مەملەكەت باسشىسى سالىق ساياساتىن جەتىلدىرۋ ماسەلەسىنە توقتالىپ، سالىق ورگاندارى مەن بيزنەس اراسىنداعى قاتىناس جازالاۋشى ەمەس، سەرىكتەستىك نەگىزىندە قۇرىلۋى ءتيىس ەكەنىن مالىمدەدى، دەپ حابارلايدى "ادىرنا" ۇلتتىق پورتالى.
پرەزيدەنتتىڭ ايتۋىنشا، مەملەكەت پەن بيزنەستىڭ ءتيىمدى ىقپالداستىعى ادىلدىككە، ءوزارا تيىمدىلىككە جانە ەكونوميكانى دامىتۋعا ورتاق جاۋاپكەرشىلىككە نەگىزدەلۋى قاجەت. بۇل تۋرالى ول جۋىردا «Turkistan» گازەتىنە بەرگەن سۇحباتىندا ايتقان.
"جازالاۋشى مەنتاليتەتتەن ارىلاتىن كەز كەلدى. سالىق ورگاندارى مەن سالىق تولەۋشىلەر اراسىندا سەرىكتەستىك جانە ءوزارا سەنىم قاعيداتى ورنىعۋعا ءتيىس. مەملەكەت پەن بيزنەستىڭ ءتيىمدى ىقپالداستىعىن جولعا قويۋ كەرەك. مۇنداي سەرىكتەستىك ادىلدىككە، ءوزارا تيىمدىلىككە، ءتىپتى ەكونوميكانى دامىتۋدىڭ ماڭىزىن ءتۇسىنۋ تۇرعىسىنان العاندا جاۋاپكەرشىلىككە قۇرىلۋعا ءتيىس دەپ ويلايمىن. بۇل جونىندە جاقىندا «Turkistan» گازەتىنە بەرگەن سۇحباتىمدا ايتتىم. ۇكىمەتتىڭ كەيبىر مۇشەلەرىمەن اڭگىمەدەن ۇققانىم، ونى ءبارى بىردەي ىقىلاس قويىپ وقىماعان سەكىلدى. قىزىلوردادا وتكەن ۇلتتىق قۇرىلتاي وتىرىسىنداعى ءسوزىمدى دە تولىق تۇسىنبەگەندەرىڭىز بايقالادى. ينتەرنەت ۇزاق ماتىندەردى وقۋدان الىستاتتى. ونىڭ ۇستىنە كىتاپتار مەن ماقالالاردى وقىماي-اق، مازمۇنىن تىڭداي سالاتىن مۇمكىندىك پايدا بولدى. بىراق بۇل مەملەكەتتىك قىزمەتكەرلەرگە جاراسپايتىن ادەت. وقۋ كەرەك. ايتپەسە، زەينەت جاسىنا جەتكەن كەزدە، ويلانۋ قابىلەتىنەن ايىرىلىپ قالاسىزدار", - دەپ ەسكەرتۋ جاسادى.
پرەزيدەنت سالىقتىق اكىمشىلەندىرۋ جۇيەسىن جەتىلدىرۋ ماقساتىندا بانكتەر، اگرەگاتورلار مەن ماركەتپلەيستەر سالىق اگەنتتەرى رەتىندە تولىق جۇمىس ىستەۋى ءتيىس ەكەنىن اتاپ ءوتتى.
"بانكتەر، اگرەگاتورلار مەن ماركەتپلەيستەر سالىقتىق اكىمشىلەندىرۋدىڭ ارەكەت ەتۋ اياسىنا تولىقتاي ەنىپ، سالىق اگەنتتەرى مىندەتىن اتقارۋعا ءتيىس. مەملەكەتتىك كىرىستەر كوميتەتىنە تولىق تسيفرلىق رەجيمدە جۇمىس ىستەيتىن «فيسكالدىق دەرەكتەر فابريكاسىنا» اينالۋ مىندەتى جۇكتەلدى. بۇكىل ماسەلەنى شەشۋدىڭ جالعىز دۇرىس جولى – وسى. 2027 جىلدىڭ سوڭىنا دەيىن سالىق جانە كەدەن جۇيەسىن باسقارۋدىڭ تسيفرلىق ءتاسىلىن ەنگىزۋ قاجەت. بۇل – ستراتەگيالىق ماڭىزى بار مىندەت. سونىمەن قاتار ۇلتتىق تاۋارلار كاتالوگى مەن وتاندىق تاۋار وندىرۋشىلەرى رەەسترىن جەدەل ىسكە قوسىپ، تاۋارلاردى تسيفرلىق تاڭبالاۋ جۇيەسىن كەڭەيتكەن ءجون. بىراق تاۋار تاڭبالاۋدى جوسپارلانعان وندىرىسكە زيانىن تيگىزبەي جاساۋ كەرەك. مينيسترلىكتەر قابىلداعان جاڭا ەرەجەلەر مەن شەشىمدەر شەتەلدىك جانە وتاندىق كومپانيالاردىڭ قىزمەتىنە كەرى اسەر ەتپەۋگە ءتيىس. مۇنداي جايت ەلىمىزدەگى ينۆەستيتسيالىق كليماتتى ناشارلاتادى. وتاندىق جانە شەتەلدىك كومپانيالار بۇل ماسەلەگە الاڭداۋشىلىق ءبىلدىرىپ، ماعان حات جازىپ جاتىر", - دەدى پرەزيدەنت.
