىڭ ۇيلەسىمدى جۇمىس ىستەۋىمەن قاتار، قوعامنىڭ بەلسەندى قاتىسۋى، ازاماتتاردىڭ مەملەكەتتىك باسقارۋ ۇدەرىستەرىنە كەڭىنەن تارتىلۋى دا اسا ماڭىزدى.
جاڭا كونستيتۋتسيامىزعا نازار اۋدارساق، وندا وسى قاعيداتتار كورىنىس تاپقانىن بايقاۋعا بولادى. ماسەلەن، زاڭ شىعارۋ باستاماسىنا قاتىستى بۇرىنعى تەتىكتەرمەن قاتار، جاڭا قوعامدىق ينستيتۋتتار قالىپتاستىرىلىپ وتىر. سونىڭ ءبىرى – قازاقستان حالىق كەڭەسىنىڭ قۇرىلۋى. بۇل ازاماتتاردىڭ مەملەكەتتىك باسقارۋ ىسىنە قاتىسۋىنا، قوعامدىق پىكىردىڭ ەسكەرىلۋىنە جانە حالىق پەن بيلىك اراسىنداعى بايلانىستى نىعايتۋعا مۇمكىندىك بەرەتىن ماڭىزدى قادام دەپ ويلايمىن.
جالپى، جاڭا كونستيتۋتسيا ازاماتتاردىڭ مەملەكەتتىك باسقارۋعا قاتىسۋىن كەڭەيتۋ ارقىلى قۇقىقتىق مادەنيەتتىڭ نىعايۋىنا، مەملەكەتتىك جانە قوعامدىق ينستيتۋتتاردىڭ تۇراقتىلىعىنا نەگىز قالايدى دەپ ەسەپتەيمىن. ويتكەنى كەز كەلگەن رەفورمانىڭ تيىمدىلىگى تەك مەملەكەتتىك ينستيتۋتتاردىڭ باستاماسىنا عانا ەمەس، ونى قوعامنىڭ قولداۋىنا، ازاماتتاردىڭ بەلسەندى قاتىسۋىنا جانە تۇراقتى كەرى بايلانىستىڭ قالىپتاسۋىنا دا بايلانىستى.
سوندىقتان رەفورمالار حالىقتىڭ قاتىسۋىمەن، قوعام مەن مەملەكەتتىڭ ءوزارا سەنىمى نەگىزىندە جۇزەگە اسقان جاعدايدا عانا ءوزىنىڭ ناقتى ناتيجەسىن بەرەدى. ال مۇنداي ۇدەرىستەردى ءتيىمدى ۇيىمداستىرۋدا ساياسي كوشباسشىلىقتىڭ ءرولى ەرەكشە ماڭىزدى. ءدال وسى فاكتور رەفورمالاردىڭ جۇيەلى جۇزەگە اسۋىنا، ولاردىڭ ساباقتاستىعى مەن ۇزاق مەرزىمدى تيىمدىلىگىنە نەگىز بولادى دەپ سانايمىن.
- جاڭا كونستيتۋتسيادا ۇلتتىق بىرلىك، قوعامدىق كەلىسىم، زاڭ ۇستەمدىگىن قۇرمەتتەۋ، ادامي كاپيتالدى، عىلىم مەن يننوۆاتسيالاردى دامىتۋ سياقتى قۇندىلىقتار بەكىتىلگەن. ءسىزدىڭ ويىڭىزشا، كونستيتۋتسيانىڭ مەملەكەتتىك بيلىك جۇيەسىن ايقىنداپ قانا قويماي، ۇزاق مەرزىمدى ۇلتتىق قۇندىلىقتار مەن دامۋ باسىمدىقتارىن بەكىتۋى قانشالىقتى ماڭىزدى؟
- ءيا، جاڭا كونستيتۋتسيادا زاڭ ۇستەمدىگىن قۇرمەتتەۋگە ەرەكشە ءمان بەرىلگەن. جالپى، كەز كەلگەن مەملەكەت ءۇشىن، سونىڭ ىشىندە قازاقستان ءۇشىن دە زاڭنىڭ ۇستەمدىگى – تۇراقتى دامۋدىڭ باستى قاعيداتتارىنىڭ ءبىرى. قازاقتا «كەمدىككە كونبەسەك تە، تەڭدىككە كونەمىز» دەگەن تۇسىنىك بار. سوندىقتان زاڭ الدىندا بارلىق ازاماتتىڭ تەڭ بولۋى قوعامنىڭ مەملەكەتكە دەگەن سەنىمىن ارتتىرىپ، ورتاق قۇندىلىقتارىمىزدىڭ جانە ۇلتتىق بىرلىگىمىزدىڭ نىعايۋىنا ىقپال ەتەدى دەپ ويلايمىن.
