Qaraǧandy oblysynda jaŋa Konstitusiia jobasyn qoǧamdyq talqylau bastaldy. Aktiv otyrysynda Konstitusiialyq komissiia müşelerı söz söilep, negızgı baptar men özgerısterge toqtaldy. Sonymen qatar, oblystyq mäslihat deputattary, Qazaqstan halqy Assambleiasynyŋ jäne qoǧamdyq ūiymdardyŋ ökılderı öz pıkırlerın ortaǧa saldy. Aşyq talqylau kelesı kezdesuler men dialog alaŋdary arqyly jalǧasady. Oblys äkımı Ermaǧanbet Bölekpaevtyŋ tapsyrmasymen barlyq qala men audandardy qamtityn aqparattyq-aǧartuşylyq toby qūrylǧan.
– Bız elımızde jüzege asyrylyp jatqan auqymdy saiasi reformalardyŋ kuäsı bolyp otyrmyz. Qoǧamdyq-saiasi damu salasynda jaŋa däuırge qadam basyp otyrmyz. Jaŋa Konstitusiia memlekettık basqarudyŋ jaŋa täsılderın engızedı, aimaqtar men azamattyq qoǧam instituttarynyŋ, deputat korpusynyŋ jäne ärbır azamattyŋ rölın arttyrady. Osy jaǧdaida bız barlyǧymyz halyq arasynda Negızgı zaŋnyŋ baptaryn tüsındıru jūmysyna belsendı qatysuymyz kerek, aşyq dialog pen aqparatqa qoljetımdılıktı qamtamasyz ete otyryp, qoǧamnyŋ naqty qatysuyn arttyruymyz qajet, – dedı Ermaǧanbet Bölekpaev.
Qazaqstan Respublikasynyŋ jaŋa Konstitusiia jobasy kırıspeden, 11 bölımnen jäne 95 baptan tūrady. Qūjat eGov jäne e-Ötınış portaldarynda jariialanǧan jäne qoǧamdyq talqylauǧa şyǧarylǧan.
Konstitusiialyq komissiia jūmysyna Qaraǧandy oblysynan üş ökıl qatysty: oblystyq mäslihat töraǧasy Nūrken Qobjanov,
«Amanat» partiiasy oblystyq filialynyŋ töraǧasy Bekzat Altynbekov jäne E. A. Böketov atyndaǧy Qaraǧandy ūlttyq zertteu universitetınıŋ rektory Nūrlan Dulatbekov.
Olar Negızgı zaŋ jobasynyŋ basty jaŋalyqtaryn tanystyrdy. Qūjatta memlekettık bilıktıŋ bırden-bır közı jäne egemendıktıŋ iesı – Qazaqstan halqy ekendıgı naqty körsetılgen. Sonymen qatar, Konstitusiiada ädıldık, zaŋ men tärtıp, tabiǧatty saqtaudyŋ prinsipterı alǧaş ret bekıtıldı.
– Konstitusiiada ǧylym, bılım, mädeniet siiaqty basymdyqtardyŋ anyq körsetılgenı quantady. Ärıptesterım osy jaŋalyqtardy asyǧa küttı. Menıŋ oiymşa, jaŋa Konstitusiianyŋ qabyldanuy öte jaqsy nätije beredı. Bırpalatalyq Parlament, memlekettık funksiialar, adam kapitalynyŋ damuy siiaqty maŋyzdy mäseleler qamtylǧan, – dedı Nūrlan Dulatbekov.
QHA ǧylymi-saraptamalyq tobynyŋ jetekşısı Vilen Molotov-Luchanskii Qazaqstan Halyqtyq keŋesınıŋ rölın erekşe maŋyzdy dep sanaidy. Ol organ bilık pen halyq arasyndaǧy qosymşa bailanys arnasyna ainalady degen pıkırde.
Oblystyq mäslihat deputaty Qadişa Ospanova äleumettık aspektılerge nazar audardy.
– Äleumettık memlekettıŋ negızı eŋ aldymen adam men onyŋ qūqyqtaryna baǧyttalǧan. Mäslihattar äleumettık saiasatty jüzege asyruda, azamattardyŋ müddesın qorǧauda Kūryltai men Halyqtyq keŋespen tıkelei bailanys arqyly maŋyzdy röl atqarady. Baǧyt – ömır sapasyn arttyru jäne qolaily jaǧdailar jasau, – dedı oblystyq mäslihattyŋ äleumettık-mädeni damu jäne äleumettık qorǧau boiynşa tūraqty komissiiasynyŋ töraiymy.
Aldaǧy uaqytta jaŋa Konstitusiia jobasyn talqylau şeŋberınde kezdesuler, döŋgelek üstelder, dialog alaŋdary men qūqyqtyq konsultasiialar ūiymdastyrylatyn bolady.