زاڭ ۇستەمدىگى ورنىققان جەردە عانا ادىلدىك پەن قوعامدىق كەلىسىم بەرىك قالىپتاسادى. وسى تۇرعىدان العاندا، جاڭا كونستيتۋتسيادا ۇلتتىق قۇندىلىقتارعا قاتىستى ماڭىزدى نورمالاردىڭ ناقتى بەكىتىلۋى وتە قۇپتارلىق قادام بولدى. مىسالى، نەكە ينستيتۋتىنا قاتىستى قاعيداتتاردىڭ ايقىن كورسەتىلۋى – حالقىمىزدىڭ ءداستۇرلى قۇندىلىقتارىن قۇقىقتىق دەڭگەيدە بەكىتكەن ماڭىزدى شەشىمدەردىڭ ءبىرى دەپ ەسەپتەيمىن.
سونىمەن قاتار كونستيتۋتسيانىڭ كىرىسپەسىندە قازاقستاننىڭ كەشە عانا قۇرىلعان مەملەكەت ەمەس، مىڭداعان جىلدىق تاريحى بار ەل ەكەنى ايقىن كورسەتىلگەن. بۇل ەلىمىزدىڭ مەملەكەتتىلىك ءداستۇرىنىڭ تەرەڭ تامىرىن تانىتىپ قانا قويماي، قازىرگى قازاقستاننىڭ تاريحي ساباقتاستىعىن دا ايقىندايدى. مۇنداي ۇستانىم ۇلتتىق قۇندىلىقتاردى دارىپتەۋگە، تاريحي سانانى نىعايتۋعا جانە جاس ۇرپاقتىڭ ەل تاريحىنا دەگەن قۇرمەتىن ارتتىرۋعا قىزمەت ەتەدى دەپ ويلايمىن.
بۇعان قوسا، قوعامنىڭ بارلىق وكىلدەرىن مەملەكەتتىك باسقارۋ ۇدەرىستەرىنە كەڭىنەن تارتۋ دا ۇلتتىق بىرلىكتى كۇشەيتۋدىڭ ماڭىزدى تەتىگى سانالادى. ازاماتتاردىڭ قوعامدىق جانە مەملەكەتتىك ىستەرگە بەلسەندى قاتىسۋى حالىق پەن بيلىك اراسىنداعى ءوزارا سەنىمدى نىعايتىپ، ورتاق جاۋاپكەرشىلىك مادەنيەتىن قالىپتاستىرادى. سوندىقتان مۇنداي قاعيداتتار ۇزاق مەرزىمدى تۇراقتىلىققا، قوعامدىق كەلىسىمنىڭ ساقتالۋىنا جانە ەلىمىزدىڭ ورنىقتى دامۋىنا وڭ ىقپال ەتەدى دەپ سانايمىن.
- ەگەر جاڭا كونستيتۋتسيانىڭ كۇشىنە ەنۋى قازاقستان دامۋىنىڭ جاڭا كەزەڭىنىڭ باستالۋىن بىلدىرسە، ءسىزدىڭ ويىڭىزشا، الداعى جىلدارى قانداي ساياسي، ەكونوميكالىق جانە الەۋمەتتىك وزگەرىستەردىڭ ورىن الۋى ىقتيمال؟
- ءيا، جاڭا كونستيتۋتسيا ءبىزدىڭ ساياسي ينستيتۋتتارىمىزدىڭ تيىمدىلىگىن ارتتىرۋعا زور ۇلەس قوسادى دەپ ويلايمىن. سونىمەن قاتار زاڭ ۇستەمدىگىن ودان ءارى نىعايتۋعا بەرىك نەگىز قالايدى. وزدەرىڭىز بىلەسىزدەر، بۇگىنگى تاڭدا «زاڭ مەن ءتارتىپ» قاعيداتى ەرەكشە ماڭىزعا يە. زاڭ الدىندا بارلىق ازاماتتىڭ تەڭ بولۋى جانە قۇقىقتارىنىڭ سەنىمدى قورعالۋى قوعامداعى ادىلدىكتى قامتاماسىز ەتىپ قانا قويماي، ەكونوميكالىق دامۋعا دا وڭ اسەر ەتەدى دەپ سانايمىن.
اسىرەسە، زاڭ ۇستەمدىگى نىعايعان سايىن ەلىمىزدىڭ ينۆەستيتسيالىق احۋالى جاقسارىپ، كاسىپكەرلەردىڭ مەملەكەتكە دەگەن سەنىمى ارتا تۇسەدى. ينۆەستورلار ءۇشىن دە ەڭ باستى شارتتاردىڭ ءبىرى – قۇقىقتىق تۇراقتىلىق پەن زاڭنىڭ ءادىل ورىندالۋى. سوندىقتان جاڭا كونستيتۋتسيا وسىنىڭ بارىنە قۇقىقتىق نەگىز قالىپتاستىرادى دەپ ويلايمىن.
سونىمەن قاتار رەفورمالاردىڭ ناتيجەسى الەۋمەتتىك سالالاردا دا كورىنىس تابادى. ءبىلىم بەرۋ، دەنساۋلىق ساقتاۋ، الەۋمەتتىك قورعاۋ جۇيەلەرىن جەتىلدىرۋ، ادامي كاپيتالدىڭ ساپاسىن ارتتىرۋ سياقتى ماڭىزدى باعىتتاردىڭ بارلىعى ەلىمىزدىڭ جاڭا دامۋ كەزەڭىنىڭ نەگىزگى باسىمدىقتارىنا اينالادى دەپ ەسەپتەيمىن. سەبەبى مەملەكەتتىڭ ۇزاق مەرزىمدى تابىسى ەڭ الدىمەن ءبىلىمدى، دەنى ساۋ ءارى بەلسەندى ازاماتتارعا بايلانىستى.
جالپى، رەفورمالاردىڭ تۇپكى ناتيجەسى مەملەكەتتىك ينستيتۋتتاردىڭ تيىمدىلىگىن ارتتىرۋمەن قاتار، قوعامنىڭ بەلسەندىلىگىن كۇشەيتۋگە باعىتتالۋى ءتيىس. ەڭ باستىسى – ازاماتتاردىڭ مەملەكەتتىك باسقارۋ ىسىنە، ەلدى دامىتۋ ۇدەرىستەرىنە كەڭىنەن قاتىسۋىنا جاعداي جاساۋ. ويتكەنى مەملەكەت پەن قوعامنىڭ ءوزارا سەرىكتەستىگى بولعان جەردە عانا رەفورمالار ناقتى ناتيجە بەرەدى.
قازاقستاننىڭ دامۋ مۇمكىندىكتەرى وتە جوعارى دەپ سانايمىن. تابيعي رەسۋرستارىمىز جەتكىلىكتى، گەوگرافيالىق ورنالاسۋىمىز دا وتە ءتيىمدى. ءبىز ەۋروپا مەن ازيانى بايلانىستىراتىن ماڭىزدى توراپتا ورنالاسقانبىز. ۇلى جىبەك جولىنىڭ تاريحي مۇراسىن جالعاستىرىپ وتىرعان ەل رەتىندە حالىقارالىق كولىك دالىزدەرىن، اۆتوموبيل جانە تەمىرجول باعىتتارىن، سونداي-اق كاسپي تەڭىزىنىڭ ترانزيتتىك جانە ەكونوميكالىق الەۋەتىن ءتيىمدى پايدالانۋ مۇمكىندىگىمىز زور. مۇنىڭ ءبارى ەلىمىزدىڭ ەكونوميكالىق وسىمىنە قوسىمشا سەرپىن بەرەدى.
جالپى العاندا، ەڭ باستىسى – زاڭنىڭ ناقتى جۇمىس ىستەۋى، وعان قوعامنىڭ سەنۋى جانە زاڭ ۇستەمدىگىنىڭ بەرىك ورنىعۋى. وسىنداي قاعيداتتار ساقتالعان جاعدايدا قازاقستاننىڭ ۇلكەن دامۋ كەزەڭىنىڭ الدىندا تۇرعانىنا سەنىمدىمىن. قازىردىڭ وزىندە ەلىمىزدىڭ جەتىستىكتەرى از ەمەس. ەندىگى مىندەت – وسى قارقىندى ساقتاپ، ونى جاڭا دەڭگەيگە كوتەرۋ جانە الەمدىك قاۋىمداستىقتاعى ءوز ورنىمىزدى ودان ءارى نىعايتۋ.
ال مۇنداي دامۋدىڭ باستى كەپىلى – مىزعىمايتىن، ادىلەتتى ءارى ساپالى زاڭ. مەنىڭ ويىمشا، ءدال وسى قۇقىقتىق نەگىزدى جاڭا كونستيتۋتسيامىز قامتاماسىز ەتەدى جانە ەلىمىزدىڭ ۇزاق مەرزىمدى وركەندەۋىنە قىزمەت ەتەدى.
